Connect with us

Division Honor

E clasico di futbol entre RCA y Estrella a ofrece drama y hopi mas, a keda empata na 2-2

Photo: Ⓒ Futbol Aruba

RCA y Estrella ta dos club hopi tradicional di Aruba, ta hopi titulo mes tin entre nan dos. Te cu awo den campeonato RCA ta den e lidernan riba tabla, mientras cu Estrella ainda ta buscando pa haya nan mes den un fase di “rebuilding”.

E prome minuutnan di wega no a ofrece hopi, ta normal cu ekiponan ta purba decifra otro den comineso di wega, Estrella cu mas retencion di bala. Pero den un habri di wowo na minuut 8, Ronald Gomez di RCA ta scapa na banda drechi net pafo di area penal di Estrella hayando su mes “one on one” cu e defensor oranjo, Gomez cu un velocidad descumunal ta baila e defensor, drenta area penal y ta los un tiro potente pa banja e portero Jesus Fria y asina pone e tricolornan ariba 1-0 tempran den wega.

Despues di e gol, RCA a mane haya e apertura cu nan tabata busca, e velocidad di Gomez riba hala drechi, y a cuminsa exploita esey sin para. Gomez mes den un “fast break” atrobe a hera anota na minuut 11, despues na minuut 13 hasta e bala a dal den tubo di gol di Estrella, apesar cu off-side a wordo decreta despues, por a sinti e dominio di RCA cu nan yegadanan. Na minuut 14, Gomez atrobe, cu un yegada di hopi peliger cu Pancho Croes a salba na ultimo seconde pa manda tiro di skina pa RCA. Te cu e punto aki Estrella en berdad no tabatin contesta pa e avalancha di e atakenan aki di RCA.

Toch na minuut 17 Estrella ta cuminsa purba cu tironan di distancia, na minuut 18 nan ta haya nan miho oportunidad, Hugo Robert ta penetra riba hala drechi te den area penal di RCA y cu un tiro duro ta anota e gol di empate pa e “naranjadanan” di Santa Cruz, 1-1. Akinan tambe e wega a bira hopi atractivo, di banda pa banda, manera a spera di e dos ekiponan aki. Na minuut 20 ta Estrella t’awo e ekipo cu mas dominio, RCA hasta mester a “replega” un poco atras y busca e contra-golpi.

Na minuut 29 RCA ta purba na retene e bala, teniendo e for di Estrella tratando di busca un suspiro y un “segundo aire”. Na minuut 30 den un hugada di falta, Miguel Gonzalez di RCA ta ricibi carchi geel, e prome carchi den un wega bastante limpi y sportief. Na minuut 40 den un atake di Estrella mei mei na rand di area penal di RCA, Gonzalez ta comete un foul “profesional” pa kibra e menasa di gol di Estrella, pa un infraccion y tiro liber,  pero ta haya su di dos carchi geel y expulsion automatico, un foul cu kizas no tabata necesario, pero, RCA ta keda cu 10 homber. Estrella ta keda peligroso pero ta RCA ta keda insisti mas apesar di nan “deficit” numerico riba tereno, asina halftime ta bai aden, empata na 1-1.

Na cuminsamento di segundo tempo RCA ta sali todo por todo cu 10 homber so! Un strategia sorpresivo, pero, efectivo! Peliger tras peliger di e oncena di Solito, Estrella mes a keda sorpresa y no tabatin contesta p’esaki. Pressing den medio-campo y mas atake ta sigui, Gomez cu mas yegada y chens pa gol. Pa banda di minuut 54 Estrella tabata atakando atrobe, RCA wardando pa intercepta y hasi contra-golpi, esaki a sali nan di bon, na minuut 55, Ronald Gomez cu un escapada atrobe ta converti e gol di bai ariba pa RCA, 2-1, ken por a kere?

RCA mes ta casi aumenta e anotacion na minuut 56 atrobe y asina e cos ta sigui, pero na minuut 58 ta drama atrobe, Jean Pierre Fingal den un momento di represalia pa un foul cometi riba dje ta haya carchi cora for di referee De Leca, cu tabatin un bon partido, e hungado di Estrella Marcel Kock ta haya carchi geel, pero Fingal ta keda expulsa, awo RCA ta keda cu 9 homber so. Estrella ta tira dilanti, cambiando tambe pa mas hungadonan ofensivo, nan ta ataka, pero nan yegadan den area penal y tironan no tabata di peliger, eynan Estrella a demostra deficiencia, nan no por a probecha di nan bentaha di 11 contra 9 homber. Pa banda di minuut 68 ta RCA tabata penetrando, casi anotando mas gol! Estrella ta insisti atrobe pero RCA ta contra aresta hopi bon, e wega tabata mas bien un di banda pa banda.

RCA ta defendiendo bon ainda te na minuut 80, y den un contra golpi ta Gomez ta penetra cu hopi peliger y ta haya un foul y tiro liber net na rand di “doelgebied”. Un tremendo tiro ta dal den tubo pa salba Estrella di e un derota inexplicabel. RCA ta bolbe ataka ferosmente na minuut 83 pa otro tiro cu ta dal den tubo, pa suerte di Estrella. Berguensa deportivo a pone Estrella reacciona alfin cu un bon atake na minuut 84 cu un bon bala salba di e portero Bryan Erasmus di RCA. Mas cambionan di Estrella pa mas ofensiva y purba empata e wega, t’asina mes Gomez di RCA cu un escapada y yegada di hopi peliger na minuut 86, Gomez ta keda abou na suela lesiona y tambe agota completamente.

Referee De Leca ta indica 2 minuut so di tempo extra, Estrella awo ta lansando atakenan di hopi desesperacion pa purba empata e wega y salba por lo menos un punto, RCA ta defendiendo cu tur cu tin pa un victoria improbabel, pero, na minuut 90+1 ta Melrick Dabian ta salba e ekipo di Santa Cruz cu un gol mane ta di oro, empate 2-2. Estrella den e ultimo minuut extra ta tira tur hende dilanti pero no ta logra e gol di victoria, wega ta caba den empate, pero pa RCA ta mane un victoria toch cu por tabata mas grandi ainda si no ta pa e gol asina laat di Dabian, ta mas un chens perdi pa Estrella cu ta keda cu 2 punto so, RCA awo tin 5 punto riba tabla. Nos ‘Man Of the Match’ ta Ronald Gomez di RCA.

 

Click to comment

Leave a Reply

Your email address will not be published. Required fields are marked *

More in Division Honor