Category: AVB

E fin di siman aki ta tuma luga Copa ABC na Boneiro

Recientemente Arubaanse Voetbal Bond (AVB) a anuncia cu hunto cu Fundacion Lotto pa Deporte a yega na acuerdo p manda nos ekipo campeon di Division di Honor 2016-17, esta Coca Cola-Naciona pa representa Aruba den Copa ABC cu ta tuma luga e fin di siman aki na Boneiro.

E federacionnan di futbol di e tres islanan ta deliberando pa basta tempo caba pa rebiba e custumber di añanan 60 caba, esta e Copa Antiano cu despues a bira Copa ABC.

E ekiponan di RKSV Centro Dominguito di Corsou, SV Real Rincon di Boneiro y Coca Cola Nacional di Aruba hunto cu un ekipo mas di Boneiro lo hunga den e torneo.

Pa St. Fundacion Lotto pa Deporte, e vision no ta solamente pa promove deporte, pero tambe union entre e pueblonan di Aruba, Boneiro y Corsou, siendo rumannan den Reino Hulandes. E intencion ta pa di e forma aki crece deportivamente den region pa despues sali como un ekipo mas solido pa enfrenta otro ekiponan den nos region.

Di parti Lotto pa Deporte ta desea e ekipo di Coca Cola Nacional tur clase di exito den e Copa ABC 2017 na Boneiro. Y na e fanaticonan….sigui cumpra Lotto, sigui aporta na deporte di nos isla.

Aruba lo participa den ABC Cup na November

Fundacion Lotto pa Deporte yudando pa futbol crece

Fundacion Lotto pa Deporte conhuntamente cu Arubaanse Voetbal Bond a haci posibel pa hiba e team campeon Coca-Cola Nacional pa participa den e ABC Cup, cu tabata Copa Antiano. President di e fundacion, Di-Stefano Wernet ta contento pa cu esaki. FLpD a haci un donacion di 15.000 pa asina yuda AVB p’e ABC Cup.

El a elabora cu semper nan a coopera cu AVB, unda cu semper nan a mira e importancia di e deporte rey futbol, cu tin hopi team, hopi atleta y fanaticada. E directiva di AVB a acerca Fundacion Lotto pa Deporte y di biaha a mira e importancia di recorda e campeonnan di Antias, e campeonnan di e campeonatonan Antiano. Pa cu esaki a dicidi di yuda AVB financieramente na e proyecto aki.

E ta un join venture entre AVB y Lotto, unda cu tur dia e ta historico. Di-Stefano Wernet a pidi pa tur hende cu por bay pa asina sostene e team di Coca-Cola Nacional na Boneiro, cual campeonato lo tuma luga na November. Tambe el a remarca cu mester sigui apoya e campeonato local cu a cuminsa. President di FLpD a invita tur hende pa yega stadion y apoya e deporte pa asina esaki bay padilanti. Deporte ta uni tur hende, pasobra deporte no ta mira raza, ni sexo, religion, politica pero pa tur hende uni den deporte cu fair play.

Arubaanse Voetbal Bond ta honra Aubrey Maduro

Arubaanse Voetbal Bond (AVB) cu masha placer a anuncia e siman aki, cu e campeonato di futbol cu ta cuminsa diabierna awor, dia 13 di October 2017, lo ta dedica, entre otro, na Aubrey Maduro. E ta un ex Referee di AVB y awendia ta masha conoci pa su aporta como Referee di Federacion di Futbol Veterano di Aruba, cu ta para pa FEDEVETA.

Aubrey Maduro a cuminsa fluit weg for di aña 1985, weganan di A Klas, division 1 y 2 y junioren.  Desde aña 1990 el a cuminsa fluit division di honor y tambe LIFIDA y knockout cu e tempo ey, unda cu tur diadomingo tabatin wega na diferente veld. E tempo ey e tabata guia p’e refereenan manera Fan Dijkhoff d.f.m, Porios Tromp, Kees Bossen d.fm. y David Cruz.

Aubrey Maduro a sigui diferente curso via K.N.V.B. di Hulanda na nivel 1, 2, 3 di AVB. Aubrey Maduro tambe tabata forma parti di e comision di referee di AVB. Actualmente e ta forma parti y ta dirigi hunto cu Ernst Mohamed e comision di refereenan di Fedeveta.

