Category: FA

RCA contra Bubali ta keda den un empate na cero gol

Diamars 12 di juni 2018 a inicia e playoff division menor , caminda cu den e di dos wega RCA cu a termina na di tres lugar a hunga contra di Bubali cu a termina na di cuater lugar riba tabla di posicion. E wega ta termina den un empate na cero gol. Proximo wega nan lo tuma lugar Diamars 19 di juni na CDFF pa 6:45pm Bubali vs RCS y pa
8:15pm RCA vs Britannia.

Britannia ta gana RCS 5-0 den inicio di Playoff Division Menor

Diamars 12 di Juni 2018 a tuma lugar na CDFF e inicio di e playoff di Aruba su Futbol Division Menor 2017-2018. Caminda cu a topa otro Britannia cu a clasifica como number uno contra di RCS cu a clasifica number dos riba tabla di posicion. Gol nan di Britannia a wordo anota pa  Jose Sophia 2x i Wesley Illes 3x.

La Fama ta gana Britannia 4-1 den e Playoff Division Mayor.

Dialuna 11 di juni 2018 den e di dos wega di e playoff Division Mayor a topa otro La Fama cu a clasifica como number 3 riba e standing contra di Britannia cu a drenta como number 4. Pa La Fama a score Egeld Jesus del Orbe #9 2X y Jerwin Mercera #8 2X y pa Britannia
a score Jan van Lennep # 15 1X.

Nacional ta gana RCA 3-1 den e Playoff Division Mayor

Dialuna 11 di juni 2018 a inicia e playoff di Aruba su Futbol Division Mayor SUB 17 den CDFF. RCA cu a drenta playoff invicto a topa contra di Nacional cu a clasifica como number 2 riba e standing. Pa Nacional a score Edward Clarissa #18 y Javier Jimenez #7. RCA a score Christian Kock #13 OWN GOL (autogol) y Kevin Peña #11. Proximo weganan lo ta Dialuna 18 di juni Nacional vs La Fama na CDGT pa 8or pm. Y Britannia vs RCA na CDFF pa 8or pm.

Britannia ta gana RCA 3-2 den playoff Division Damas

Diadomingo 10 di juni 2018 a tuma lugar continuacion di e playoff Division Damas den CDGT na Dakota. Britannia e actual lider di e playoff aki a topa contra RCA cu ta na di 3er lugar riba standing. Britannia den nan prome wega di e playoff aki a topa contra di La Fama y ta gana e wega cu e score 2-0. Den nan segundo compromiso ta gana di e propio RCA cu e score di 2-1. Britannia ta cai venci den nan di tres compromiso contra di e muchanan di Madiki Riverplate cu e score di 0-2. Esaki nan tabata e wega nan di e prome round. Den e di dos round ta gana di La Fama 2-1. Britannia vs RCA round 2.

Den e wega di diadomingo nos mester bisa e equipo di RCA a sali pone basta preshon riba nan contricante y crea algun oportunidad pero no por a concretisa, den un contra atake di e equipo di Britannia pa ser exacto na di 18′ di wega  ta logra habri e marcador cu un cabezaso di Mylene Croes #10 pa Britannia bai ariba 1-0. Na di 33′ di wega RCA ta logra empata e wega pa medio di e hungador  Lizanne Kelly #30 na un gol pa banda. Final di e prome tempo ta termina den un empate na un gol pa banda.

Den e segundo tempo e equipo di RCA ta sali pone basta preshon riba e equipo di Britannia. Na di 63′ di wega Jennifer Henao #11 di Britannia ta logra score pa bai ariba 2-1. Den un pifia di e keeper di RCA ta bai saca e bala pa su defensa y ta faya barbaramente ta duna Mylene Croes #10 e bala caminda e no ta basila y ta deposita e bala den net pa asina Britannia bai ariba 3-1 na di 73′ di wega. Den tempo extra 90+2′ RCA ta logra score pa corta ventaha na 2-3 caminda cu Lizanne Kelly #30 ta pone un otro gol riba su nomber. Final di e wega Britannia ta gana di RCA 3-2 y asina tambe ta clasifica pa e gran Final faltando un wega mas pa hunga contra di Riverplate cu lo tuma lugar diahueps 14 juni 2018 den CDGT pa 8or pm.

