Connect with us

Division Honor

Brazil Juniors ta impresiona cu nan fisico y velocidad pa gana Estrella 2-0 den un bon partido

E norma den futbol ta cu ekiponan cu promove for di Division Uno ta haya hopi contratempo den e division mas halto di nos futbol, te cu awo den e di dos siman di campeonato 2018-2019, Brazil Juniors, e benjamin nan di Division Honor, ta desafiando e norma aki.

Den siman 2, e ekipo di ‘pariba di brug’ a enfrenta Estrella den Stadion G.P.Trinidad. Un partido cu a cuminsa manera a spera, un Estrella cu posesion di bala cu bon circulacion y toke di bala. Estrella tabatin mas yegada den e prome parti di e wega, Brazil en cambio a warda patras cu un bon wega di defensa y de bes en cuando a logra hasi contra atakenan bastante efectivo, vooral den e di dos parti di e prome tempo. Estrella tabatin algun yegada den area penal di Brazil, pero hopi di e tironan di peligro tabata di distancia, unda cu e portero di Brazil, e hoben Marvin Irausquin, a sobresali hopi cu bon intervencion y salbadanan pa mantene su porteria limpi.

Estrella ta un ekipo bastante diferente cu anja pasa, nan tin hopi falta di algun hungadonan clave cu no t’ei presente e biaha aki pa diferente rason nan, sea lesion of otro, manera entre otro; “Power” Hassel den medio campo di contencion, David Dubero den defensa, y Phaedrick Baromeo den medio campo ofensivo y atake! Cu hopi hungadonan hoben Estrella ta mas bien un ekipo den transicion, den “rebuilding” mane den palabranan di nan capitan Pancho Croes.  Den nos padece toch Estrella a mustra algo di e bon organisacion riba cancha mane campeonato pasa unda nan a logra gana Copa Betico Croes y tambe yega “Play-Off”.

Brazil ta un ekipo hoben cu hopi “spirit”, vigor y velocidad; nan wega a cuminsa demonstra y tuma efecto den e di dos parti di e prome tempo. Na minuut 27 Kenroy Ranger den un penetracion den area penal di Estrella, despues di un contra-golpi descumunal, a wordo tumba den area penal pa un pitaso di penalti; Ranger mes a skop e penalti pa anota e prome gol di wega pa duna Brazil bentaha di 1-0.

Estrella a sigui cu nan wega conservativo, cu bon posesion, pero nan yegadanan no tabata sorprende e bon defensa di Brazil y ora nan a tira di afo, Irausquin tabata bon posiciona pa defende su porteria. Asina tambe e prome tempo a culmina cu Brazil Jrs. ariba den e anotacion.

Den e di dos tempo Estrella a cuminsa cu mas intensidad, e wega a haya un tono mas fisico tambe, unda carchinan di referee a cuminsa sali, tension tambe a crece, ta competencia toch!

Na minuut 47 Estrella ta haya un tiro liber, Pancho Croes ta cobra di distancia cu un tiro fuerte y peligroso pero Brazil ta salba despues cu nan portero Irausquin a interveni oportunamente. Na minuut 51 atrobe un otro accion di Irausquin ta mantene e bentaha minimo di Brazil riba e Naranhadanan di Santa Cruz.

Pero futbol ta stranjo tin biaha y ora bo no probecha otro lo hasie sigur; asina na minuut 64 e estelar hungado di Brazil Jrs. Owen Van Der Wijne a penetra den area penal di Estrella unda el a wordo tumba pa un pitaso di penalti pa referee Eugene Farro. Van Der Wijne mes a cobra e penalti pa duna su ekipo bentaha di 2-0.

Estrella a sigui cu iniciativa, mas awo cu nan tabata atras den e resultado, cu mas tironan riba gol, mas di distancia si, pa Pancho Croes y Anwar Kock entre otro, un bala riba lata, of tambe salba pa Marvin Irausquin, nan a purba pero sin resultado, te cu minuutnan final Estrella tabata forsando y buscando resultado, pero tambe mester remarca cu Brazil a sigui ta peligroso den nan wega di contra-golpi, hasta na final di e wega, por ehempel Ocean Samson cu a drenta di substituto den di dos tempo a hera hasi e wega 3-0 na minuut 90+2, net prome cu e pitaso final.

Un bon wega, limpi, pero tenso te na final, cu bon arbitrahe sin duda. Brazil Jrs. ta mantene invicto cu 4 punto, cu dos “clean sheets”, y ta lider ‘provisional’ di e campeonato cu ainda ta den su etapa di comienso, toch remarkabel pa un ekipo cu a caba di ascende. Estrella ta keda cu un punto, trahando riba nan transicion. Nos “man of the match” tabata e portero hoben di Brazil; Marvin Irausquin pa su bon actuacion bou di e tres palonan, masha pabien!

Click to comment

Leave a Reply

Your email address will not be published. Required fields are marked *

More in Division Honor