Referee Aubrey Maduro semper ta un persona hopi autoritario riba tereno y tur hungado ta respet’e. E no ta na Aruba actualmente pa ricibi su reconocimento, pero lo entreg’e personalmente ora e ta bek for di Hulanda.

SV RCA y SV Caiquetio lo habri e prome wega di campeonato di futbol

Diabierna awor dia 13 di october 2017 e campeonato nacional di division di honor di nos deporte rey ta inicia. Arubaanse Voetbal Bond (AVB) ta orguyoso di anuncia cu 10 ekipo a inscribi pa e campeonato aki, di cual e prome rond ta cuminsa diabierna y lo e esaki lo termina pa dia 10 di december 2017.

Ekiponan cu lo hunga contra otro den e prome rond aki ta SV RCA, SV Caiquetio, Deportivo Nacional, SV Riverplate, SV Bubali, SV La Fama, SV Britannia, SV Estrella SV Dakota y SV Juventud Tanki Leendert. E weganan lo tuma luga riba diabierna, diasabra y diadomingo y tur ta tuma luga den Stadion Guillermo P. Trinidad na Dakota.

Diabierna lo tin e apertura pa 7:15 PM, unda cu ekiponan di LIFIDA lo desfila hunto cu e 2 ekiponan di e anochi aki. E wega lo inicia pa 8:00 PM, unda cu RCA lo enfrenta Caiquetio. Diasabra anochi pa 8:00 PM e campeon di aña pasa, esta Deportivo Nacional lo defende su titulo contra di Riverplate. Diadomingo lo tin 1 wega, cual lo ta entre SV Bubali y La Fama pa 6:00 PM.

Pa awor, ta invita comunidad amante di futbol, pa yega stadion pa sostene y apoya nos futbolistanan di e 10 ekiponan competiendo na e nivel mas halto posibel di futbol, buscando e trofeo di campeon.

Campeonato di futbol division di honor ta cuminsa diabierna awo

Diabierna awor dia 13 di october 2017 lo inicia e campeonato nacional di division di honor di nos deporte rey, futbol. Arubaanse Voetbal Bond (AVB) ta masha orguyoso di anuncia cu 10 ekipo a inscribi pa e campeonato aki, di cual e prome rond ta cuminsa diabierna awo y lo termina dia 10 di december 2017.

Ekiponan cu lo hunga contra otro den e prome rond aki ta SV RCA, SV Caiquetio, Deportivo Nacional, SV Riverplate, SV Bubali, SV La Fama, SV Caravel, SV Britannia, SV Estrella y SV Dakota. Tur wega ta riba diabierna, diasabra y diadomingo y tur ta tuma luga den Stadion Guillermo P. Trinidad na Dakota.

“Nos tabatin un tremendo campeonato 2016-2017 y mi expectativanan ta pa esun aki ta miho cu aña pasa. AVB hunto cu e clubnan ta canando un trayectorio di profesionalisacion y adaptacion, pa garantisa mas calidad di wega y hungadonan miho prepara, cu tecnica moderno, capaz pa hunga na Aruba of den nos region”, asina ing. Richard Dijkhoff, Presidente di AVB a duna di conoce.

Separa di e clubnan, AVB a haci inversionnan grandi den amplia su oficina na Shaba, pa por tin un ekipo profesional pa organisa, dirigi y supervisa weganan di futbol na Aruba. Tambe ta invertiendo den nos refereenan, den Match Officials, den e coachnan di teamnan y asina por menciona.

“Mi por bisa cu hopi orguyo, cu despues di hopi trabou y contacto internacional, awendia KNVB di Hulanda y CONCACAF tin hopi wowo riba Aruba y ta dunando nos un man den e trayecto pa hisa nivel di futbol en general riba nos isla. No solamente cu placa, pero tambe cu ekipo y conocemento”, asina Richard Dijkhoff a splica cu un sonrisa di orguyo riba su cara.

Pa awor, ta invita comunidad amante di futbol, pa yega stadion pa sostene y apoya nos futbolistanan di e 10 ekiponan competiendo na e nivel mas halto posibel di futbol, buscando e trofeo di campeon.