Riverplate ta gana La Fama 7-0 den playoff Division Damas

Diadomingo 10 di juni 2018 den e di dos wega programa pa e playoff 2017-2018 a topa otro Riverplate ocupando e segundo lugar cu 7 punto tras di Britannia riba e standing. Ta topa contra di La Fama cu ta na di ultimo lugar cu 1 punto. Riverplate den e prome round di e playoff aki ta cai venci den nan prome wega contra di RCA cu e score di 1-3. Den nan segundo wega ta sa di gana La Fama cu e score di 4-1. Den nan tercer compromiso ta gana di Britannia 2-0. Den e di dos round ta keda den un empate contra di RCA na 2-2.

Diadomingo Riverplate a bin pa sigura nan puesto pa e gran Final. Riverplate ta habri marcador tempran na di 2′ di wega pa medio di M Tromp #22 pa bai ariba 1-0. Na di 33′ di wega Jessica Rivero #11 ta amplia e score na 2-0. Despues tabata Ashley Douglas #27 ta score pa Riverplate bai ariba 3-0 na di 39′ di wega. Den e prome 45′ nan di wega ta e equipo di Riverplate tabata crea mas oportunidad y por a mira claramente cu a domina e wega.

Den e segundo parti di wega nos por mira cu e equipo di La Fama a cai completamente den defensa y asina duna Riverplate espacio pa por a aumenta e score, na di 71′ di wega ta M Tromp #22 ta bolbe score pa Riverplate bai ariba 4-0, na di 75′ di wega ta S Clarisa #4 ta score pa bai ariba 5-0. Despues ta M Tromp #22 ta bolbe score dos gol mas na di 81′ y 83′ di wega pa asina tambe Riverplate gana e wega cu e score di 7-0.

Final di e wega Riverplate vs La Fama 7-0, Gol nan M Tromp 4x Jessica Rivero 1x Ashley Douglas 1x y S Clarisa 1x. Y asina tambe Riverplate ta clasifica pa e gran final pa bai hunga contra di Britannia , faltando un wega mas pa hunga contra di e propio Britannia cu lo wordo hunga diahueps 14 juni 2018 den CDGT pa 8 or pm. Y na mes momento pero na CDFF lo topa otro RCA vs La Fama segun e schedule.

Estrella y Britannia a empata den un wega cu mas incidente cu gol, resultado 0-0

E wega aki ta crucial pa Britannia ya cu nan tin un punto so den tres wega di Play-Off, Estrella cu seis punto ta en busca di tres punto pa bira e lider nobo riba tabla di clasificacion. E prome wega entre e dos rivalnan aki cu Estrella a gana 2-0 a caba den e controversia di e elegibilidad di Jean-Pierre Van der Linden, causando controversia den futbol.

Britannia a cuminsa den atake, vooral riba e halanan, pa crusa bala den area penal, usando nan velocidad pa cu esaki. Nan homber principal cu ta hunga di links pa rechts y e motor di nan ofensiva ta Luis “Coco” Estrada, na minuut 8 caba Coco ta pone un bala den ‘doelgebied’ cu cuater hungado di e pumanan y Alexander Moreno a logra pone un cabes riba e bala despues cu e defensa di Estrella, cu ta sin nan dos estelarnan defensivo Pancho Croes y David Dubero, a gewoon “vriez”y para wak, chens grandi perdi pa Britannia, e bala a pasa na banda di e palo di gol.

Despues di varios minuut Estrella ta cuminsa nan ofensiva tambe y ta logra yegada peligroso na minuut 10 ora cu Jean Claude Farro ta hasi un pase precies pa Norviannel Naar riba man drechi cu Naar ta faya sorpresivamente, Van der Linden tambe tabata habri na man robes.

Britannia despues di un solido comienso a perde nan capitan Reinier Paraez pa lesion tempran na minuut 13 caba, un hungado clave den medio campo cu tambe por yuda den contencion y den atake. Un golpi duro pa Britannia cu e perdida di e hungado clave aki.

