Connect with us

Division Honor

Nacional mester a bataya duro pa gana Brazil Juniors 3-2 den e miho wega te cu awo den e campeonato nobo di Division Honor

Photo: Ⓒ Futbol Aruba

Den un wega explosivo y dramatico Deportivo Nacional a midi forsa cu e benjamin nan di Division Honor Brazil Juniors. Tur dos ekipo tabata invicto te na e punto aki, tur dos ekipo cu 4 punto. E revelacion di e anja aki, Brazil Juniors a demonstra hopi calidad di wega incluyendo nan velocidad impressionante den na prome dos encuentronan mientras cu Nacional ta keda Nacional, cu nan wega intenso y imponente.

E wega ta cuminsa cu Nacional tirando dilanti den atake di biaha for di pitaso, atakenan feroz cu Brazil no por a contesta, ta mane Nacional a purba na busca un knockout tempran prome cu e hobennan di Brazil coi mucho confiansa. Brazil no tabatin contesta, nan tabata mane contra cabuya usando termino di boxeo. Na minuut 2 ya e bala ta scarmai e palo di gol di Brazil, sigui pa atake y mas atake. Defferey Banton cu tiro peligroso riba gol pero halto, Devis Oliveros cu tiro salba pa portero Marvin Irausquin di Brazil y mas yegadanan di e Dragonnan. Brazil cu mas will-power cu nada y casi na suela pa conteo toch ta logra un salida na minuut 8 y un contra-golpi di otro mundo usando nan velocidad ta casi anota un gol pa sorpresa di tur hende na stadion, despues un otro atake y tiro liber ta duna Brazil speransa cu nan por competi cu Nacional “afterall”.

Banda di minuut 12 ya Brazil a calma y a cuminsa hunga nan wega, press den medio campo y los pa contra-golpi, dos minuut despues Brazil den un atake cu hopi coremento y tiro di Shequan Cornett pero halto a demonstra cu nan a cuminsa controla e tempo di wega. Pero Nacional tambe tin nan wega di intercepta y tira dilanti ora mester, un wega di banda pa banda. Nacional tambe cu mas atake ta encontra un bon defensa di Brazil para patras y si mester nan portero hoben Irausquin t’ey pa salba nan. For di minuut 19 p’adilanti e wega tabata un beyesa sin duda, manera dos gladiador den Coliseo di Roma, atake y contesta cu hopi velocidad. Nacional tabata purba tironan di distancia tambe, un forsa di nan, pero ta den un escapada di Nacional den hala drechi y un cruce perfecto a resulta den un gol na minuut 30 di Devis Oliveros pa pone e Norteronan ariba den marcacion 1-0, por cierto e prome gol cu Brazil a permiti den tres wega.

Na minuut 31 caba Brazil ta responde di biaha ora cu Kenroy Ranger, e ex Nacionalista, a scapa y ta yega den area penal unda cu portero Jose Cruz ta intercepta e bala net prome cu Ranger por a schuif e bala den gol. Brazil cu no kier baha cabes pa e poderosonan di Alto Vista a sigui busca e gol di empate te cu minuut 40, unda cu Quincy Clarissa a hera aumenta e bentaha di Nacional pero ta faya un chens grandi. Toch net 4 minuut despues ta Oliveros mes ta anota e gol pa duna Nacional bentaha di 2-0, un gol sensacional di distancia! Asina e prome mita ta termina cu Nacional ariba pero un Brazil cu no kier “give up” ainda.

E di dos tempo a cuminsa cu Brazil tirando dilanti di biaha, mescos cu Nacional a hasi den prome tempo na cuminsamento di e wega. Atake peligroso for di pitaso inicial caba, unda na minuut 46 Shequan Cornett cu un tiro bunita di distancia a duna Brazil e gol tan anhela pa hasi e wega 1-2, ainda cu bentaha pa Nacional pero e bataya a gaba di cuminsa atrobe. Brazil a domina cu nan wega incansabel di pressing y core p’adilanti pa e siguiente 25 minuutnan unda Nacional ta esun cu no tabatin contesta, unda portero Cruz mester a salba su ekipo den varios instancia. Na minuut 60 den un “botsing” cu Owen Van Der Wijne di Brazil, Cruz ta hasta keda lesiona y mester a bandona wega. Nacional buscando solucion pa defende nan bentaha minimo a recuri na nan hungado experimenta Valdo Leocadio for di banki na minuut 68, pa purba na para Brazil.

Toch e dam a kibra hasta cu Leocadio den wega na minuut 72; un combinacion di Frederick Brown y Ocean Samson ta duna Brazil e empate hopi mereci, un bon gol di Samson pa causa un temblor den Stadion di e fanaticonan di Brazil. Un bon wega a bira dramatico awo, Nacional despues di e empate di Brazil, awo cu Leocadio den medio-campo pa kibra e atakenan di Brazil, a cuminsa avansa di biaha cu algun yegada peligroso. Na minuut 76 for di un cruce di banda drechi y un cabesaso clinico, Charles De La Cruz a anota pa duna Nacional bentaha atrobe, 3-2 pa e Dragonnan. For di eynan e wega tabata atrobe di banda pa banda, hopi bistoso cu bon arbitrahe di referee Bedoya y su ekipo. Toch Brazil cu bastante yegada tin biaha ta hasi foutnan chikito, di nobato, perdiendo e bala mucho lihe, kibrando nan atakenan na e momentonan crucial. Nacional en cambio a exploita nan experiencia den e momentonan clave den e ultimo 15 minuut di wega, veterania ta bal hopi!

Den e ultimo parti di wega, Brazil ta tira dilanti, Nacional ta contra-ataka, bunita mes! Drama no tabata falta, e coremento sin para tabata te na e pitaso final di Bedoya, mester nota cu e wega a caba despues di un tiro liber peligroso di Brazil, cu tabata envano. Esaki tabata sin duda e miho wega di campeonato te cu awo, e wega caba 3-2 pa Nacional, mereci, pero mester elogia tambe Brazil Juniors pa e hazanja aki, pa a brinda nos e wega aki unda e dos ekiponan a laga tur cos riba tereno, e fanaticonan a gosa. Na final di wega ta hopi aplauso tabatin pa e ganado Nacional y hopi tambe pa Brazil. E benjamin nan a hasta reuni riba cancha den un “group-hug” cu sonrisa paso nan a bataya. Nos futbol tin mester di mas di esaki sin duda.

Deportivo Nacional ta keda awor cu 7 punto riba tabla, entre e tres mihonan, Brazil juniors ta keda cu 4 punto den e prome cinconan den e campeonato. Nos “Man Of the Match” tabata Devis Oliveros di Nacional, un escohencia dificil, pasobra ta hopi hungadonan a briya den e wega aki, pabien!

Click to comment

Leave a Reply

Your email address will not be published. Required fields are marked *

More in Division Honor