Connect with us

Division Honor

Caiquetio ta supera Bubali 2-1 pa sali for di zona di descenso riba tabla di posicion di Division Honor

SV Caiquetio y Bubali SC ta den bataya pa evita e notorio zona di descenso riba tabla di posicion di Division Honor. Bubali cu 3 punto y Caiquetio cu 1 punto so den tres wega di e campeonato 2018-2019, den peliger di descenso si e situacion sigui mescos te cu final di e temporada aki.

E wega na cuminsamento tabata un poco timido, conservativo y hopi cauteloso. Pa e dos ekiponan aki, evita e zona di descenso ta nan meta principal den e campeonato y cada un ta e otro su rival grandi cu nan mester gana pa yega alcansa e meta.

Un wega balansa cu poco yegada di mucho peliger den e prome 20 minuutnan. Caiquetio a cuminsa sali basta miho despues cu miho iniciativa, esaki a forsa Bubali di responde, diripiente nos tabatin un bon wega den Stadion Guillermo Trinidad. Jefferson Lopes den un bon yegada na minuut 23 a anota e gol pa hasi e wega 1-0 pa e Indjannan di Paradera.

For di minuut 26 por bisa cu ta Bubali a cuminsa domina un poco mas. Caiquetio mester a depende bastante di nan portero Feliciano pa salba nan pa mantene e anotacion na un empate. Na e punto aki Caiquetio a cuminsa hunga di contra-golpi, por cierto na un manera basta efectivo. Den un penetracion peligroso Caiquetio ta haya un penalty, cu bon chens pa aumenta nan bentaha pero Zymion Loopstok ta para e tiro di penalty aki, e wega ta keda 1-0, ainda na fabor di Caiquetio. Toch e oncena di Paradera ta insisti y den un avanse peligroso, Jefferson Lopes atrobe, ta los un tiro di distancia pa fusila portero Loopstok pa hasi e wega 2-0 pa Caiquetio, un sorpresa!

Bubali ta tira den atake sin para pero sin por a concreta, Caiquetio a defende hopi bon y e wega ta keda 2-0 na nan fabor te cu halftime.

Den e di dos tempo Bubali ta sali di biaha en busca di e empate cu bastante yegadanan di calidad y peligro, Caiquetio awo ta warda patras y tira den contra-golpi. Bubali cu mas dominio y yegada pero sin cosecha fruta, Caiquetio tabata defendiendo hopi bon ainda. Pa banda di minuut 66 e wega tabata di banda pa banda, un strategia oportuno di Caiquetio pa ataka mas frequente a resulta bon ya cu e ‘ofensiva tabata nan mihor defensa’ den e situacion aki.

Bubali ta tira “todo por todo” den atake, pero e gol no ta cai, tabatin hopi bon dominio di e defensa di Caiquetio y tambe intervencion di e portero Feliciano, y den algun oportunidad e atakantenan di Bubali no tabatin bon punteria, e wega ta keda 2-0. Asina e wega ta keda tambe te cu a completa e 90 minuutnan reglamentario drentando den tempo adicional unda di biaha  e veterano Maurice Escalona ta cabesa for di un tiro di skina pa e gol di descuento pa Bubali, e wega ta 2-1 pa Caiquetio. Bubali ta lansa atake tras di atake den e ultimo minuutnan den tempo extra, den un ambiente di hopi drama toch Caiquetio ta salba y ta bai cu nan prome victoria y tres punto di oro y asina subi riba tabla di posicion.

Nos “Man Of the Match” ta Marlon Lampe pa e tremendo trabou den defensa di Caiquetio, cu tabata crucial pa nan por a wanta e resultado y bai cu tur e tres puntonan. SV Caiquetio tin awo 4 punto y Bubali SC ta keda cu 3.

Click to comment

Leave a Reply

Your email address will not be published. Required fields are marked *

More in Division Honor