Connect with us

Division Honor

E benjamin nan di Division Honor, Brazil Juniors, ta bek cu un victoria di 2-0 riba Bubali

E ekipo nobo den Division Honor, Brazil Juniors, a causa sensacion den e prome simannan di e campeonato actual, pero despues a topa cu e grandinan mes di e liga aki, y a mane haya un “wake up call”, despues a logra un empate na ultimo minuut di wega contra SV Caiquetio den siman 5, un wega cu nan a hera perde. E siman aki ta topa cu Bubali cu ta batayando pa lanta cabes y evita e zona di descenso.

E wega a cuminsa cu Brazil tirando dilanti di biaha, Owen van der Wijne cu un yegada y tiro duro riba porteria di Bubali, cu a bai halto, pero Brazil a dicta e tono di wega for di e punto ey caba.

Brazil ta sigui cu su wega ofensivo ayuda pa e velocidad di nan hungadonan, Bubali ta mas den un rol di counter y na algun oportunidad a logra los tironan di peliger y otro yegadanan, vooral di e veteranisimo estelar Maurice Escalona, cu te awo tin un tremendo temporada.

Den e hopi yegadanan di Brazil, ta e gran portero di Bubali, Rudolf Benita, ta esun cu a logra salba su ekipo y mantene nan den wega, salbando varios tironan riba gol. Benita ta biniendo di un super temporada e campeonato pasa, unda el a keda como finalista di “Guante di Oro” den e evento di “Futbol Aruba Ballon D’Or”.

Cu hopi yegada y chens pa gol den e prome tempo, toch Brazil Juniors no a logra concretisa pa tuma bentaha riba Bubali, apesar di e bon esfuerso di algun di nan hungadonan en especial Shequan Cornett y Kenroy Ranger, ken nan tabatin un tremendo prome mita, enfin, halftime a bai aden 0-0.

Den e di dos mita, Brazil cu miho insistencia y hamber pa gol, apesar cu e prome minuutnan e wega tabata un di banda pa banda, te cu minuut 52, unda cu e estelar Ranger mes a hasi un escapada riba hala drechi pa penetra den area penal, hasi un pase perfecto pa su companjero Owen van der Wijne cu no a basila pa casi bora e net pa e prome gol di e partido, Brazil juniors 1 Bubali 0.

Na minuut 60 ta Ranger mes a penetra den area penal y ta hay’e su so cu portero Benita pero Benita ta salba su ekipo cu un salbacion spectacular. E wega ta keda 1-0 pa Brazil, pero nan no ta para eynan, for di minuut 70 ta Van der Wijne ta tuma over y ta logra varios penetracion den e zona di peliger di Bubali, cu tabata awo un poco “replega” atras sin mucho salida, door di e presion enorme di Brazil y nan atake feroz. Na minuut 74 ta Van der Wijne atrobe cu un escape y un tiro potente cu ta rebota y keda draai den e area chika di Bubali, su companjero Samson Occean ta probecha y pusha e bala den gol pa hasi e wega 2-0 pa e oncena di ‘p’ariba di brug’.

Un resultado husto te cu awo, pero, realidad ta cu Bubali no por a contra-aresta. Brazil tabata superior, nan a sigui pusha dilanti, Cornett, Ranger, Van der Wijne y demas causando tur sorto di dolor di cabes pa e defensa di Bubali, y danki na portero Benita a wanta e wega 0-2 te cu pitaso final.

Un bon resultado pa Brazil Juniors, pa gana tur tres punto y subi riba tabla di posicion di Division Honor. Bubali ta keda cu 4 punto, serka di e zona di ‘promocion/degradacion’. Nos “man of the match” pa e wega aki ta Owen Van der Wijne di Brazil Juniors.

Click to comment

Leave a Reply

Your email address will not be published. Required fields are marked *

More in Division Honor