Connect with us

Division Honor

Brazil Juniors ta madurando dilanti nos wowonan, ta gana RCA 3-0 na un manera convincente!

Brazil Juniors no ta bo tipico ‘ekipo cu a caba di ascende’ pa e division mas halto. Nan ta hungando nan wega cu a hasi nan un ekipo dominante for di nan tempo den Division Uno caba. Despues di a sali campeon den e division ey, nan a cuminsa reforsa cu otro hungadonan cu ya tabata milita den e Division Honor of cu experiencia grandi caba, pero den esencia cu a bai bek cas ya cu ta cu Brazil Juniors nan a lanta originalmente. Apesar di refuersonan mane Kenroy Ranger y Shequan Cornett, entre otro, nan a logra mantene e ekipo mescos cu for di tempo di Division Uno, e spirito di e ekipo tambe a keda mescos, e motivacion..hopi halto.

A yega e dia di midi forsa cu un ekipo grandi mane RCA di Solito, e mas campeon di tur, apesar di a perde nan hegemonia den e ultimo anjanan, toch ta RCA nan ta! RCA te na e partido aki tin 9 punto den 5 wega, den bataya pa ‘top cuater’, cu un derota so. Ya Brazil a topa cu otro dos grandi caba, nan a bataya Nacional te final pa perde 2-3 den un tremendo partidaso. Despues nan a topa cu e campeonnan Dakota unda cu di berdad nan a haya un les y a keda humilde den derota di 4-0. Awe ta dia di un otro test grandi mas, testnan cu ta hacibo kibra of crece..of tur dos.

E wega a cuminsa hopi timido, dos ekipo cu tabata cauteloso, studiando otro pa mas of menos un bon 12 minuut n’ei. Brazil ta cuminsa tuma mas iniciativa mientras cu e wega ta progresa, RCA ta wardando patras, respetando e velocidad imponente di e “Uptown Boys” nan. Respet por cierto tabata di ambos banda, un wega cu tabata en general hopi deportivo tambe.

E partido ta gana ritmo, mane a spera, Brazil ta tira dilanti y ta cuminsa yega mas y mas, cu bon chensnan, pero RCA tambe cu varios chens pa bai ariba, un “toma y dame” ta mane nos por califica e wega te cu halftime, ambos ekipo cu chens mientras cu nan ta pusha dilanti lagando habri den defensa. Gol si no a cai, inexplicablemente toch paso tabatin momentonan di gol pa ambos.

For di un wega bastante nivila, indica tambe pa e marcador di 0-0 na halftime, ta Brazil Juniors a cuminsa e di dos tempo na un otro nivel, ta mane cos e “pep-talk” den camerino lo por a traha, of ta ‘mas bien tambe’ cu a cuminsa implementa un otro strategia, a cuminsa press halto, poniendo hopi presion riba e defensa di RCA, unda cu e oncena Tricolor no tabatin salida, djeynan tambe Brazil a sabi di hasi bon pase y liher den nan contra golpinan, cu mayoriamente tabata cuminsa for di un poco dilanti medio-cancha caba.

E chensnan di Brazil Juniors a cuminsa bira hopi mas preciso, skerpi na un manera di bisa. Na minuut 47 caba ta Owen van der Wijne den un “fastbreak” ta transporta rapido y ta hasi bon pase pa Kenroy Ranger na banda drechi, unda Ranger ta pasa hopi liher pa haya Samson Occean habri riba banda robes dilanti di e gol di RCA, unda Occean no ta basila y ta pone e bala den net pa e 1-0 pa e “Uptown Boys” nan di Brazil, un gol di velocidad, toke y precision, un arte realmente.

No a pasa ni tres minuut despues di e prome gol di Occean, ora cu Kenroy Ranger tabatin un escapada atrobe y a los un tiro duro cu a wordo rechasa pero den e rebote Owen van der Wijne a sabi di haya e bala y a probecha pa anota e di dos gol di e wega pa pone Brazil Juniors ariba 2-0, dos gol den tres minuut, asina liher cosnan por cambia!

E “Uptown Boys” nan ta sigui cu un diluvio di atakenan, un trei otro, Van der Wijne cu yegada atrobe a hera aumenta e marcador na minuut 52, net despues di su mesun gol, RCA no tabatin contesta, nan tabata mane un boxdo cu ta tambaleando. E entrenador di RCA ya a hasi varios cambionan clave di hungadonan, tratatando di trece control y calmo, pa lanta cabes!

Den e siguiente cuarto di ora of mas ta RCA a cuminsa impone ritmo, y a cuminsa haya hopi yegadanan, nan tabata batayando sin duda, e varios yegadanan di peliger cu por a cambia e resultado pero sin por a score por lo menos un gol, p’asina drenta e wega, pero entre nan y e porteria tabat’ey e portero Marvin Irausquin, cu a cuminsa domina pa defende e resultado di su ekipo. Salba tras di salba, e marcador a keda 2-0 pa Brazil Juniors, RCA a tira “todo por todo” sabiendo cu e hobennan di Brazil lo bai explora e contra-ofensiva tambe sin duda, pero tabata tempo pa tuma risico.

Chensnan di gol di RCA, di Erick Santos y e goleador Ronald Gomez a wordo frustra den hopi ocasion pa Irausquin, hasta den un ocasion un punta di pia di Kenroy Ranger, un bala di Santos cu tabata bayendo aden caba! Bon defensa tambe a yuda Brazil hopi, pero, no tin duda cu RCA a bringa te final p’e gol ey, pero manera e dicho ta bisa na Spanjo; “el que no hace, se le hacen”, esey tabata e storia den e ultimo cuarto di hora di wega. RCA a faya den anota e gol tan importante ey, y den un contra-atake na minuut 85, un escape di distancia di Owen van der Wijne unda el a penetra area penal y fusila portero Ersamus, den un habri di wowo, e gol di knockout fulminante, y e victoria importante di Brazil Juniors riba e grandinan di Solito, RCA.

Toch na minuut 90 ainda RCA por a haya nan gol di honor, pero Marvin Irausquin atrobe saliendo leu for di su porteria ta salba su “cleansheet”, un biaha mas! Pitaso di referee De Leca ta pone punto final na e wega aki, den un di e miho weganan cu e fluit tambe den e campeonato aki, un fiesta di futbol den tur sentido. Brazil Juniors ta acumula awo 11 punto pa drenta provisionalmente den di cuarto luga riba tabla, RCA ta keda den di seis luga cu 9 punto.

Den un wega cu tanto actuacionnan excepcional manera Kenroy Ranger, Owen v/d Wijne, Samson Occean y otronan, nos ‘man of the match’ den e wega aki ta Marvin Irausquin, portero hoben di Brazil Juniors. Ta parce cu futbol di Aruba ta ‘alive and well’ den bon man di e generacion nobo.

Click to comment

Leave a Reply

Your email address will not be published. Required fields are marked *

More in Division Honor