Un wega cu a cuminsa cu hopi promesa den e prome cuarto di wega, cu Britannia hungando cu un mas iniciativa y yegada, pero Estrella respondiendo tambe, a cambia bira un wega di hopi intercepcion y golpinan duro, e referee, cu tabata hopi imparcial, locual ta bon, pero a laga hopi encontronaso duro bai tempran caba, kizas pensando cu e no lo kier kibra e “flow” di wega? Pero asina riesgando cu e wega lo bira violento y peligroso. No ta prome biaha cu nos ta wak esaki, tin un pensamento cu pa ‘laga e hungado nan hunga’, pa e wega lora, mester interferi poco, pero na e momento cu tin menasa y golpinan duro y mal intenciona entre e hungadonan, ta tempo pa e referee interferi, e wega aki tabata rekeri mas intervencion tempran, mas ainda cu e rivalidad recien entre e dos cuadronan aki. E falta di interferencia aki mes ta causa e wega por bai para hopi mas debi na golpinan duro of hasta lesion nan. E anochi aki ta net contrario cu loke nos a wak den e wega e anochi anterior entre Dakota y Nacional, un ehempel di con un wega mester wordo maneha pa e referee.

E golpinan mal intenciona a influencia e fluides di e wega aki, cu na cierto momentonan tabata hopi bon, pero nada excepcional a pasa den e ultimo parti di e prome tempo, halftime a bay aden sin gol.

E segundo tempo a cuminsa cu bon inciativa ofensivo di tur dos ekipo, un wega di banda pa banda atrobe cu algun yegada, pero atrobe mas e wega sigui mas inpreciso e ta bira. En bes cu e hungado nan ‘hunga bala’ mane e aficion mes ta pidi for di tribuna, toch ta sigui un cierto ambiente tenso den aire.

Estrella ta haya un bon oportunidad cu un tiro liber di Joel Geerman na minuut 56 unda portero di Britannia Kendrick Dania ta interveni bon pero despues e rebote ta cai riba cabes di Jean Pierre Van der Linden pero e ta cabesa net den man di portero. Britannia tambe ta haya un bon chens den pia di Rhafotsky Godoy den doelgebied na minuut 59, for di un bon hugada cu a cuminsa cu Coco Estrada y un pase di Ulisis Nunez, pero Godoy ta tira over di gol. Na minuut 61 Britannia atrobe cu penetracion na banda robes, un hugada cu a bay sin wordo questiona, ora cu Sebastian Montoya a wordo deriba den area penal unda defensor di e Naranjadanan Alex Hassel realmente no a touch e bala pero si e pia di Montoya, Britannia no a protesta mucho. Ta Britannia tabata purbando mas, den e siguiente minuutnan ta nan tabata penetra na gusto, pero loke a perhudica nan tabata e decision nan di ultimo momento, p’asina hunga nan miho opcion nan dilanti gol, si Britannia a hasi esey nan lo tabata den un miho predicamento.

Estrella y Norvianel Naar finalmente ta responde Britannia na minuut 65 cu un hopi mihor yegada riba e gol di e Pumanan. Naar ta hustle na banda robes forsando Dania pa sali for di su porteria dal e bala cu a bai for di doelgebied pero Naar cu a keda cerca mirando un chens a gana e rebote for di Dania pa despues hasi un tiro den gol pero salba pa e cabes di Carl Geerman. E wega awo ta realmente di banda pa banda cu bon yegada di ambos cuadro. Na minuut 67 ta turno atrobe pa Britannia penetra profundo den area di Estrella unda Montoya ta drenta area penal na man robes y tira riba gol pero portero Navarro ta salba e dia pa Estrella, e rebote ta cai riba pia di Nunez na banda drechi cu bon chens y e portero abou toch ta tira mucho halto, e wega mester tabata 1-0 pa Britannia.

Britannia cu dos yegadanan mas den area penal di Estrella sin resutado, cu ya ta birando dimas, por ehempel na minuut 69, despues cu referee no a fluit un falta duro y duidelijk riba Van der Linden di Estrella, Lionel Tromp di Britannia ta haye su so dilanti gol cu portero, e no ta logra domina un bala simpel (sin defensa rond) unda e por a chip e bala den gol, pa ni un minuut despues Derwin Donata for di un pase di Coco Estrada atrobe dilanti gol ta kop di biaha na banda en bes di baha e bala cu pecho pa un miho opcion di tiro cu niun defensa riba dje.

