Connect with us

Division Honor

Dakota ta mantene liderato despues di a derota Britannia 3-2 den duelo epico

Den un wega di dos top ekipo di futbol di Aruba e anja aki, Dakota y Britannia a bataya pa supremacia. Dakota, e campeon actual pa mantene su liderato den e temporada aki, y Britannia cu kier a bai bek den top. A spera hopi di e wega aki, pero, den e prome 15 minuutnan ta masha poco a pasa, e ekiponan mas bien cu hopi respet pa otro, na un manera, hopi calcula y strategico, mane ta un wega di ahedres!

E wega a cuminsa habri despues di e prome quarto, ta Britannia a cuminsa ataka y Dakota a responde. Pa minuut 20 caba, e wega ta den “full swing” cu hopi energia y bataya, locual ainda tabata falta ta tiro di calidad y peliger riba porteria. Loke si por a observa ta cu e wega tabata cushinando manera un bon stoba y gradualmente algo grandi tabata di bai pasa.

Na minuut 26, Ricky Hodge di Dakota a los bai riba hala drechi, drenta area penal, laga un defensa atras, despues cu a kere cu e lo crusa e bala, e ta “schaak” un otro defensor pa despues los un tiro pa fusila e portero di Britannia, Dakota 1 Britannia 0. Un gol di calidad, un candidato pa e miho gol di campeonato te cu awo.

Britannia a lanta cabes y a sigui busca yegada y tabatin algun momento di oportunidad sin duda, pero, gol si no tabatin, e toke final tabata falta. Dakota a cuminsa press Britannia bastante halto tambe, impidiendo nan salida di atras, locual a hasi e wega un poco mas strategico cu a spera yegando minuut 39. Ta na e punto aki cu e wega aki a bira un “partidaso”!

Minuut 39, ta unda Britannia a haya un tiro liber peligroso, y for di un tiro poderoso di distancia David Castro ta anota pa Britannia empata e wega 1-1. Dakota a mane “rabia” y a sali di biaha pa busca na aumenta e marcador, y “dicho hecho”, for di e pitaso pa reanuda e wega Liomar Croes, e medio-campista Dakotero, ta avansa te area penal y ta los un tiro di distancia pa fusila e portero di Britannia pa e 2-1 na fabor di e “Amarillonan”, un contesta di biaha di Dakota.

Pero, wanta duro! Net un paar di seconde despues, net despues di e pitaso pa reanuda e wega atrobe, Britannia ta lansa den atake, stret pa gol di Dakota, Luis “Coco” Estrada ta baila algun hungado di Dakota, drenta “doelgebied” y ta los un tiro cu portero Abdul no por a salba, gol pa Britannia, pa empata e wega 2-2! Tres gol den menos cu tres minuut practicamente, algo uniko te cu awo den futbol di Aruba. T’asina halftime a yega, un tremendo parti final di e prome tempo, magnifico!

Wega ta reanuda den di dos tempo, Dakota cu bala y cancha, Britannia ta defende bon y ta purba sali den contra-golpi, pero te cu minuut 63 nei, ta Dakota a domina mas. Por a hasi nota tambe cu e entrenador di Dakota, David Abdul, a logra hasi varios cambio tempran, sin basila, y ta cambia e wega na su fabor, dunando Dakota, diripiente, un otro cara, bon strategia, Britannia a tarda pa desifra esaki.

Pa banda di minuut 65 tin un cierto “toma y dame”, Britannia a reacciona, nan tambe tabatin mas chens awo, pero ta Dakota cu un poco mas. Dakota cu bon yegada y bon chensnan cu Liomar Croes den e trabou di “anker”, facilitando Ricky Hodge, Keano Maduro y Fernando De Sousa den punta, a cuminsa drei hopi efectivo. Den e parti di Britannia nos a observa bon combinacion entre Luis Estrada y Daniel Linscheer. Un hopi bon wega a surgi, pero, ta Dakota cu na minuut 73 a logra tuma bentaha ora cu De Sousa a haya e bala, for di un contra-golpi, y a manda un tiro di largo distancia pa banja e portero Carlos Geerman di Britannia pa hasi e wega 3-2 pa Dakota.

Dakota despues di e gol a hasi “todo por todo” pa evita un contesta di Britannia mane a pasa na final di e prome tempo, e Abehanan a cuminsa press y lansa den atake cu hopi speed, poniendo presion riba Britannia cu mester a hala atras debi na e presion ey, Dakota a pensa bon cu ‘nan miho defensa ta nan atake’ den e caso aki. E strategia ey a duna fruta, Britannia a hala atras y mester a hunga un wega di contra-golpi so. Dakota a desifra e wega for di e punto ey te final, nan a domina te cu pitaso y a controla e wega, e bala y e holoshi, asina a preserva nan victoria y nan tres punto pa mantene nan liderato den e campeonato, Dakota ta hungando manera e campeonnan cu nan ta, ainda inbatibel. Britannia a hunga bon, nan ta den e prome tres nan den e campeonato aki. Un partidaso, un di e miho weganan cu nos a wak e anja aki te cu awo.

Dakota ta lider cu 13 punto, Britannia ta den di tres luga cu 9 punto riba e tabla di Division Honor. Nos “man of the match” ta e anker di Dakota, Liomar Croes, un tremendo desempenjo di e “dream teamer” aki riba cancha.

Click to comment

Leave a Reply

Your email address will not be published. Required fields are marked *

More in Division Honor