Connect with us

Division Honor

Un Dakota superior a gana Caiquetio 3-0 den siman tres di Division Honor

E actual campeon di Aruba su Division Honor SV Dakota ta enfrenta SV Caiquetio di Paradera den siman tres. Dakota ta biniendo di un victoria contundente di 3-0 riba Bubali, Caiquetio a perde cu Nacional 2-1 den un bon wega.

Dakota a cuminsa den posesion di bala di biaha for di pitaso inicial, un presion enorme tempran riba e defensa di Caiquetio cu hopi yegadan di peliger for di e trio ofensivo di Dakota cu awe tabata inclui Ricky Hodge atrobe, hunto cu Fernando Sousa y Albert “Killer” Francis. E atakenan constante a paga dividendo tempran tambe ora cu “por cierto” den un hugada stranjo, e bala a keda lora den “area-chika” di Caiquetio cu hopi hende hincando pia, ta Francis mes ta hasi e touch final cu ta pusha e bala den net pa Dakota bai ariba 1-0 den minuut 3.

Dakota no ta para eynan, nan bombardeo riba gol di Caiquetio ta sigui y constantemente, e velocidad di Dakota a hasi un efect grandi, Caiquetio tabata defende pa nan bida mayoria di tempo. Mas presion riba Caiquetio tambe a causa un momento di controversia ora cu referee Bedoya tabata hopi liher pa fluit un infraccion dudoso pa Dakota y den e protestanan ferviente a saca varios carchi geel pa hungadonan di Caiquetio pa protesta, nan a indica nan desgusto cu e decision aki.

Pa banda di minuut 25 di wega Dakota tabatin hopi bentaha cu 75% den posesion di bala, Caiquetio no por a “settle down” y mester a para duro patras y busca na contra-ataka so, pero tabatin hopi contratempo pa hasta sali di nan mesun mita di cancha. Despues cu Hodge a faya un chens cla na minuut 25 pa aumenta e score for di un tremendo pase di De Sousa, el a reinvindica su mes cu un gol solido na minuut 27, atrobe for di un asistencia di De Sousa, pa pone e marcacion 2-0 p’e Abehanan.

Asina mes cu Dakota tabata domina e wega aki, toch ainda na mi padece e ekipo aki no a “gel” completamente ainda, ta hopi tempran den e campeonato tambe, Dakota cu bastante refuerso nobo y potente mane Jean Pierre Heyden (cu no tabata den e wega aki debi na biahe cu seleccion U20 na Merca), Jean Pierre Van Der Linden cu nos no ta wak riba e roster mas, Digion Ras, enfin, Dakota tin un banki tambe cu por wel di ta un ekipaso riba su mes, imaginabo! E ekipo ainda no a coi full speed, esey ta e punto, e no a “click” ainda, keremi.

E atakenan di e “Amarillonan” tabata sin para, cu mas chens di amplia e anotacion, tironan peligroso di Hodge na minuut 34, 40 y otronan, toch e wega ta keda 2-0, Caiquetio sa defende si, contal cu nan mantene nan disciplina den e ultimo linea. Caiquetio toch a haya nan chens pa anota apesar di tur e dominio di Dakota, un escapada y infraccion na fabor di e “Indjannan” na minuut 44, un cruce di tiro liber y cabesaso pero net na banda di gol, e prome yegada di Caiquetio! Asina halftime a bai aden 2-0 pa Dakota.

Cuminsando e di dos tempo ya Dakota a haya un chens morto na minuut 47, ora cu De Sousa cu un yegada y asistencia mane ta riba teblachi pa su companjero Felipie cu ta desperdicia.

Fernando De Sousa, cu tabata riba un nivel superior awenochi, atrobe cu yegada y chens na minuut 49 pero sin por a concretisa. Hasta Paul Nickenson tabata sali for di linea defensivo pa tira den atake, cu bon yegada na minuut 52, tambe sin anota, atrobe na minuut 59, e biaha aki ta e anker di medio-campo di Dakota, Liomar Croes a purba su suerte, tambe sin resultado debi na e salbacion di portero Lubert Feliciano di Caiquetio cu tabatin hopi trabou mes e anochi aki.

Caiquetio cu mas chensnan den e di dos tercio di wega, cu tabata poco den e wega aki, pero chens ta chens, na minuut 60 di tiro liber, bala den man di Eric Abdul, y despues otro yegada na minuut 62 pero e bala ta lora na banda di porteria di Abdul. Dakota a bira un poco complaciente y slordig na un dado momento tambe, pero ta net den e momentonan ey na minuut 65, den un combinacion perfecto entre Hodge-Francis-De Sousa, Dakota ta amplia e resutado na 3-0, Francis na final ta laga e bala pa su companjero De Sousa anota, un bon gesto y mereci sin duda.

Dakota ta bolbe recupera nan “mojo” atrobe despues di e gol, hungando cu mas precision y mas yegadanan. Caiquetio tambe ta hungando awo cu mas brillo cu algun chens mas, pero nada di hopi peliger, un wega mas habri y un “toma y dame” chikito den e ultimo quarto di wega, Caiquetio casi ta anota e gol di honor na minuut 90, pero bala ta bai net na banda. Asina tambe e wega a caba, 3-0 pa Dakota, cu ta keda cu 7 punto den tres wega, bon pa di dos luga riba tabla. Caiquetio a pasa den un test duro cu Dakota, a keda cu 1 punto for di tres partido, pero mester bisa cu e dos ultimo weganan tabata contra e actual campeon y sub campeon di Aruba.

Nos “Man Of the Match” den e wega aki ta Fernando De Sousa di Dakota.

Click to comment

Leave a Reply

Your email address will not be published. Required fields are marked *

More in Division Honor