Apesar cu Estrella na e punto aki no a produci mucho atake consistente cu penetracion, ta Phaedrick Baromeo na minuut 84 ta los un tiro potente di mas cu 30 meter riba gol di Kendrick Dania, por cierto no mucho riba di e porteria, na e punto aki ambos ekiponan a cuminsa hasi mas tironan di leu pero sin resultado, e pianan ta parce no por a duna mas pa forma atakenan sostenibel.

Na minuut 87 desafortunadamente Baromeo a sali for di e wega y tambe e resto di e campeonato aki despues di a fractura su enkel y posiblemente afectando ligamento, den un encontronaso chikito, sin ningun mal intencion, mas bien un ‘fifty fifty’, cu Nunez di Britannia, por wel di ta tambe cu e yerba artificial den mal estado por a contribui cu e situacion dificil aki.

Ainda na minuut 92 Sebastian Montoya a haya un otro chens solido pa gana e wega pa Britannia, cu tabata e miho ekipo den e wega aki, e tiro duro di Montoya na banda robes a wordo rechasa pa portero Navarro cu tabatin un tremendo wega, y asina salba su ekipo di Santa Cruz di un derota sigur.

Asina e partido aki ta yega su final unda cu no tabatin gol, tabatin na dado momento hopi incidente, pero e hungadonan a sabi di calma despues, wega a sigui, Britannia tabatin miho yegada y chensnan cla. Lamentabel ta e perdida di Baromeo na lesion serio, nos ta manda deseonan di pronto recuperacion pa gran talento aki. Britannia tin awo 2 punto, Estrella ta keda cu 7 punto den di dos luga riba tabla. Nos ‘man of the match’ ta Alex Hassel di Estrella pa su empenjo den defensa y liderasco tambe pa salba su ekipo di perde punto.

Dakota a parti punto cu Nacional den un bon partido, resultado final 2-2.

Dakota a enfrenta Nacional pa inicia e di dos rond di Play-Off 2017-2018. Nacional ta lider riba tabla di posicion te cu awo cu shete punto, mientras cu Dakota tin tres punto den di tres luga.

E wega a cuminsa cu Dakota tirando bala dilanti, purbando di desekilibra e linea defensivo di Nacional, vooral riba linea, unda Nacional ta mas vulnerabel. Ora cu Nacional haya e bala pa bay den ofensiva nos por mira cu Dakota a aplica bastante presion individual riba nan tres piesanan cardinal. Paul Nickenson a press Kenroy Ranger dunand’e poco espacio, mientras cu Ferdinand Robert a hunga riba e ganado di Balon d’Or  Devis Oliveros, y Valdo Leocadio tabatin man yen cu Leroy Oehlers primordialmente, si encaso nan scapa nan ‘man-dekking’, semper tabatin un otro pa tuma over.

Dakota tabata dominando sigur pa e prome mei ora, pero, por sinti cu Nacional di un ora pa otro por scapa y anota, Nacional ta un ekipo disenja pa no perde! Un cos cu ta hopi efectivo di e trio di hungado aki di Nacional den mencion, ta nan disciplina, pasenshi y condicion fisico, y pa no lubida nan wega den concentracion.

Yegada tabatin hopi pa Dakota, e punto ta kiko pa hasi despues cu a yega den e area di candela ey? Pa logra resultado, cual ta anota gol. Dakota hungando hopi bon cu un tactica di wega casi perfecto y den concentracion. Nan chensnan tabata yegando tambe, na minuut 11 un chens cla den area penal pero Michael Irausquin ta tira halto riba gol. Na minuut 13 un hugada cu mester tabata un penalti pa Dakota ora cu Sherman Monticeuex ,den un di su hopi atakenan riba hala drechi, a wordo tumba den area penal pa Leonardo Colmenares di Nacional. Nacional na su turno a hasi un p[rome penetracion di peligro husto despues di e hugada controversial ey mes unda Dakota mester a haya un penalti, Nacional a pusha e bala dilanti te den pia di Ranger mientras cu e hungadonan di Dakota tabata reclamando, Nickenson tambe a perde su concentracion temporariamente y Ranger a los bay, Nickenson mes mester a salba e situacion ey na ultimo seconde.

