Connect with us

Division Honor

Brazil Juniors ta sigui riba e onda victorioso den di dos rond di campeonato Division Honor, ganando River Plate 5-1

Den e prome wega di e di dos rond di e campeonato 2018-2019 di Division Honor Brazil Juniors a sigui impone nan wega bistoso cu nan a exhibi den e prome rond di e temporada, nos por bisa cu ya e “Uptown Boys” no ta sorprende nos mas, nan bon wega ta di spera awo.

E oncena Brazilenjo a cuminsa tempran cu presion riba e porteria di River, hayando un penal tempran caba na minuut 4, unda cu Charles Alexander a anota e prome gol for di e punto penal pa pone su ekipo den bentaha di 1-0.

Brazil a sigui impone nan wega di “balbezit” y atakenan relampago, probechando di nan velocidad imponente y na minuut 19 nan a amplia bentaha cu un di dos gol di nan medio-campista Shequan Cornett, Brazil Juniors 2 River Plate 0.

Net prome cu halftime na minuut 43, e delantero di Brazil Theo Teixeira a anota un di tres gol pa hasi e wega 3-0 pa e oncena di ‘p’ariba di brug’. River no tabatin mucho yegada, nan wega tabata sin coordinacion cu hopi imprecision e anochi aki. Asina tambe halftime a bai aden cu Brazil Juniors den bentaha di 3-0.

Na comienso di e di dos tempo ta mesun cos e wega a keda, Brazil Juniors dominando bala y cancha, nan yegadanan tabata mas precies, vooral nan contra-golpinan! Apesar cu nos mester ta honesto y bisa cu nan di cuater gol a yega net na un momento cu River Plate tabata hopi cerca di corta bentaha, hasta nan a cuminsa domina bala y tereno, tocando hopi mihor, pero futbol t’asina, un contra golpi y Kenroy Ranger, e finalista di “Ballon D’Or” e anja anterior, a anota e gol pa hasi e wega 4-0 na minuut 55, un golpi fulminante pa e oncena di Madiki, paso, un 1-3 na minuut 55 ainda hopi cos por a pasa.

Na minuut 84 ta Kenroy Ranger mes a amplia e marcador mas ainda cu un escape hunto cu su companjeronan pa hasi e wega 5-0, su di dos gol di e wega y su number cuater di e campeonato.

Marvin Irausquin e portero hoben di Brazil Juniors tabata asina serca di consegui su di seis “clean sheet” den e campeonato aki si e wega a caba cu e marcador aki, pero, net na minuut 89, casi na final di wega, River Plate ta anota nan gol di honor, den pia di (ironicamente) nan portero suplemente no mas, Zyron Todd, cu a drenta den wega algun minuut previo, for di un rebote Todd a haya su chens pa anota y no a basila pa anota e gol pa su ekipo.

Asina e partido a termina, un bon victoria di di 5-1 di Brazil Juniors pa bai cu e tres puntonan, ‘Man of the Match’ ta Kenroy Ranger. Brazil Juniors awo tin 17 punto, provisionalmente den di tres luga riba tabla y River Plate a keda cu 6 punto den di ocho luga riba tabla di clasificacion.

Click to comment

Leave a Reply

Your email address will not be published. Required fields are marked *

More in Division Honor