Connect with us

Division Honor

Britannia ta tuma liderato di campeonato nobo despues di a gana La Fama 3-0

Photo: Ⓒ Futbol Aruba

E ekipo di SV Britannia ta biniendo di gana Bubali 4-0 den e prome fecha di campeonato Division Honor y a keda di wak ta con nan lo midi contra La Fama e siman aki, e ekipo berde a bin di perde den nan prome wega contra RCA.

Den e parti inicial e wega aki tabata bastante pareu, pero na un velocidad modesto sin momentonan di sorpresa. Ta te despues di e prome cuarto di wega Britannia a cuminsa organisa nan mes un poco miho cu ayudo di Luis Estrada den medio-campo, esey combina cu e wega intenso di Daniel Linscheer, cu tabata enfrentando su ekipo bieuw, a duna Britannia un poco di bentaha.

Asina mes e yegadanan di Britannia no tabata inclui tironan mucho peligroso pa e porteria di La Fama, cu a defende bon te na e punto ey. La Fama mes a hasi un di nan prome atake serio te cu rond di minuut 27, y for di eynan a horta e iniciativa di Britannia, pero sin por concretisa.

E wega despues a bira uno hopi “nonchalant”, pero husto den e momentonan ey, ta Daniel Linscheer a sorprende cu un escape cu bala y a los un tiro pa anota e gol di bai ariba na minuut 31, Britannia 1 La Fama 0.

Britannia a inspira despues di e gol di Linscheer cu a dunanan un injeccion bastante necesario y nan a domina e wega, cu algun ocasion di peligro riba gol di La Fama, tres chens bon consecutivamente den pia di Linscheer mes, Walter Rangel y Lionel Tromp pero sin pone bala den net, La Fama en cambio a opta pa purba algun wega di contra-golpi, pero nada serio a pasa te cu halftime cu e bentaha minimo di Britannia.

La Fama a organisa nan mes mihor den e di dos tempo y a pone mas presion riba e defensa di Britannia, e ekipo Savanetero a insisti y a sali busca e gol di empate. Te cu minuut 70 ainda por bisa cu La Fama tabata serka di e empate, kizas mereci pa nan esfuerso, pero ta net den e momentonan aki, Britannia den un contra-atake, Luis “Coco” Estrada ta hasi e wega 2-0 pa e Pumanan di Piedra Plat, realmente un banjo di awa frieuw pa La Fama.

Djakinan Britannia a controla e wega cu bala y tempo, La Fama a sigui purba toch, esfuerso tabatin, pero cu un desbentaha di 0-2, Britannia tabatin mas opcion. Na minuut 85, Thionne  Oduber cu a drenta pa Lionel Tromp, a hasi e wega 3-0 pa Britannia. La Fama apesar di e desbentaha grandi awo a sigui purba y na minuut 90 hasta a logra penetra den area penal di Britannia pero e bala ta dal den palo di gol. Asina e wega a keda te cu pitaso final pa un bon victoria di Britannia, den un hopi miho di dos tempo di wega cu bon arbitrahe.

Daniel Linscheer di Britannia ta nos “Man Of the Match”, Britannia ta na cabes di Division Honor awor cu 6 punto den dos wega, 7 gol anota, sin permiti gol encontra ainda, solido, pero tabata contra dos ekipo cu por bai bataya e anja aki pa ascenso/descenso apesar cu ta tempran ainda den e temporada aki. La Fama ta keda sin punto riba tabla den penultimo lugar.

Click to comment

Leave a Reply

Your email address will not be published. Required fields are marked *

More in Division Honor