Connect with us

Division Honor

Nacional mester a bons bek den di dos mita pa gana La Fama 3-1 den un victoria contundente

Nacional ta contendor pa e titulo e anja aki atrobe, esey a keda demonstra den e ultimo weganan cu a pone cu nan ta den top di e tabla di Division Honor, cu cinco siman completa ta total di golnan anota ta e diferencia entre nan y Dakota. La Fama cu un punto so te cu awo den e campeonato ta bin ta mehorando, den nan ultimo wega nan a empata 3-3 contra Estrella, ni tres dia pasa! si, La Fama ta hungando e wega aki cu dos dia so ‘technicamente’ di descanso entre partidonan, un situacion fastioso pa e club di Savaneta! Vooral despues di un desempenjo admirabel contra e club di Santa Cruz Diamars cu a pasa.

Nacional a  cuminsa e wega den atake, nan no a ‘perde pa gana’ y a tuma iniciativa di biaha! Un ekipo mas descansa cu e Savaneteronan, sin duda. Te cu minuut 10, ainda La Fama no tabatin salida adecuado, pero despues e ‘berde cu blanconan’ a tira dilanti, ta mane cos nan tabata purba decifra e Dragonnan. Sin miedo La Fama a cuminsa ataka, hasta si esey kiermeen lagando apertura patras pa un contra-golpi Nortero. Toch nan a insisti y ta mane nan a sacudi Nacional, paso nan a horta e iniciativa di wega, Nacional no a spera esaki.

Nacional a hasi uso entretanto di nan contra-golpi efectivo y potente, unda Devis Oliveros den hopi oportunidad a demostra cu bo no por laga porta habri atras, nan lo probecha y drenta sigur. E wega a bira un ‘toma y dame’, sorprendentemente un hopi miho wega cu a spera. E arma secreto pa La Fama sin duda tabata pa tira Pieter Susebeek dilanti den un racha di atakenan, habriendo hopi porta p’e otro hungadonan di La Fama, manteniendo Nacional bou presion constante. Mientras cu Nacional  tabata tira bek den atake, ta tur dos ekipo a lubida di defende, algo cu a pasa tambe den e wega di La Fama contra Estrella Diamars pasa.

Den un contra-golpi di La Fama na minuut 26, Susebeek, e homber di momento, cu un tiro descumunal di distancia, net pafo di area penal, a fusila portero Jose Cruz pa pone La Fama ariba 1-0. Nacional a responde di biaha y a lansa den atake trei atake, pero e gol no tabata di yega. La Fama no a replega y bai sinta defende e resultado, nan a sigui cu nan wega efectivo ey, nan tambe tabatin yegadanan, igual cu Nacional te cu halftime, e wega a keda 1-0 pa La Fama. Sorpresa tabata cu no tabatain mas gol te cu e pitaso ya cu ta hopi atakenan peligroso mes tabatin di ambos oncena.

Den e prome minuutnan di dos tempo e wega tabata ainda di banda pa banda. Ta despues na minuut 52, Nacional a cuminsa domina y ta haya nan gran oportunidad y no ta faya e biaha aki, Leo Colmenarez ta empata e wega 1-1. Despues di e gol Nacional ta sigui cu nan presion gran di, tipico di nan wega di temporada pasa, dirigi pa Valdo den medio campo, Banton den defensa y e peligrosisimo Oliveros dilanti, por cierto un Oliveros dinamico, yudando y habriendo caminda pa su companjeronan di ekipo.

Nacional ta presiona hopi y tambe ta hasi diferente cambionanan buscando e combinacion perfecto pa sali bai gana e wega aki. Claudeone Cavalcante tambe a drenta den wega, despues di basta tempo di ausencia, y ta bira un piesa clave pa e resurgencia di Nacional den e di dos tempo. E trabou insistente aki di Nacional a duna fruta atrobe na minuut 68, unda cu Javier Jimenez ta anota pa duna e Dragonnan e bentaha tan cotisia di 2-1. La Fama no a keda abou na suela, no kere, nan tambe a cuminsa bataya pa busca un empate cu lo tabata cu sabor di victoria pa nan si nan logra. Pero esaki tambe tabata nan “Waterloo”, ya cu saliendo en busca di e gol di empate, tambe a causa e apertura atras p’asina Nacional anota e gol pa sigura e victoria aki, na minuut 88, unda cu Oliveros atrobe a scapa na banda drechi, y cu un cruce perfecto ta haya Cavalcante dilanti gol pa anota pa e 3-1 decisivo! Nacional a keda cu e presion aki riba La Fama y a sigura e wega pa ora cu pitaso final a yega, un wega cu bon arbitrahe di referee Colina por cierto.

Nos ‘man of the match’ ta Devis Oliveros, hasta sin gol awenochi, pero cu yegadanan importante, asistiendo su companjeronan dilanti, facilitando e golnan. Nacional ta keda como lider provisional di Division Honor cu 13 punto. La Fama ta keda cu 2 punto, pero ta mustrando un hopi miho futbol den e ultimo weganan, nan tin hopi chens pa sali for di bom di Division Honor hungando na e manera aki.

Click to comment

Leave a Reply

Your email address will not be published. Required fields are marked *

More in Division Honor