Mei mei di tur e posesion di bala y hopi penetracion di Dakota tabatin momentonan tambe di desperdicio, por a hasi hopi miho ainda. Asina mes e punteronan riba e halanan, Ricky Hodge y Monticeuex mes, ta e armanan principal den e wega velos di e Abejanan. Leomar Croes tambe tabata efectivo den su wega facilitando e dos punteronan menciona y Robert Francis den delantero central. Ta na un momento asina na minuut 22 cu Croes a kibra na banda robes, pa despues crusa e bala halto pa Francis den area penal, unda Francis riba un volley ta anota e prome gol di wega pa Dakota bay ariba 1-0, mereci pa nan dominio te na e punto ey. Dakota no ta para y mas chens a yega; na minuut 31 unda e incansabel Ricky Hodge ta penetra na banda drechi di area penal pero portero Jose Cruz cu un salida rapido ta preveni Hodge ‘loft’ e bala riba su cabes, den e rebote, Hodge mes a bay buske bala te na linea pa crusa e bala na otro banda pa Leomar Croes, cu un bon tiro pero na ultimo seconde Deffery Banton ta hinka su punta di sapato pa desvia e bala, salbando su ekipo di bai atras 0-2.

Apesar di e dominio di Dakota, e Dragon nan cu no ta drumiy  ta haya un chens cu no mucho cla, pa anota e gol di empate na minuut 32. Despues di un pifia di e defensa central di Dakota Ezra Bosnie, cu ta cobra un bala sin rumbo den midveld riba cabes di Valdo Leocadio, cu tabata warda pa un oportunidad, a kop pa Ranger, cu awor tabata na banda drechi banda di linea, Ranger cu dos Dakotero riba dje a los un cruse imposibel den area penal, unda cu Nickenson di Dakota a logra rechaza pero no mucho leu di Oliveros cu tabata penetrando, Nickenson, sin ayudo, a deck Oliveros, pero cu tur presion toch Oliveros a logra los un tiro imposibel pa fusila portero Kaarsbaan di Dakota pa empata e wega 1-1.

Dakota ta bolbe haya dos chens mas cla pa pika dilanti; na minuut 36 ora cu Francis a penetra den area penal di Nacional cu defensa y portero saliendo riba dje no a wak Hodge habri na banda drechi y asina ta sigui dribbel y perde e bala, casi mesun situacion a pasa na minuut 40 unda Monticeuex a penetra y hasi un tiro sin rumbo riba gol mientras cu Hodge atrobe tabata habri, cu bon chens pa anota si el a haya e bala. Na minuut 41 Bosnie a hera di hasi un pifia atrobe cu un pase malo den su mesun area penal pero a scapa e biaha aki, Nacional no a probecha.

Con ironico cu net den e ultimo cinco minuutnan cu Nacional a cuminsa tin mas iniciativa, Dakota a logra anota atrobe net prome cu e pitazo pa halftime, un vindicacion pa Ezra Bosnie ya cu su pifia a conduci na e gol di Nacional mas tempran. Bosnie mes a tuma e riendanan pa anota e gol di bay ariba di cabes for di un tiro di skina bon cobra pa Ricky Hodge.

Na cuminsamento di e segundo tempo nos a mira mas di mesun cos bon nan di e prome tempo, un wega di banda pa banda, competitivo sigur pero cu deportivismo, un bon arbitrahe sin duda cu a tene e wega aki na un nivel superior. Nacional en busca di e empate tempran y na minuut 46 di segundo tempo caba, Oliveros a los for di su defensor na man robes di e area penal, pa hasi un cruse perfecto pa Ranger cu un volley cu ta dal den tubo riba cabes di Kaarsbaan.

