Connect with us

Division Honor

River Plate y La Fama ta empata 1-1 den un partido competitivo, dramatico y controversial

Un wega crucial pa ambos ekipo mirando e contratempo cu ambos a haya den nan prome tres weganan di campeonato, River cu 2 punto so y La Fama sin punto den tres wega. Un victoria pa un di nan dos lo nifica salida di e parti abou di tabla di clasificacion.

E wega a cuminsa cu hopi dinamismo, coremento y entrega di ambos ekipo, den e prome 30 minuut nan hasta nos por a observa cu e wega tabata di banda pa banda, ambos cu bon yegadanan, un wega mas bien ‘habri’ y bistoso, e unico cu no a bai mucho bon tabata e tironan, cu no tabata mucho di peliger, e calidad den e area penal nan tabata hasi falta, esey no a kita cu e wega tabata bon, ora hungadonan ta entrega nan mes y bataya, tambe ta algo di admira.

E ida y buelta riba tereno a  caba tambe den un “stalemate” te cu pitaso final di referee Maestre pa halftime bai aden, cu e anotacion di 0-0.

Den e di dos mita La Fama ta sali cu hopi vigor y iniciativa, y ta tira den atake di biaha cu intencion pa anota y bai ariba. Na minuut 47 La Fama den un bon yegada den area penal di River ta haya un penalty, pero e tiro ta bai dal den palo di gol pa salba River. Net dos minuut despues na minuut 49 ta La Fama cu un tiro potente for di distancia pero atrobe sin concretisa.

For di minuut 50 e wega a cuminsa ta di banda pa banda atrobe, un deleite pa e fanaticonan. E bon yegadanan a rekeri hopi bon protagonismo di ambos portero, Gilbert Bautista di La Fama y Eugene Tromp di River Plate.

River tambe tabatin chens di anota, na minuut 54 cu un tiro salba pa Bautista y e chens grandi na minuut 58 unda Luis Franken cu un tiro violento cu ta dal den palo di gol di e Savaneteronan.

La Fama ta contesta cu hopi peliger atrobe na minuut 64 unda portero Tromp mester a hasi un salida relampago pa salba River di un gol. River atrobe na minuut 68 unda Carlos Quandt ta faya di cabes net na banda di gol, atrobe na minuut 70 portero Bautista di La Fama ta salba su ekipo ora cu e ta tapa un bala cu despues ta bay dal den lata pa sali bons bek den area chika unda cu un defensa ta rechasa.  

Na minuut 72 alfin ta La Fama cu un yegada spectacular di Pieter Susebeek, cu tabatin un tremendo partidaso por cierto, a hasi e anotacion 1-0 pa La Fama. Net un minuut despues, na minuut 73, River ta responde pero e bala di Franken ta dal atrobe den palo di gol. E wega a keda 1-0 pa La Fama. For di minuut 80 ta La Fama mes tabata comanda den e wega y ta haya mas chens pa aumenta e marcador na minuut 84 y 87, ambos di Susebeek atrobe!

Cu e wega completa den tempo reglamentario, Referee Maestre ta duna 6 minuut di tempo extra! River ta tira dilanti y La Fama tabata defendiendo bon. Den e di tres minuut (90+3) di tempo extra, River Plate di Madiki ta haya un penalty, den e cobro di e penalty di Fladimy Francois e bala ta dal den tubo salbando La Fama, pero, Referee ta constata cu tabatin “encroachment” den e proceso, hungadonan di La Fama a drenta area penal prome cu e tiro penal. Francois ta haye ta tira di nobo, pero, “que casualidad”, atrobe tabatin e mesun infraccion di La Fama, e bala mes tambe a dal den tubo atrobe! Despues di hopi protestanan e di tres tiro di penalty a wordo cobra atrobe unda Francois finalmente ta duna River e empate di 1-1. Un minuut despues River ta hasta haya un bon yegada den area penal atrobe y tabata parce cu tabatin falta pa penalty, e bandera di e asistente a bai ariba indicando esey tambe, pero referee Maestre no a otorga e penalty aki pa River. Asina pitaso final a yega, empate 1-1 entre River Plate y La Fama. Un bon wega cu hopi drama den e segundo tempo y te na final. River ta keda awo cu tres punto, mientras cu La Fama ta haya nan prome punto di e campeonato, e por tabata 3 punto pa nan! Nos ‘Man Of the Match’ ta Gilbert Bautista, portero di SV La Fama.

1 Comment

1 Comment

  1. G S G Croed

    November 20, 2018 at 5:37 pm

    Bon trabow ruman. Si tin cu remarka cu ta tempo pa bira mas critico ariba e pober y bow calidad di arbitrahe na mes un manera ora ta hasi contra e futbol di cada equipo. Mester stop di mira otro banda y permiti e arbitrahe sigi abusa di nan incompetensha y dunancia esaki
    debidamente.

Leave a Reply

Your email address will not be published. Required fields are marked *

More in Division Honor