Connect with us

Division Honor

Deportivo Nacional a gana Caiquetio den un wega preta, atractivo y cu sorpresa

Photo: Ⓒ Futbol Aruba

E ultimo wega di siman 2 den Division Honor tabata entre e actual sub-campeon di Aruba Deportivo Nacional contra SV Caiquetio, un ekipo cu mester a lucha te na final di campeonato pasa pa logra keda den e Division maximo di Aruba su futbol. Nacional ta bin di a empata cu e campeon di Aruba Dakota den nan wega previo y Caiquetio tambe for di un empate contra Estrella.

Nacional a cuminsa ta controla e bala mas cu un Caiquetio cu no necesariamente a sinta warda patras den defensa, mas bien Caiquetio a tira den ofensiva asina cu nan tabata por cu un bon wega di pressing combina cu defensa di zona. Nacional transportando e bala mas, esey tabata di spera, y ta penetra na varios ocasion tempran pero Caiquetio tabata hopi bon organisa den defensa.

E defensa di Nacional tabata hopi dificil pa penetra den e wega tambe aki mane Caiquetio a realisa, pero e arma secreto di e oncena di Paradera ta pa aplica bon tironan di distancia, pakiko no? Esey ta un arma legitimo den futbol, si bo tin’e use! Caiquetio a use na varios instancia tempran den wega y a duna fruta na minuut 18, ora cu Jefferson Lopez a los un tiro di distancia pa sorprende portero Jose Cruz di Nacional pa hasi e wega 1-0 na fabor di Caiquetio.

Despues di e gol di Lopez, Caiquetio sorprendentemente toch a sigui pusha dilanti, cu mas tiro peligroso riba porteria y mas salbacion di Jose Cruz, practicamente soprendiendo Nacional, kitando e inicitiva di wega. Te cu minuut 31 ta parce cu Nacional no por a decifra e oncena di Paradera y ora nan ataka nan ta encontra cu e defensa bon para y organisa.

Na minuut 34 Rensly Tromp di Nacional ta haya un tremendo chens pa empata e wega pero e bala ta bai net na banda di palo di gol. E Dragon nan a sigui insisti y ta lansa atake tras di atake, conhuntamente cu un wega mas fisico for di e punto aki, pero, di ‘algun manera of otro’ Caiquetio a sabi di defende bon pa mantene e wega na nan fabor, asina tambe halftime ta bai aden, Nacional 0 Caiquetio 1, un resultado sorprendente te na momento ey!

E di dos tempo a sigui den mesun rumbo pa Nacional, cu a sigui insisti den pusha dilanti pa busca pa cambia e cara di e wega aki. Atake tras di atake no a duna resultado concreto pa e ekipo Nortero, Caiquetio a sabi di hasi nan mesun atakenan tambe pero a keda limita na tira di pafor di doelgebied, tin biaha bastante efectivo. Nacional a sigui ta dominando y despues di e salida di Raymbert Bikker for di e partido na minuut 56, e defensa Indjan a perde un poco disciplina den nan organisacion. Mas e tempo pasa mas e wega potente di Nacional a cuminsa impone tambe, mientras cu Caiquetio a disminui hopi den nan condision fisico.

Na minuut 63 alfin e dam a kibra y Quincy Clarissa a anota e gol di empate pa Nacional. Net un minuut despues pa colmo bala ta dal den tubo di Caiquetio pa evita Nacional bai ariba 2-1. Yegando minuut 75 ya Nacional tabatin dominio casi completo di e wega, Caiquetio tabata hasi ‘todo por todo’ pa mantene e empate y e punto di oro contra un ekipo poderoso mane Nacional y tambe nan condicion fisico habitual. Na minuut 76 alfin Nacional su trabou duro ta duna fruta y nan ta bai ariba 2-1 cu un gol di Colmenares.

Remarkable ta cu apesar di nan falta di condicion fisico pa contra-aresta Nacional, Caiquetio toch tabatin algun yegada y tiro riba e gol contrario, pero sin duna resultado. Nacional mes a bolbe coi nan ritmo di wega relampago pa sigura e tres puntonan aki cu yegadanan hopi peligroso den e ultimo cinco minuut di wega, evitando e empate di Caiquetio, tirando dilanti. Nacional a hera amplia e marcador na minuut 89 den pia di Ignacio, pero t’asina mes e anotacion ta keda te cu pitaso final. Un bon wega, atractivo y competitivo, Caiquetio cu hopi balentia pero e forsa y bon wega di Nacional a impone akinan. Nacional a keda awor cu 4 punto den top cuatro riba e tabla di clasificacion. Caiquetio ta keda un punto, pero cu hopi speransa den e campeonato aki despues di e wega aki.

Click to comment

Leave a Reply

Your email address will not be published. Required fields are marked *

More in Division Honor