Connect with us

Lifida

Futbol Division U5 ta un realidad, asina el a bai e dia aki, Diasabra 2 di Februari, 2019 – un verslag chikito cu observacion.

Futbol division U5 ta “andando biento en popa” mane e dicho ta bisa na Spanjo, cosnan ta lorando. E division pa e muchanan bou cinco anja ta un projecto nobo. E biaha aki mi a hasi algun observacion pa comparti cu bosonan.

Riba e dia aki mayoria clubnan a atende e evento na ora, cu suficiente muchanan pa forma ekipo pa competi, pabien p’esey!

Mi a observa cu 5 di e 7 ekiponan riba schedule e dia ey a cumpli mane debe ser pa e evento bai door na tempo y corectamente, e ekiponan a mehora tambe den e aspecto di trese nan propio balanan di futbol y awa pa e muchanan.

Nos tin cu enfatisa cu ‘yega na tempo’ ta crucial, pa e evento bai ‘vlot’, semper teniendo consideracion tambe cu esunnan cu ta percura pa yega na ora. E weganan tambe mester cuminsa preferiblemente tur na mesun tempo, si esey ta e caso, nos por hasta indica inicio y final di tempo na un manera general (mane tabata e caso na e dia final di e prome buelta), pero si no t’asina anto e mesun leidernan mester tene tempo riba cada veld.

RCA atrobe a logra trece suficiente muchanan e dia aki pa forma hasta dos ekipo y asina yuda nos pa zorg pa tur muchanan participa adecuadamente. Britannia tambe ta un ekipo cu normalmente sa trece mas mucha na U5, den cual caso ta yuda facilita otro ekiponan cu extra hungado si mester, of pa sigura cu tur wega ta bai door teniendo na cuenta cu tin ekiponan cu no sa presenta mes of presenta incompleto.

Mane ta rutina, Gilberto Spataro y e coordinadornan ta hasi nan best pa duna un man y promove comunicacion entre e clubnan, ademas di percura pa e terenonan ta “set up”, p’asina cos bai na ordo, p’e weganan cuminsa na tempo y cu tur mucha participa y diverti nan mes.

E ekiponan tambe mester comunica bon cu otro, un bon ehempel di esey ta con Mr. Sambo di RCA ta anda consistentemente. E rason pakiko e comunicacion entre e ekiponan ta importante, ta pa e muchanan, ta nan ta e mas principal, na un manera di bisa nos tur mester cuida y guia e muchanan conhuntamente, apesar cu ta diferente clubnan, cooperacion ta clave, yuda tur mucha! Ta e futuro di Aruba ta den wega.

Ainda nos ta observa cu tin hopi gritamento na banda di cancha. Apesar cu si ta necesario pa guia y instrui e muchanan den algun instancia, mester zorg pa laga e muchanan hunga tambe, e actividad mester ta “fun” pa e muchanan, no tin mester di pone presion riba nan y crea stress, ta U5 esaki ta! Tene na cuenta tambe cu den U5 no tin ganado of perdedo (ta den e dia final di campeonato so ta tene “score” y hasi un torneo chikito cu ganado). Na final, lo mas importante ta pa e muchanan participa y pasa bon. Estudio di KNVB ta resalta cu muchanan mester sinja gusta e wega di futbol prome cu tur cos, gana of perde na edad di mucha chikito no ta crucial ainda, esey ta bin mas despues. 

Den hopi instancia mester laga e dos leidernan so instrui e muchanan riba veld, en bes di tanto envolvimiento di e parientenan na banda. Eigenlijk e parientenan mester ta un poco mas aleha for di e cancha, pero primordialmente mester evita gritamento den direccion di e muchanan of e leidernan, aplaudi y encurasha nan ta mas importante, inculca positivismo tur ora, esey nos mester mas! “e muchanan mester pasa bon y sinja e wega di futbol, ta pa nan nos t’ey” Carlos Quandt di River Plate a yega di bisami.

E dia aki nos a wak cu na e wega di Estrella vs Caiquetio na veld 1, tabatin menos di lo menciona, y na nos padecer, e proceso a bai hopi mihor cu e otro weganan, e muchanan eynan a participa sin perde mucho “focus” y nan a diverti nan mes, un bon ehempel pa sigui sin duda.

E leidernan di cada ekipo ta importante, nan ta zorg tambe pa cosnan bai bon, pa tur mucha! Tambe mester remarka cu no tin referee na e weganan, e leidernan ta djies percura pa tur cos bai na ordo, segun regla, sin problema, toch e muchanan mester di guia tambe pa nan cuminsa sinja futbol, esey ta funccion di e leidernan. Nan ta percura tambe pa tene tempo di wega di 10 minuut cada bes (den tres tanda), p’asina e muchanan no pasa di tempo sin haya un ‘break’ y bebe awa of otro liquido, pa no deshydrata.

E bunita di e eventonan aki di U5 ta cu na final di wega e leidernan ta percura pa e muchanan alinea p’asina duna man na otro, pa celebra deportivismo y amistad. Ora cu nos mira esaki, y tur hende adulto tambe ta feliciteer otro cu un sonrisa, nos a logra nos meta pa cu e muchanan U5.

Den union tin forsa sin duda, un bon siman na tur!

 

Click to comment

Leave a Reply

Your email address will not be published. Required fields are marked *

More in Lifida