Arubaanse Voetbal Bond ta considera cu SV Dakota tin rason

Net prome cu directiva di Arubaanse Voetbal Bond a inicia su reunion di bestuur di dia 12 di juni ultimo, SV Dakota a yega oficina di AVB y a entrega un protesta contra Deportivo Nacional. E protesta tabata contene 4 punto di protesta. Debi na e tempo cu ta keda prome cu e Play Off final lo inicia, directiva di AVB a bay over na adapta su agenda pa e anochi aki y pa trata e protesta cu tur urgencia. Despues cu directiva a evalua y analisa e protesta y a duna dirigentenan di Deportivo Nacional oportunidad di repasa y analisa e protesta, directiva a dicidi di duna SV Dakota rason den mayoria punto.

E puntonan tabata varia entre hungado cu a hunga dicho wega cu 3 carchi geel, siendo esey no ta permiti. Tambe a protesta contra hungadonan di Deportivo Nacional, cu no tin nacionalidad Hulandes y cu no a entrega documentonan den e dianan stipula na AVB, di acuerdo cu reglamentonan. Tambe SV Dakota a protesta contra un hungado cu ta “uitgeschreven” for di Registro Civil di Aruba, pa cual ta consider’e un hungado ilegal.

Directiva di AVB, den su consideracion a tene cuenta cu reglanan vigente y a duna SV Dakota rason den mayoria di su protestanan y consecuentemente ta aplica articulo 11 inciso 2 di e RCW y ta cambia e resultado di e wega di dia 9 di juni 2017 na fabor di SV Dakota. Cu e decision aki, SV Dakota ta pasa automaticamente pa final y ta hunga e wega pa Campeon y Sub Campeon contra SV RCA.

Mester menciona, cu di acuerdo cu reglanan vigente, Deportivo Nacional tin 4 dia di trabou (pues te cu dialuna) pa apela e decision aki na e Comision di Apelacion, den cual tin 4 abogado, 1 hurista y 2 persona cu amplio conocemento y experticio den tur locual ta trata futbol. Ta bon pa informa cu e comision aki ta un comision independiente for di bestuur di AVB y nan ta opera independiente tambe. Nan decision ta final y un decision cu e comision aki tuma mester keda acepta y respeta pa tur partido.

Arubaanse Voetbal Bond ta lamenta e situacion aki, cu tin como consecuencia cu ta pospone e wega di diasabra awor, pa duna Deportivo Nacional oportunidad pa apela. Di otro banda, reglanan di futbol ta permiti ekiponan protesta den caso cu nan sinti cu no tin “fairplay” di un banda pa e otro.

Ta intencion di AVB tambe, pa den e campeonato 2017-2018, propone cambio di reglanan na e clubnan. Semper y cuando ta e clubnan miembro di AVB ta acepta of rechasa peticion pa cambio. Mester pensa den cambio ora di admision of ora di cambiamento di hungado. Asina ta evita cu pa fayo administrativo, ta hunga cu hungadonan sin permiso of no inscribi como ciudadano di nos isla. Mescos cu e ta un responsabilidad di AVB pa tira bista riba e desaroyo aki, e ta mes tanto deber di cada organisacion deportivo pa no hunga cu hungadonan no legal. A pesar cu semper y cuando algo por pasa cu e consecuencianan cu nos ta experencia awe.

AVB ta spera cu e procesonan cu lo sigui cana mas lihe posibel pa por tin un bunita final di nos campeonato 2016-2017 di division di Honor.

Dakota y Britannia ta habri Play-Off 2016/17 diabierna awor

E teamnan di division di honor e aña aki lo competi contra otro den e play-off pa mira cua ta e 2 teamnan cu lo hunga e final pa titula campeon 2016-2017. Recientemente Arubaanse Voetbalbond (AVB) a tira lot pa determina cua ekipo lo hunga contra otro. E teamnan RCA, Britannia, Nacional y Dakota lo enfrenta otro den e play-off. “Nos ta dilanti porta di play-off di cual ta mustra di ta bay ta uno sumamente interesante”, Presidente di AVB, Ing. Richard Dijkhoff a anuncia durante un conferencia di prensa. A yega na 4 ekipo fuerte cu lo bataya pa e trofeo di campeon y AVB ta sigur cu e weganan lo ta di nivel halto.