Nacional a sigui cu bon posesion di bala, dominando Dakota teritorialmente, dos hungado cu a cuminsa tuma mas iniciativa y liderasco di e ekipo nortero ta Jean Pierre Heyden y Defferey Banton un defensor cu a cuminsa pusha dilanti tambe. Pa ora cu Monticeuex, Bosnie, Johnson Rincon, Michael Irausquin y Croes a sali foi wega, Dakota ya no tabata e mesun potencia cu nos a wak den prome tempo, no cu nan a baha nan rendicion,ta parce mas cu nan a purba defende e resultado, dunando e norteronan e iniciativa. Nacional tambe a subi nan tempo, adapta otro formacion y tactica, y laga nos no laga afo ‘intensidad’. Toch e intensidad ey cu ta marca di Nacional casi a bay un poco dimas den algun instancia pero nan a logra mantene na un nivel aceptabel. Toch referee principal a hala atencion duro di algun hungado, manera ta e caso di Edward Clarissa di Nacional na minuut 58, unda e arbitro a bin te mei mei di e hungadonan y pone order verbalmente, esey a yuda tene e wega grandi aki na un nivel deportivo.

Dakota no a sigui ataka Nacional y tambe nan a baha nan pressing halto, retrocediendo un poco, Nacional asina a cuminsa pusha dilanti, esey ta hunga cu candela. E gol di empate di Nacional a yega na minuut 73 den dos toke for di patras; Heyden ta cuminsa e hugada for di hopi patras di midveld, un pase largo ta yega te den pia di Oliveros, over di tres of hasta cuatro hungado di Dakota, hayando su mes habri pa tira for di pafo di area penal banjando e portero na banda robes, un gran gol for di un hungado cu tabata mas tempo den olvido den e wega aki, pero esey ta Devis Oliveros, e por hasi algo di nada diripiente, posiblemente ainda e miho delantero riba e isla aki.

Dakota ta responde, pero Nacional no ke tende y ta sigui hasi locual nan a bin ta hasi den e di dos tempo, asina nan ta haya un chens grandi atrobe na minuut 80 ora cu Valdo Leocadia, un gran hungado cu bala y hopi biaha sin bala, clave pa controla un wega, ta tuma un tiro liber na banda robes cu ta dal den palo di gol di Dakota, e wega ta keda 2-2. E aspecto invisibel pero valioso di Valdo ta cu e ta domina e medio-campo, esey ta su ‘domein’, esey ta e area cu Dakota (y otro ekiponan) semper a evita contra Nacional. Ta for di medio campo Nacional a cuminsa domina den e di dos tempo aki, ta e trabou duro ey di Valdo ta facilita Heyden pa subi mas y pusha su cuadro den atake, ta p’esey Nacional a empata e wega y hasta por a gana tambe.

Dakota ta haya mas chens toch, na minuut 85 Ricky Hodge ta drenta area penal y ta los un tiro cu portero Cruz ta atrapa den un manera sensacional. Na minuut 87 atrobe ta Nickenson e defensor di Dakota ta baila tres defensor di Dakota pa hasi un pase pa Albert Francis cu un gran chens pa tira pero Cruz atrobe ta salba Nacional, Francis por a tuma su tempo pa un miho opcion di tiro. Na final di wega Dakota a recupera e ‘mojo’ di e prome tempo, pero ‘a little too late’.

Nacional ta contento cu e punto aki mientras cu Dakota mester ta desapunta cu e gran wega cu nan a hunga cu ta sinti mane un chens perdi. Nan a resolve con pa hunga Nacional, dicon nan no a cabe? Nacional ta keda di lider riba tabla cu 8 punto, Dakota cu 4 punto, ainda cu speransa pa bay final, paso ainda tin hopi chens, pendiente di nan weganan contra Estrella y Britannia, nan destino ta den nan mesun man, esey no tin duda. Nos ‘man of the match’ ta uno hopi sera; e por a bay pa Oehlers y Nickenson di Dakota of Valdo y Oliveros di Nacional, pero nos a scohe Jean Pierre Heyden pa su labor patras, dilanti, y henter cancha, su constancia y e hecho cu el a pusha su ekipo dilanti pa logra un resultado cu ta consolida Nacional na prome luga.

United y Brazil jrs ta parti punto den playoff Division uno.

Dialuna 4 di juni 2018 a sigui e playoff di Aruba su Futbol Division uno. Caminda cu den Compleho Deportivo Guillermo P Trinidad a topa otro e actual lider di e playoff aki cu ta Brazil jrs contra di United cu ta na di dos lugar. Brazil jrs den dos salida cu dos victoria cu un total di 6 punto, y na e otro banda United cu ta na di dos lugar cu den dos salida cu un total di 4 punto, cu un wega gana y un wega empata, y tambe un wega pendiente cu a wordo cancela cu e propio Brazil jrs.

