Connect with us

Division Honor

Bubali a gana La Fama 3-0 pa nan prome victoria di campeonato

Photo: Ⓒ Futbol Aruba

Bubali vs La Fama tabata un encuentro di e dos ekiponan sotanero te na e momentonan aki den e campeonato nobo di Division Honor, tur dos ekipo tabata sin punto te cu na e wega aki.

E wega a cuminsa cu e dos ekiponan purbando di desifra otro den e prome minuutnan, despues tur dos cuadro tabatin pentracion den e area penal pero sin hopi precision pa por anota gol, ilustrando e debilidad den delantero di ambos oncena pa cu e campeonato aki te cu awor.

La Fama tabata superior den e prome 15 minuutnan pero Bubali a resurgi despues di e punto ey te cu e prome mei ora di wega, unda e wega tabata mas balansa, apesar di e velocidad abou di e wega, e wega tabata tambe hopi deportivo te na e punto ey. Asina e wega a sigui, sin hopi yegada di peliger te cu e pitaso final pa halftime.

E di dos tempo a cuminsa cu un Bubali hopi mas agresivo, despues di un paar di cambio tambe, hopi mas decidido pa bai cu e victoria den e wega aki. For di minuuut 55 La Fama no tabatin contesta pa e iniciativa di Bubali, cu a sali mane un ekipo completamente nobo. Nan persistencia a paga ora cu na minuut 58 despues di un falta net pafo di doelgebied di La Fama, e veterano Maurice Escalona cu un tiro spectacular den nobenta graden na banda drechi di porteria, a anota e gol pa pone su ekipo SC Bubali cu bentaha di 1-0. Un joya di gol sin duda, Escalona ainda tin su toke magico.

Djakinan Bubali a domina y na minuut 68 Edmar Tromp den un contra-golpi ta amplia e marcador pa hasi e wega 2-0 pa e “orguyonan di Nort”. La Fama cu poco contesta no ta yega cu masha peliger pam porteria di Bubali. Na minuut 79 ta Edmar Tromp atrobe cu un tiro duro ta hasi e wega 3-0 pa Bubali, y por a sinti cu wega a caba na e punto ey, broche final hasta si ainda tabata un poco mas cu 10 minuut di wega. E ultimo minuutnan tabata mas bien un formalidad, toch cu bastante wega bruto sin mester realmente, pero t’asina mes wega a caba, Bubali cu e victoria di 3-0 riba La Fama. Bubali ta sali di “sotano” y awo tin 3 punto, La Fama ta keda su so den bom di tabla sin punto ainda.

Click to comment

Leave a Reply

Your email address will not be published. Required fields are marked *

More in Division Honor