E prome rond di play-off lo inicia diabierna awor dia 12 di Mei pa 8:30pm den Stadion Guillermo P. Trinidad na Dakota, unda cu e ekipo di SV Dakota lo enfrenta SV Britannia. Diabierna anochi lo tuma luga e apertura y lo bay tin diferente actividad rond di e apertura, di acuerdo cu Richard Dijkhoff. SV RCA lo enfrenta Nacional diasabra pa 8:00pm unda cu ta premira un otro wega di nivel superior. Dia 17 di Mei e prome rond lo continua, mientras cu e di dos rond lo inicia dia 28 di Mei. E final lo inicia dia 17 di Juni unda cu lo aplica “Best out of 3”.

SV Dakota ta contento di a yega e play-off un biaha mas y ta cla pa bataya fuerte pa asina por yega final y bay cu e trofeo cas. Tambe nan ta sigur cu comunidad di Aruba lo mira un bon futbol, asina dirigente di Dakota a remarca. Dirigente di SV Britannia ta cla pa hunga e play-off y tambe cu lo tin un bon ambiente na stadion di Dakota. El a invita tur hende pa yega stadion y presencia weganan di futbol.

Dirigente di Deportivo Nacional a remarca cu un biaha mas nan ta den e play-off y e biaha aki nan ta bay bin cu e intencion hopi serio pa bay cu e victoria y yega final. Deportivo Nacional tin hopi aña sin bay cu e titulo y e aña aki tin e intencion di bay cu esaki.

SV RCA ta un team jong y nan a demostra di por yega play-off door di bataya, asina dirigente di SV RCA a remarca. Nan ta cla un biaha mas pa bay cu e victoria. SV RCA a titula campeon 2015-2016 y tin tur intencion pa retene nan titulo di campeon di futbol division di honor di nos pais. AVB ta invita amantenan di futbol pa bin mira e weganan y pa apoya nan team faborito.

 

Frank Rijkaard dunando training na coachnan y muchanan di LIFIDA

alp_6402-customPresidente di Arubaanse Voetbal Bond, ing. Richard Dijkhoff a informa cu e astro di futbol Hulandes, Frank Rijkaard, a yega Aruba pa duna clinics na trainernan di ekiponan di futbol di division infantil y na e muchanan mes.

Frank Rijkaard ta un personahe hopi conoci den mundo di futbol internacional. Despues di un carera exitoso na Hulanda unda cu el a forma parti di seleccion Hulandes, entre otro el a bay forma parti di teamnan Europeo manera AC Milan y FC Barcelona. Den un lapso masha cortico el a sa di conkista dos trofeo di Europa cu e ekipo Barcelona y a titula campeon na Spaña na mas di un ocasion cu e ekipo Barcelona.

“Despues di un peticion di Jan Poets pa por invita Frank Rijkaard pa ta presente den su programa durante su award night como cu e tabata e persona cu a encurash’e pa sigui den e ramo di periodismo, cu mesora nos a haci tur esfuerso pa trece Aruba y alabes pa e tene cursonan special y clinics pa LIFIDA cu ta cay bao di AVB. A dicidi di organisa un curso di dos dia pa e coachnan y muchanan di U13 y U15,” asina Richard Dijkhoff a splica.

Durante e dos dianan aki, Frank Rijkaard a comparti su experiencia cu e diferente coachnan cu tin TC3. Frank Rijkaard a guia e trainernan y conhuntamente cu esey a duna curso na 60 mucha cada dia na Centro Deportivo Frans Figaroa.

E curso aki ta den cuadro cu e cooperacion cu AVB tin cu KNVB. Dos siman pasa otro astro di futbol Hulandes, Ruud Gullit, tabata na Aruba “y tin cu bisa cu e coachnan cu a haya clinicnan aki a keda super contento. Nan a siña masha hopi mes y esaki nos ta spera di Frank Rijkaard tambe,” asina Richard Dijkhoff a duna di conoce. E cursonan ta tuma luga dianan 7 y 8 di december.

Combina cu e cursonan e strea di futbol a pone dos dia riba su bishita di trabao pa asina e por descansa y gosa un poco di e hospitalidad Arubano. A hib’e diferente localidad na Aruba y a keda encanta cu nos isla. Frank ta bisa cu el a combina e trip aki pa duna e clinic y disfruta un poco di e solo y hendenan amabel.

Asina aki AVB a haci su maximo esfuerso pa por logra haya Frank Rijkaard na Aruba. Dor di e bon contacto y cooperacion entre e Presidente di AVB y e presidente di KNVB di Hulanda, a dicidi cu KNVB ta coopera pa Rijkaard por duna curso na e division infantil di AVB, algo masha di aprecia.