United den e wega aki a bin por la goma caminda nan a sali brabo pa bai cas cu e tres punto nan disponibel. United tabata mas den atake y a crea mucho mas opotunidad cu nan contricante. Na e otro banda Brazil jrs no tabata e equipo cu nos conoce manera nan a hunga nan ultimo wega. Den un contra atake di e equipo di Brazil jrs nan ta haya un penalty na di 12′ di wega ,caminda cu e capitan Owen van der Wijne #9 ta logra habri e marcador pa Brazil jrs bai ariba 1-0. United ta sigui pone preshon y tabata na di 32′ di wega caminda cu den un atake bala ta dal den man di un defensa den doelgebied caminda cu refree ta pita penalty. Michael Molinares #7 ta cobra cu exito pa empata e wega na un gol. E prome 45′ nan di wega ta finalisa den un empate na un gol.

Den e segundo tempo ambos equipo ta sigui preshona , pero no por a score. E hungador #15 di Brazil jrs ta ricibi kaarchi geel pa un hugada poco bruto. Na di 75′ di wega e hungador #12 di United ta wordo expulsa for di wega. Final di e partido United vs Brazil jrs 1-1. E tabla di posicion ta keda cu Brazil jrs ta keda na prome lugar cu 7 punto, sigui pa United cu 5 punto , na di tres lugar FC Porto cu 4 punto y sigui pa RCS cu 0 punto.

Proximo wega lo ta Diamars 5 di juni den CDGT FC Porto contra di RCS pa 8or pm.

Dakota tin speransa ainda den Play-Off despues di a gana Britannia 2-0

Dakota enfrentando Britannia den un wega di suma importancia pa nan sobrevivencia den e Play-Off 2017-2018. Britannia tin un punto den dos wega mientras cu Dakota no tin punto ainda den e Play-Off aki. Un empate lo no ta di mucho ayudo ya cu e dos ekiponan den top di tabla tin 7 y 6 punto caba cu e di dos rond den cuminsa e siman venidero.

E wega tabata hopi pareu for di cuminsamento, pero niun di dos ekipo tabata forma atakenan sostenibel, no tabata tin hopi yegada di claridad ni dominio di bala di ningun di dos. Pa e prome 20 minuut e wega tabata wordo hunga mas tanto den medio-campo unda e dos ekiponan tabata perde e bala hopi lihe.

Na minuut 22 Dakota tabatin un atake significativo ora cu Ricky Hodge a hasi un sprint cu bala riba e hala drechi pa despues hasi un bon pase pa Fercand Sophia, pero e bala a desvia un tiki pa scapa for di Sophia, cu sigur sigur lo tabatin hopi chens di anota, mirando cu e lo tabata su so dilanti e porteria di Britannia. Despues Hodge a bolbe hasi mesun atake un tres minuut despues riba hala drechi pa despues crusa pa Albert Francis cu sorpresivamente a posiciona su mes den off-side, cu gol habri, un lapso di concentracion eynan di Francis cu a costa Dakota un gol pa bay ariba.

E wega no tabata mucho bistoso den e prome tempo, tabatin hopi inconsistencia den e pasenan, causando cu e cuadronan tabata perde e bala masha hopi mes, ningun di e dos ekiponan tabata capas di mantene un dominio di bala, e wega na un dado momento tabata mas un wega di ‘ping pong’.

Tabatin excepcion nan si, mane e atake controla cu a yega den pia di David Castro riba hala robes, lagando dos defensor di Dakota atras pa despues hasi un bunita cruce peligroso unda Seb Montoya a haya un bon chens pero despues di un rebote y un tiro cu a bay den gol pero referee a fluit cu tabatin un falta contra un defensa di Dakota den area penal, prome cu e tiro ey, un hugada cu a cuminsa di patras den area di Dakota. Gana tabatin di ambos banda, ta precision tabata falta. Asina tambe halftime a bai aden cu e marcacion 0-0.

