Connect with us

AVB

Inversion historico den material di futbol pa tur club di Aruba

E aña aki pa Arubaanse Voetbal Bond (AVB) tin un aña historico, partiendo hopi material na clubnan di futbol afilia na e organisacion. E materialnan regala pa AVB a varia dependiendo di e cantidad di division cu cada club tin. Presidente di AVB, ing. Richard Dijkhoff, tabata feliz cu un biaha mas di por a traha hunto cu FIFA pa yuda clubnan sigui engrandece futbol.

Por exigi clubnan miembro di AVB pa desaroya futbol, pero sin material e ta bira dificil. E federacion mester a convence representantenan di FIFA, cu constantemente tabata na Aruba, pa por a yega na materialnan. P’e directiva e evento tabata special unda a parti material na clubnan. E proyecto a tuma su tempo di cual a inicia 2 aña pasa y awo a bira un realidad, asina Richard Dijkhoff a expresa. Den e sistema nobo di traha cu CONCACAF y FIFA, cada peticion mester bin man den man cu un plan di ehecucion, midiendo adelanta con positivo e proyecto lo afecta futbol.

FIFA mester a compronde prome con AVB ta trahando y na momento cu nan mes a constata cu proyectonan ta bayendo den bon direccion y cu ta haciendo locual a bisa, cu mesora nan mes a coopera mas lihe cu proyectonan di desaroyo pa AVB.

Den e lunanan nos dilanti AVB lo ta ocupa cu diferente proyecto y e siguiente paso ta cu tur coach, di tur division di e organisacionnan, lo ricibi un compensacion pa nan trabou. E federacion lo duna nan e compensacion y ta haci esaki pasobra ta garantisa continuacion.

E proyecto di AVB ta hopi bunita mes, esta pa duna clubnan e materialnan necesario, asina Rossy Marchena, secretario di SV Dakota a expresa. Material di deporte ta hopi caro, e ta un di e gastonan mas caro di e clubnan durante aña. E materialnan duna, esta net, gol, bala, pion, etc., ta loke tur club mester pa por practica futbol.

FC San Nicolas a ricibi material di AVB y pa esaki Josefin Martilia, Presidente di e club, tabata contento di ricibi e materialnan. Josefin Martilia tin 1 aña cu e team di San Nicolas y un di nan problema mas grandi ta cu no tin e materialnan necesario pa train e muchanan. Pa mira cuanto material AVB a duna, e team ta hopi contento. Tur biaha e team tin cu busca sponsor y e no ta facil si tur tienda tin cu sponsor material.

Angelique Wout, vice presidente y secretario di FC San Nicolas, tin 2 aña cu e club, cual tin 2 aña di existencia. Pa prome biaha e ta mira cu clubnan ta haya hopi material di AVB, pa por sigui train e muchanan y prepara nan den futbol. FC San Nicolas tin 6 division, cuminsando for di U7 te cu Division 1, e materialnan ricibi di AVB lo yuda nan sigui cu e trabounan di prepara y desaroya e muchanan. E club ta hopi gradici na AVB pa duna e materialnan aki.

Click to comment

Leave a Reply

Your email address will not be published. Required fields are marked *

More in AVB