Connect with us

Division Honor

Britannia ta demostra nan superioridad contra River Plate pa mantene nan liderato den Division Honor ganando 5-2

Dos ekipo cu semper sa presta bon wega ofensivo a enfrenta otro riba e fecha aki. Britannia tras di un bon comienso di e campeonato nobo ta lider actual di Division Honor, River Plate ta buscando nan mes ainda despues cu pa chiripa no a alcansa na yega play-off den e campeonato pasa.

Britannia a cuminsa cu bon posesion di bala y e controlando tempo di wega. River Plate, un ekipo cu mente ofensivo tambe a contesta tirando dilanti asina cu nan a haya un chens. Britannia tempran den wega na minuut 6 caba a lansa un atake unda e defensa di River Plate a laga buraco atras tratando di sali p’adilanti. Den un cruce peligroso e bala a pasa bai riba e portero di River Plate y ta alcansa yega riba pia di Daniel Linscheer cu no ta pordona y ta hasi e wega 1-0 pa e Pumanan.

River Plate no ta perde tempo y ta tira dilanti sin warda en busca di e gol di empate, cu yegada si pero sin concretisa, pero, mientras tanto atrobe ta compromete nan mes den defensa. Na minuut 15 Linscheer a bolbe haya su mes cu bala den area penal di River Plate cu un chens grandi mes, pero ta faya e gol.

Despues ta sigui un wega di banda pa banda pero sin precision di ambos cuadro. Den un momento River Plate ta haya nan mes cu bon yegada na minuut 27 pero Carlos B. Quandt, capitan di e oncena di Madiki, su tiro duro for di rand di area penal ta bai halto riba porteria di Britannia. River Plate cu mas iniciativa y yegada den e siguiente 10 minuutnan ta haya mas chens ainda unda Kendrick Dania mester a salba su ekipo pa manetene nan bentaha intacto. Linscheer ta bolbe duna Britannia yegada cu un bon tiro na minuut 37 pero e biaha aki cu bon salbacion di portero Gilay Croes.

E wega a keda bastante igual te cu halftime a yega cu ambos ekipo cu basta yegada, un wega un poco accidenta tambe, un poco duro na algun oportunidad pero no onsportief te cu awo. Na pitaso pa halftime e wega a keda 1-0 pa Britannia.

Den e di dos tempo, na inicio mes, Daniel Linscheer ta hasi un escapada riba hala drechi na minuut 46 cu su velocidad y control di bala, e no ta bacila y ta fusila portero Croes di River Plate pa e 2-0. Britannia no ta para keto y ta sigui cu nan atakenan den e siguiente 10 minuutnan y ta sigui busca e gol pa amplia nan bentaha ainda mas. Na minuut 60 nan ofensiva ta duna fruta ora cu Jeffery Rolston den un “fast-break” ta hasi e wega 3-0 pa Britannia. River Plate ta contesta cu nan mes un atake pero e tiro ta bai den man di Dania. River Plate ta sigui insisti y ta haya mas chens na minuut 65 pero sin por anota, toch ta logra haya un penalti na minuut 70, Fladimi Francois ta concreta pa hasi e marcacion 1-3.

Ta ora cu wega a intensifica, unda ambos ekipo ta lansa atake contra otro, Luis Estrada di Britannia ta scapa stret pa area penal di River, y no ta perde tempo y ta anota e gol number 4 pa Britannia, pero ainda falta hopi mas den e wega aki. River ta sigui ataka atrobe, pero den un contra-golpi na minuut 86, Linscheer ta hasi un bon pase pa Estrada p’asina e anota su di dos gol pa hasi e wega 5-1 p’e Pumanan. River cu nunca ta para di ataka tambe ta pentra den area penal di Britannia atrobe na minuut 90, eynan River ta hasi e wega 2-5, un gol di Albert Grovell.

Den e minuutnan extra di e di dos tempo ta unda e wega a bira hopi bruto y un toke di anti-deportivismo cu a resulta den carchinan geel y cora pa e oncena di Madiki, Referee Cristiaans cu en general tabatin un bon wega, mas den e prome mita, cu basta momentonan dificil pa atende cu ne den di dos mita, mester a otorga basta carchinan for di minuut 79 p’ariba, mayoria pa River, incluyendo e dos utimonan aki den tempo extra, uno e expulsion di Belzius Pudens.

Asina mes e wega a caba sin incidente mas grandi, unda e ekiponan a brasa otro y estrecha man den spirito deportivo. Britannia cu un bon victoria, contundente, estableciendo nan mes como un di e miho ekiponan e anja aki, tin awo 9 punto y ta lider di Division Honor. River Plate tin cu busca na haya sa con pa combina nan wega ofensivo cu un miho iniciativa defensivo, ta keda awo cu 2 punto so. Nos “Man Of the Match” ta Daniel Linscheer di SV Britannia.

Click to comment

Leave a Reply

Your email address will not be published. Required fields are marked *

More in Division Honor