Connect with us

Division Honor

Nacional a impone nan wega pa gana RCA 2-0 y ta protagonista atrobe den Division Honor

Den un wega cu a cuminsa den awacero na Stadion Trinidad, Nacional a dal duro tempran y a sorprende RCA for di pitaso inicial caba. RCA no tabata prepara pa e “blitz” aki di e Norteronan.

Net prome cu minuut 2 di wega caba Emerson Leocadio ta haya un apertura y ta drenta area penal di RCA pa habri marcador pa Nacional, un banjo di awa frieuw pa e oncena di Solito. Un bentaha di 1-0 tempran pa Nacional ta mane oro, e Dragonnan sa con pa hunga nan wega cu un bentaha tempran, un ekipo cu ta semper bon prepara y ta hopi experimenta.

Nacional a sigui domina te cu minuut 10, unda cu alfin RCA a desifra con pa sali di nan mesun teritorio, y a hasta tira dilanti buscando e gol di empate. RCA ta press halto buscando na intercepta e bala y sorprende dilanti. Ronald Gomez di RCA ta haya bon yegada pero bala ta wordo salba pa e portero di Nacional Adrian Donayre. Na minuut 15 nos ta mira cu Jean Luc Bergen y Howell Brokken ta combina bon den medio campo di RCA pa recupera bala y distribui dilanti pa traha chens di gol, pero pa con largo nan lo por hunga e wega efectivo aki. Mas yegada di RCA cu tiro di skina y tiro liber y  mas salbacion di e portero di Nacional, tambe cu bastante intercepcion nan efectivo den area penal, RCA ta sigui insisti y ta hasta domina e wega te na e punto aki, ta Doanyre, e portero di Nacional, t’esun cu tabat den nan caminda.

Pa minuut 21 ainda RCA tabata dominante, Nacional mas bien no por sali di nan banda, pero nan tabata defendiendo bon den combinacion cu e bon trabou di Donayre bou di e tres palonan.

Futbol ta stranjo toch tin biaha, net ora cu RCA tabata dominando y ta serca di empata e partido, ta Nacional ta haya un gran chens den contra-golpi na minuut 23 y Charles De La Cruz yegando na rand di area penal di RCA ta los un tiro descumunal y ta banja e portero di RCA pa hasi e wega 2-0 pa e oncena di Alto Vista, un otro banjo di awa frieuw pa e Tricolornan.

Awo, despues di e gol pa amplia bentaha, ta Nacional a cuminsa domina atrobe, pero mas bien den yegadanan di calidad, un ekipo cu si sa probecha, un ekipo cu ta “maximise” nan chens nan, asina bon cu nan a hera amplia bentaha mas ainda na minuut 28. For di minuut 30 RCA ta cuminsa reacciona atrobe, cu berguensa deportivo como nan catalyst y ta cuminsa wanta e bala mas, dominando den posesion. Toch e realidad di Futbol ta cu bo por tin posesion di bala, pero esey no kiermeen cu bo ta dominando e wega, hopi posesion cu poco yegada di peliger realmente no ta traduci den victoria, ta chens nan di gol mester haya pa anota y gana wega.

Esey tabata e storia di RCA for di e punto aki den e wega. E oncena di Solito ta purba hopi cos bon pero cu tabata duna fruta te cu tres quarto di cancha, nan tin un “breakdown” for di medio campo ofensivo te cu e dlantero nan, no tabatin fluides den nan wega den e aspecto ey, dus, nan a opta pa cuminsa tira di distancia debi na e ineptitud pa penetra den area penal di Nacional y crea chens di gol. Asina tambe halftime a bay aden.

Nacional a cuminsa e di dos tempo tirando duro den atake atrobe, creando chens di peliger di biaha, nan yegadan ta simple y efectivo, ta con nan por t’asina precies? Pero nan ta.

Na minuut 48, RCA ta cuminsa reacciona atrobe y tin un “toma y dame” andando. RCA ta traha duro, core hopi, pero ainda e no tabata suficiente, cu poco chens di peliger, y ora nan haya e chens nan di peliger n’ey, Donayre tabat’ey cu su man nan sigur den porteria di Nacional.

E dragonnan tabata tin mas yegada di peliger cu menos posesion di bala, mi punto exacto.

E wega di defende bon y hunga e contra-golpi ta un specialidad di Nacional, e ta algo hopi bistoso y efectivo ora cu bo sa hung’e.

Mas e tempo core mas e efectividad di RCA ta baha tambe, hopi coremento ta hopi desgaste fisico, ta Nacional ta realmente dominando e wega y e resultado. Asina e wega ta sigui, RCA no tabata mustra di por remonta e resultado aki, mas nan sali en busca di e gol, mas peligroso Nacional bira cu mas bon yegadanan. E wega ta yega den tempo di descuento sin cambio alguno, den e minuutnan adicional wega duro ta causa cu Referee De Leca mester a saka carchinan pa ambos ekipo incluyendo un carchi cora pa Clarissa di Nacional debi na dos carchi geel acumula, un wega bon gefluit si.

Nacional a gana, nan a domina, e anotacion no ta refleha esey claramente, tampoco e posesion di bala, ta efectividad ta conta akinan, y haya resultado. Nacional 2 RCA 0, Nacional ta provisionalmente lider riba e tabla di Division Honor cu 10 punto, RCA ta keda cu 5 punto den di cuarto lugar te cu awo. Nos “Man Of the Match” ta Adrian Donayre, portero di Nacional.

 

Click to comment

Leave a Reply

Your email address will not be published. Required fields are marked *

More in Division Honor