Prome partido lo ta contra Alemania riba 14 di Juni posiblemente na Philadephia
–
Photo courtesy FIFA
–
Den un evenemento grandi na Washington DC na Estados Unidos, unda cu alrededor di 1 billon hende rond mundo a sintonisa pa wak e loting di e Mundial 2026 na Noord America (Mexico, Estado Unidos y Canada). E loting a dicidi e ken nan ta bai hunga den cual di e 12 gruponan. E anticipacion grandi pa nos hendenan akinan na Aruba tawata p’a wak unda nos isla ruman Korsou lo keda ubica den e proceso aki. Haiti tambe ta di interes pa hopi door cu nan tambe ta comparti presencia den e confederacion di Concacaf (Caribe pa ta precies) y p’e lasonan cu nos tin cu e pueblo Haitiano.
–
E formato di e torneo
Nos ta ongeveer 6 luna aleha for di e comienso di e Mundial mas grandi den historia, unda 48 pais lo hunga den e fase di grupo. Ta bai tin 12 grupo di cuater ekipo cada un, unda e dos prome ekiponan cu mas puntuacion despues di e “round robin”, y ademas tambe e 8 mihor 3er lugar nan lo clasifica p’e siguiente rond, formando e rond di 32. Den e rond di 32 cu ta un fase di “knock-out”, 16 ekipo ta bai keda elimina, e16 ekipo cu keda lo hung octavo di final (rond di 16). E ocho ekiponan cu keda despues lo hunga e quart-final, for di ey lo keda 4 ekipo den semi-final pa determina ken lo hunga final pa determina e campeon y sub-campeon y tambe 3-4 lugar (medaya di brons).
–
Photo by Davyne Croes/ DAC Image
–
loting
Korsou a cai den grupo E unda Alemania ta cabes di grupo, hunto cu Ecuador y Ivory Coast. Nan lo hunga nan prome partido dia 14 di Juni contra Alemania (partido #9), te cu awor, ta parc’e na Philadelphia (Philadelphia stadium – Lincoln Financial Field). Den e siguiente partido Korsou lo hunga contra Ecuador (partido #34) dia 20 di Juni, probablemente na Kansas City, y e di tres partido dia 25 contra Ivory Coast (Partido #56) probablemente na New York (e cedenan tin chens di cambia den e siguiente dianan, debi na factornan logistico).
Haiti a cai den grupo C cu Brazil, Marocco y Schotland. Nan prome partido ta contra Schotland (partido #7) dia 13 di Juni, probablemente na New York. Despues nan lo hunga contra Brazil (partido #29) dia 19 di Juni probablemente na Philadelphia y lo culmina fase di grupo contra Marocco (partido #50) dia 24 di Juni probablemente na Atlanta.
–
E gruponan di mundial 2026
–
Courtesy FIFA