“Women’s Expo” di AVB a produci basta inscripcion

249a0950“No obstante e reto di awasero, asina mes un cantidad di mucha muhe hunto cu nan mayornan a yega Renaissance Convention Center pa asina haya informacion di e ekiponan cu tin un seccion femenino y pa probecha pa inscribi mesora”, asina Richard Dijkhoff, Presidente di Arubaanse Voetbal Bond a indica. E ekiponan a keda satisfecho cu e interes y awor lo sigui habri pa mas inscripcion di esunnan cu no a logra participa na e evento.

E evento aki ta e combinacion di un campaña cu AVB a cuminsa na Juli ultimo promoviendo mas futbol femenino na Aruba, den cuadro di un esfuerso cu tanto FIFA pero tambe CONCACAF ta haciendo pa encurasha mas participacion di e hende muhe den e deporte Rey. E intencion ta pa inicia di e mucha muhenan chikito caba, for di scol, pa asina nan logra desaroya y crece den e disciplina di deporte.

“E ekiponan di dama a keda hopi contento y a duna hopi atencion na e dia aki. Nos a haya masha bon comentario pa cu e dia aki y esaki ta mustra cu ta hopi mas ta bay tin pa e futbol femenino. Mi ta considera e evento como uno exitoso y directiva ta gradici cada un cu a participa”, asina Richard Dijkhoff a duna di conoce na final di e evento.

Tabatin diferente booth di tur e teamnan existente cu tin un ekipo femenino caba y otronan cu ta pendiente participacion pa cuminsa cu un team di mucha muhe entre 4 aña pa 15 aña. E ekiponan tabata SV La Fama, SV Bubali, SV Estudiantes, SV Estrella, SV Undesa, SV Britannia, SV Dakota, SV RCS y SV RCA.

 

Banda di esey tabatin diferente actividad durante e dia aki, manera show di moda cu pañanan di Athlete’s Foot y sin lubida e presentacion di Zumba na encargo di Rose Ann Ruiz.

No por keda sin menciona partnernan cu a haci e evento posibel, manera Compra Ltd, ASA y SIA, e dos academia di futbol riba nos isla cu a haci demostracionnan masha yamativo mes di tecnica nobo di futbol.

Varios orador cu a hiba palabra durante e dia, entre otro Frank Velasquez, un masahista di deporte cu a hala masha atencion den su splicacion y storianan den su carera.

Arubaanse Voetbal Bond por mira atras na un evento exitoso y cu sigur lo produci un cantidad di ekiponan nobo di mucha muhe, cla pa bataya y demostra tur mucha homber cu nan ta igual riba tereno di futbol.

Despues di 30 aña AVB ta tuma over Divicion infantil Lifida

alp_7997Diasabra mainta a tuma lugar e apertura oficial di e Campeonato Infantil Lifida di Arubaanse Voetbal Bond (AVB). Esaki a tuma lugar na Stadion Guillermo Prospero Trinidad na Dakota cu un stadion yen di mucha y mayornan cu a bin presencia e bunita y colorido defile cu a wordo organiza pa e dia aki.

E apertura aki tabata uno special pasobra despues di 30 anja AVB ta responsabel atrobe pa e divicion infantil di Aruba su futbol, mihor conoci Lifida. Sr. Jose Buchi Panama Wever a ser invita pero lamentablemente pa motibonan di salud no tabata por ta presente pa asina haci e traspaso oficial.

alp_8008Den e acto di apertura Minister di Salud y Deporte Dr. Alex Schwengle y Sr. ing. Richard Dijkhoff a haci e prome sake di bala den un acto simbolico pa cu e inicio di e campeonato aki, acompanja pa algun hungadornan di diferente teamnan.

Presidente di AVB, Sr. Dijkhoff a duna di conoce cu despues di 30 aña Arubaanse Voetbal Bond ta tuma e divicion aki atrobe. Tabata un trabao cu pa 30 aña a wordo desplega door di Sr. Jose Buchi Panama Wever, kende a dedica tur su tempo na e muchanan.

alp_7903E traspaso aki tin un reto cun’e pa motibo cu mester continua cu e bon trabao cu a wordo haci. AVB lo tuma e reto nobo aki pa implementa formatonan nobo di campeonato, formatonan actualiza pa maneha y dirigi futbol principalmente den e muchanan pa motibo cu esey ta e fundeshi cu bo tin cu construi mañan ariba dje, ing. Richard Dijhoff a indica.

