Connect with us

Division Honor

Brazil Juniors a encontra cu realidad, perdiendo cu Dakota e campeon di Aruba cu score di 4-0

Brazil Juniors tabata un revelacion te cu awor aki despues di e prome tres weganan di e campeonato, cu resultado di un empate, un victoria y un derota di chiripa contra e poderoso Nacional. Ademas di acumula 4 punto den tres wega, nan a sa di demostra hopi bon wega tambe y na mesun tempo dunando un empuhe nan nos futbol, un aire fresco den Division Honor, sin duda.

Pero, realidad sa presenta na porta diripiente; den e ultimo wega Brazil a bataya hopi bon contra Nacional, e subcampeon di campeonato pasa, a perde 2-3 den e miho partido te cu awo den e temporada nobo aki. E siman aki nan a haya nan ta topa cu e campeon mes, Dakota.

Mientras cu Dakota a cuminsa e wega den “full-trot” cu un ofensiva impresionante, Brazil a cuminsa e wega hopi timido, temperamento di un ekipo nobato. Dakota a habri marcacion na minuut 7 caba, den un penetracion den area penal di Fernando De Sousa, e portero di Brazil a hasi un pifia di no calcula e bala bon, ta faya, e bala ta lora bai den gol, un gol credita na De Sousa, 1-0 pa Dakota tempran den wega.

E bombardeo di Dakota ta sigui, Brazil cu poco contesta, na minuut 12 Liomar Croes ta hasi e wega 2-0 pa e actual campeon di Aruba, despues di hopi presion y dos tiro di skina consecutivo y un di nan casi gol di Ricky Hodge cu a cobra e tironan, alfin ta Liomar ta pone bala den net pa amplia e marcador.

Drentando den minuut 20 ainda Brazil tabata hopi afecta cu nan inabilidad di controla nan mes y nan wega, sigur no ta e Brazil cu nos a wak den e prome tres weganan di campeonato, pero, e biaha aki nan ta hungando contra un grandi di berdad. Dakota a hasta cuminsa rota e bala masha trankil mes, cu bon “bal-bezit”. Despues di varios peliger atrobe, ta Dakota mes ta anota e di tres gol, 3-0, u gol di cabes di Robert Francis. Na minuut 30 ta Dakota mes a hera hasi e wega 4-0 cu un tiro di distancia, si no tabata pa e salbada di hoben portero Marvin Irausquin. Alfin na minuut 31, Owen Van Der Wijne ta crea e miho chens pa Brazil si no tabata pa e salbada di Eric Abdul na ultimo seconde. Djeynan Brazil a haya mas brillo, a sigui cu un bon tiro di Shequan Cornett na minuut 33 pero den man di Abdul, y otro chens via un bon combinacion di Cornett mes cu Van Der Wijne un minuut despues.

Brazil a cuminsa bataya Dakota apesar di ta atras den e marcador 0-3, nan a lubida di esey, nan a cuminsa lucha pa e prome gol, esey tabata mas importante pa nan. Asina Brazil a cambia e partido aki, apesar cu e score mes no a cambia ainda, ta Brazil a lansa atake tras di atake incluyendo un spectacular yegada di Van Der Wijne den area penal di Dakota pero ta manda e bala halto na ultimo seconde. Dakota a warda patras, tumando un respiro despues di nan blitz den e prome parti di e mita. Asina halftime a yega, Dakota 3 Brazil Juniors 0.

Brazil definitivamente a cambia nan mentalidad den e wega aki, di biaha den e segundo mita nan a cuminsa press halto, recuperando bala efectivamente y sigui atakando, hayando yegada y chensnan di gol y nan por ta riba e scoreboard caba si no tabata pa e intervencionan di Eric Abdul, cu tabata un “man on a mission” awenochi.

Brazil a sigui ta domina den e segundo mita aki, except pa algun contra-golpi di peliger di Dakota na varios ocasion, ora bo tin e trio di Hodge, De Sousa y Francis dilanti cu ayudo di Liomar Croes den volante, ta cualkier cos por pasa semper. Despues di minuut 62 tabatin ehempel di e calidad aki di Dakota cu a cambia e wega atrobe, cu mas balansa awo, ta loke Brazil no tabatin mester, Dakota a cuminsa haya e bala bek atrobe y ta probecha di biaha na minuut 65 unda Liomar Croes mes ta lansa den atake y ta los un tiro potente pafor di area penal di Brazil pa un golaso, un di e mihonan te cu awo den e campeonato, pa hasi e wega 4-0 pa e Abehanan, net ora cu Brazil tabata merece e gol di corta bentaha.

For di minuut 75, Brazil a bai “all out” pa busca nan gol, nan a tira tur cos riba Dakota, hasta a logra penetra profundo den area penal di Dakota, pa encontra cu un Abdul na candela, e portero tabata decidi pa mantene su clean-sheet e anochi aki, algo impresionante realmente te na e punto aki, pero si bo no ta kere cu e cos lo bira mas interesante ainda y increibel warda un rato mas.

Brazil a sigui cu nan atakenan lubidando cu nan ta abou 0-4, algo di admira por cierto, algo special! Salbacion di Abdul atrobe na minuut 85, Brazil cu tiro halto den area penal atrobe na minuut 90, ta kiko mas anto Brazil mester hasi pa haya nan gol? e gol di honor por lo menos, e gol pa paga pa nan esfuerso!

Pero milager ta existi ainda, keremi, na minuut 90+2, Brazil ta haya un penalty despues di un lapso mental di Nickenson Paul cu un foul innesesario den “doelgebied” pa duna Brazil un chens grandi pa vindica nan mes y haya recompensa pa nan trabou duro. Eric Abdul, desapunta cu e situacion aki no ta keda cu mas opcion cu warda e tiro for di punto penal aki di Van Der Wijne. E tiro mes tabata uno bon tira y potente y sigur tabata bayendo den gol, except, pa e man di Abdul den e ultimo esfuerso pa tapa e bala y salba su porteria, spectacular! Tabata su destino e anochi aki.

Referee Farro, cu un bon partido, no ta keda cu mas tempo y mester a pita pa e tremendo wega aki termina. E resultado di 4-0 pa Dakota no ta relfeha e bataya cu Brazil a duna, asina ta tin biaha, Eric Abdul si sa ta ki esfuerso Brazil a presta, e ta nos “Man Of the Match” sin duda, despues di e anochi epico aki!

Click to comment

Leave a Reply

Your email address will not be published. Required fields are marked *

More in Division Honor