Connect with us

Division Honor

Britannia no tabata por cu RCA den wega clave di siman 9

Den e ultimo siman prome cu e “Christmas break” den futbol Division Honor, e prome wega tabata entre SV Britannia, ekipo cu no mucho tempo pasa tabata lidera e tabla di clasificacion, pero, cu recientemente a perde nan “mojo” pa di pronto drenta den un racha perdedo. SV RCA “en cambio” ta den un mihof orma despues di a cuminsa e campeonato un poco “slow” pero no necesariamente negativo, pero hecho ta cu nan tabata consistentemente den mita di tabla.  Cosnan a cambia hopi desde e victoria improbable cu a kibra e invicto di Dakota algun siman pasa. Prome cu e wega aki RCA tabata den di cinco luga y Britannia den di tres luga den e clasificacion.

RCA a cuminsa e partido dicidi na busca e gol pa habri marcacion, Britannia a responde di biaha y tambe a tira dilanti, RCA hayando e apertura necesario pa hasi contra-golpi a sa di yega den manera peligroso na minuut 13 caba, y den un tiro liber cerca di area penal, e bala ta dal den tubo y cu bon intervencion di portero Carlos Geerman di Britannia, e wega ta keda 0-0, di momento.

Mas atakenan ta sigui pa RCA, Frederick Gomez na minuut 17 cu bon yegada, lagando atras tres defensa di e Pumanan pa net na ultimo chip e bala cu a sali net na banda. Pa minuut 20 RCA tabata dominando bala y cancha. Frustracion a mane drenta den seno di Britannia pa minuut 21 unda tabatin dos carchi geel otorga na e oncena di Piedra Plat. Pa minuut 27 p’adilanti e wega tabata hopi duro, hasta bruto, hasta violento.

Britannia toch tabatin un paar di momentonan special, mane e yegada orchestra pa Luis Estrada cu dos otro companjero na minuut 30, toch envano paso e gol no a drenta. E wega bruto a sigui tambe, culminando den un carchi cora pa Carl Geerman di Britannia despues di incidente violento.

RCA cu varios intento probechando e bentaha numerico riba veld, no a logra concretisa te ora cu referee Daisy Christiaans a pita pa halftime, empate na cero.

Den e di dos mita cu Britannia hungando cu dies homber, toch nan a tira dilanti buscando un gol di sorpresa den momentonan “flat” den e wega di ambos ekipo. For di minuut 54 RCA a cuminsa ‘press riba e pedal’ y tuma e motin di e wega aki, Jean Luc Bergen siendo nan lider di orchesta, toch despues di varios intento, e gol no a yega ainda. Na minuut 60 for di un tiro di skina, RCA ta haya un bala cu ta lora den area penal di e Pumanan unda Frederick Gomez ta anota e gol di bai ariba pa e club di Solito, Gomez su di 8 gol di e campeonato pa tuma liderato riba tabla di goleador, RCA 1 Britannia 0.

Despues di mas incidente di wega bruto RCA ta anota atrobe pa aumenta bentaha na minuut 65, un joya di gol di distancia net na rand di area penal, un tiro cu “comba” di Bergen, cu a hasi un “media vuelta” pa hasi e tiro, su specialidad sin duda. RCA 2 Britannia 0.

RCA tabata sigui busca mas gol, “ora e planchi ta cayente” probecha! un poco minuut despues na minuut 72, ta turno pa Jean Pierre Fingal pa pone su marca riba e wega aki, anotando pa hasi e wega 3-0 pa RCA, tres gol den 11 minuut pa e Tricolornan!

RCA ta sigui insisti buscando mas gol ainda cu dominio di bala, pero envano. Britannia asina mes tambe ta busca y ta haya un paar di chens chikito pa corta bentaha pero portero Raizel Jansen cu otro wega solido a frustra e Pumanan pa sigura su “clean sheet” den e wega aki.

Pa ora cu e pitaso final a yega pa RCA a sigura tur tres punto den e wega clave aki, un wega pa e tercer luga di Division Honor pa termina e prome rond di competencia. Asina ta cRCA t’awo den posicion tres cu 17 punto, Britannia ta baha pa e di cuarto posicion cu 15 punto. Nos “man of the match” ta Jean Luc Bergen, e medio campista di RCA.

Click to comment

Leave a Reply

Your email address will not be published. Required fields are marked *

More in Division Honor