Ya caba ta implementando diferente cambionan y mester bisa danki na e ekiponan cu a respalda AVB den loke ta e traspaso aki. “Awe por mira e placer cu tin den tur esnan presente pasobra nan ta mira cu tin cambio positivo na caminda, nan ta para tras di e cambionan aki. Nos sa di unda nos ta bin y unda nos tin cu bay y principalmente conhuntamente cu nos partnernan strategico con pa yega”.

alp_7811Conhuntamente cu Ministerio di Deporte AVB ta trahando duro, den bon comunicacion cu otro pa purba logra e metanan.  A remarca cu semper Lifida a haya respaldo di e mayornan cu ta keda veld pa apoya nan yiunan asina mustra nan interes y mustra e muchanan cu nan tambe ta hanja cu futbol ta un deporte sano y respetuoso.

A agrega cu den siman tabata tin conversacionnan andando y e intencion ta pa cada weekend di wega, dos wega wordo transmiti pa medio di un canal di television nobo. Una vez cu esaki keda concretisa, nos por cuminsa dentro di poco cu e transmicionan. Cu esey ta duna realce na un deseo grandi cu pa hopi aña tabata tin bao di e muchanan pasobra nan kier mira nan mes na television, wak nan potretnan den corant y tambe riba social media.

Den e dianan nos dilanti ta bay wak e positivismo y e direccion cu AVB, conhuntamente cu e clubnan kier hiba e divicion infantil aki.

alp_7835E campeonato infantil a cuminza diasabra ultimo cu varios wega den un formato nobo. Por ehempel den cada divicion, un organizacion por participa cu mas ekipo. Algo cu pa anjanan e clubnan tawata boga pa esaki y awe ta posibel. Un otro cambio cu a keda intruduci ta e formato cu na final di e promer round bo ta hanja dos liga separa cu lo bai discuti kende lo bira campeon den cada liga. Asina bo ta bay haya un liga cu e grupo cu ta mas avanza den futbol, esakinan lo bay competi cu otro y den otro liga, aki den bo ta bay haya esnan cu ainda ta den desaroyo compitiendo cu otro ariba nan nivel, e presidente di AVB a duna di conoce.

alp_7791Di su banda, Harvy Clement a indica cu e cambio aki ta mas tanto pa loke ta structura di futbol na Aruba. Ta di elogia y aplaudi Sr. Buchi Panama pa tur e añanan cu el a dedica na esaki. Awor AVB tin e reto di bay tume den su man y haci’e aun mihor ainda. E reto aki no ta di AVB ni di e clubnan so, pero di e mayor hunto cu e muchanan tambe.

Minister di Salud y Deporte, Dr. Alex Schwengle a manifesta cu esaki tabata un dia pa celebra futbol. “Un danki sigur na Lifida y sigur na Sr. Buchi Panama Wever cu semper a haci un tremendo trabao (…) Nos sa tawata sa cu lo yega un momento cu e cooperacion entre AVB y Lifida mester a wordo reenforza y hacie mas miho y awe nos ta mira e promer stapnan caba den esaki”.

alp_7863E mandarario a expresa tambe palabranan di  danki na AVB cu a realiza cu nan mester organiza y reorganiza nan mes miho den diferente nivel, esta maneho, structura y financieramente.

“Ta un placer pa ta akinan awe y wak asina hopi mucha cu ta haci e deporte aki. Vooral mi ta asina contento di wak hopi mayor cu ta bin na e apertura di e campeonato di infantil di Lifida”, Minister Schwengle a bisa.

alp_7850Ta trahando pa bay aumenta entradanan pa medio di Lotto pa Deporte y den dos aña lo aumenta esaki di un (1) pa dos (2) miyon extra. Ta sperando e momento pa concretiza esaki pa despues bay Parlamento pa presenta e documentonan y hanja e aprobashonan necesario. Si por crea 2 miyon mas pa deporte, esey sigur lo rekeri di un bon maneho y lo duna hopi mas fruto pa nos pais, Dr. Schwengle a duna di conoce.