Connect with us

Division Honor

River Plate y RCA a keda empata 2-2 den e ‘Derby di Capital’ den un wega tenso pero no bistoso

E prome encuentro di e ‘Derby di Capital’ di e campeonato actual entre River Plate di Madiki y RCA di Solito tabata un “affair agri-dulce” pa fanaticonan. Un wega cu a cuminsa cu bon intencion, inocente y deportivo, pero cu a cambia bira hopi slordig, tenso y bruto pa ora cu e pitaso final a zona.

RCA ta biniendo di gana nan prome wega di e campeonato aki y River Plate ta bini di un empate. RCA a tuma iniciativa inicial den e wega aki y a cuminsa tira den atake di biaha, sabiendo tambe cu River ta un ekipo miho ora nan ta atakando y no defendiendo. E prome gol a cai na minuut 4 caba den pia di Frederick (Ronald) Gomez di RCA despues di un mal comunicacion y pifia den defensa di River, Gomez ta probecha y ta touch e bala den net pa RCA bai ariba 1-0 asina tempran.

RCA ta sigui tira dilanti despues di nan gol, tratando di tene e bala for di River, purbando tambe pa probecha ya cu River no por a organisa nan mes adecuadamente pa cuminsa ataka, pero mane nos a bisa River no ta un cuadro cu por sinta defende atras, nan mester di e bala unda nan tin mas forsa. RCA ta bolbe haya chens grandi pa anota atrobe na minuut 7, pero Gomez ta tira net na banda. River en cambio ta hunga wega di contra-golpi, ya cu RCA tabata controlando medio-campo tambe, pero e wega aki a yuda nan cu algun yegada propio.

Apesar cu RCA tabata comandando e tempo di wega y posesion di bala, toch River a cuminsa haya mas chensnan despues di e prome cuarto di wega. RCA mas bien tambe a sigui cu oportunidad nan di gol y penetracion pero ningun di dos ekipo tabata skerpi den nan ehecusion riba gol. E wega tabata mas bien uno di hopi “slordigheid”, un wega di hopi rebote y intercepcion, inconsistencia. Pa ora e prome mei ora di wega a yega, ya e velocidad y intensidad di wega a baha hopi caba. Asina mes River a probecha di un pifia den defensa di RCA na minuut 30 p’asina Leonuar Croes anota pa e empate 1-1.

Despues di e gol di River e wega a “slowdown” mas ainda mientras cu skopmentonan a cuminsa incrementa. Ta den e momentonan ey mes na minuut 33, Ronald Gomez di RCA ta scapa riba hala drechi y ta pone e bala den net cu un bon disparo pa duna RCA bentaha di 2-1.

River ta contesta di biaha y net dos minuut despues di e gol di RCA na minuut 35, ta Leonuar Croes atrobe ta hasi e wega 2-2. River despues ta sigui cu iniciativa y posesion di bala pa varios minuutnan, RCA mas bien a bai mas den un rol di contra-golpi, cu a resulta di ta hopi peligroso pa River cu tabata tira duro dilanti lagando buraco atras. Na final di e prome tempo mei mei di weganan bruto referee Bedoya ta pita pa halftime.

Den e di dos tempo RCA a cuminsa atrobe den atake, mescos cu inicio di e prome tempo, purbando di sorprende River, hortando e iniciativa di wega, cu algun yegada pero mas tanto cu tironan di afo, vooral di Jean Luc Bergen, a demostra di por causa problema pa River, toch RCA no a logra concretisa apesar di a purba pa largo tempo. Pa ora a yega e punto mita di e di dos tempo ya e wega a bolbe cai hopi den calidad y precision, mas bien e wega a bira “aspero” y negativo cu hopi discusion y skopmento, carchinan a cuminsa cai atrobe pa ambos ekipo, hasta pa hungadonan riba banki, referee a hasi su best pa controla e situacion, pero e atractividad di futbol si no tabata presente. Pa ora a yega e ultimo cuarto di wega, e bala tabata lora mas rond di e circulo central, un toma y dame rond di mid-veld cu algun tironan riba porteria pa ambos ekipo pero sin por a causa gran peligro. Un tipo di “stalemate” te cu e pitaso final y e empate entre e dos ekiponan.

Resultado final anto River Plate 2 – RCA 2, e ekiponan a parti punto. Ronald Gomez di RCA tabata nos ‘Man of The Match’. RCA a keda cu 4 punto riba tabla y River Plate cu 2 punto.

Click to comment

Leave a Reply

Your email address will not be published. Required fields are marked *

More in Division Honor