Manera cu e di dos tempo a cuminsa por a realisa cu e wega a cambia un poco, ta logico, paso ambos ekipo mester gana pa drenta den contencion di e Play-Off aki, esey ta forsa nan pa sali busca gol, e hungadonan a cuminsa hasi nan mes liber, wega a cuminsa habri, chensnan di gol di calidad a cuminsa yega. Dakota a cuminsa hasi mas pressing ariba tambe, purbando di desekilibra Britannia, tratando di crea chens.

Dakota a cuminsa haya mas chens debi na nan pressing halto, y atakenan cu resulta di esey, unda Ricky Hodge hunto cu Sherman Monticeueux y Keannu Maduro cu a drenta despues den wega sigur tabata e catalystanan pa eherce esey, Leroy Oehlers tambe tabata clave pa a sali di patras pa yuda den atake. Awo cu mas posesion di bala, toch Dakota tabata purba tira bala dilanti y core, pero pakiko no? Nan tin velocidad pa cu esey. E intensidad ey ta pusha Britannia mas patras tambe, causando cu hopi di nan atakenan tabata un stap tras di e linea defensiva di Dakota, unda cu por wak cu e Pumanan tabata bon pa tres cuarto di cancha pero tabata falta e ultimo penetracion pa crea chens di gol.

Dakota alfin a logra crea e chens pa anota e prome gol di wega na minuut 69 unda cu un penetracion di Oehlers mes y un tiro cu a rebota riba un defensa a bay cai den pia di Hodge na banda robes den area penal na careda ta manda un tiro potente pa bora e net di Britannia pa hasi e wega 1-0 pa e Abehanan.

Britannia ta reacciona pero esey kiermeen tambe sali cu mas hende pa ataka, creando buraconan den nan defensa, simplemente un wega di ‘accion ta reaccion’. Britannia ta purba controla bala, circula miho, bahando e ritmo rapido di e wega pa facilita nan mesun wega, e problema cu esey ta cu nan ta atras den anotacion, Dakota awor por just warda, press, y horta bala pa tira dilanti. Futbol ta un wega simpel pero a veces e por ta tambe mane un wega di ahedres.

Apesar cu di pronto Dakota cu bentaha y mas dominio, y mas yegadanan di peligro, asina mes Britannia a haya un chens di oro pa empata e wega aki, na minuut 82 despues di un penetracion efectivo di Coco Estrada riba hala drechi y un cruce manera ta cu man riba cabes di Derwin Donato cu a hasi tur cos corecto pero e bala a gewoon ‘spin’ bai na banda di gol, e wega mester tabata 1-1 pa papia berdad.  Pero Dakota na su turno net un minuut despues a haya un chens morto pa amplia e score ora cu Liomar Croes a haye dilanti gol cla pa fusila, pero portero Kendrick Dania spectacularmente ta salba Britannia e momento ey.

Wega a bira hopi bon mes den e ultimo minuutnan, pero ta Dakota a bolbe anota ora cu na minuut 85 den un penetracion den area penal di Sherman Monticeuex na banda drechi y un pase cortico pa Keannu Maduro cu ta los un tiro violento cu Dania ta saka cu su pia pero ta rebota afo na banda robes riba pia di Ricky Hodge cu tabata penetrando pa anota e gol pa caba cu e speransa di Britannia, Dakota  ariba 2-0. E salida di Sanyica Godoy na minuut 87 pa via di su di dos carchi geel a caba di saka e ultimo aire di e Pumanan.

Dakota a gana bon, den un wega cu a bin ta mehora, cu bon deportivismo, y hopi bon trabou di referee awe nochi. E victoria di Dakota a bin na un momento crucial pa nan prome tres puntonan, ya cu nan tabata kedando pafo di e Play-Off sin punto, pero awo por respira cu mas speransa pa cu nan chensnan di bay final cu ainda ta na bida. Britannia a keda cu un punto so, y mester gana Estrella den nan siguiente wega di Play-Off pa sigui cu chens pa bay final. ‘Man Of the Match’ tabata sin duda Ricky Hodge, pa su labor cu bala y sin bala, a catalyst di e ‘Amarillonan’ awenochi, hunto cu Leroy Oehlers cu tambe merece mencion.