Connect with us

Division Honor

Resumen di siman 11 den Division Honor, un siman cu sorpresa!

SV Bubali vs SV Dakota

E weekend di futbol den Division Honor a cuminsa cu e clash entre Dakota, e campeon di Aruba y ganador di Copa Betico Croes djies un paar di siman atras, y Bubali, un ekipo cu ta purbando di sali for di e zona di peliger di degradacion riba e tabla di posicion. Dakota cu a bin di perde cu Nacional den un bon wega e siman anterior, unda nan a perde nan liderato riba tabla, mientras cu Bubali a gana Britannia e siman previo. Dakota, cu no tabatin nan miho dia riba cancha, asina mes ya a bai ariba na minuut 8 di wega cu un gol di Fernando de Sousa, Dakota ariba tempran 1-0. Na minuut 20 e Abehanan a aumenta bentaha ora cu Johnson Rincon a anota pa hasi e wega 2-0, Dakota parce cu tabata den “cruise-control”. Na minuut 29 Bubali a haya un “boost” for di nan capitan Maurice Escalona, cu a busca y a haya pa anota pa corta e bentaha di Dakota, 1-2. Dakota sorprendi cu e wega di Bubali y nan actitud di nunca “ give up” a cuminsa sinti presion for di e punto aki. Halftime a bai aden cu Dakota den bentaha di 2-1, pero tabatin un aire di sorpresa na stadion. E di dos tempo cu ambos ekipo buscando gol y despues di hopi “toma y dame” te minuut 66 ta Bubali a anota pa empata, gol di Anthony Arends, 2-2, e “momentum” awo na fabor di e “Orguyonan di Nort”. Net cuater minuut despues Bubali a bolbe anota pa medio di Mark Jacobs pa hasi e wega 3-2. Dakota desespera buscando empate, pero ta Bubali mes den un contra-golpi ta anota atrobe na minuut 77 pa medio di Ruben Escalona pa aumenta e score na 4-2. Un banjo di awa frieuw pa e Dakoteronan, pero cu nan berguensa deportivo a sigui bataya y a haya nan gol di corta bentaha na minuut 80, un joya di gol di Ricky Hodge, pero e wega a caba 4-3 na fabor di Bubali. ‘Man of the Match’ ta Maurice Escalona di Bubali.

SV Britannia vs SV La Fama

Riba Diasabra den prome tanda, Britannia a enfrenta La Fama den un partido importante pa ambos, Britannia ta purba bons bek for di un racha menos bon y nan derota na man di Bubali den siman 10 y La Fama tratando na sali for di zona di degradacion, bininiendo di un derota grandi contra RCA e siman previo. Un wega pareu den e prome minuutnan cu ambos ekipo tirando den atake, pero, ta Britannia pa medio di e incansabel Luis “Coco” Estrada a anota pa via di penalty pa bai ariba 1-0 na minuut 11. E wega ta sigui bon balansa pero ta Luis Estrada mes atrobe ta aumenta bentaha pa e Pumanan cu su di dos gol na minuut 22. La Fama ta reacciona bon y nan minuut 34 ta nan goleador Pieter Susebeek a anota pa corta bentaha na 1-2. Despues di halftime den un wega basta nivela cu hopi batayanan, La Fama hungando cu 10 homber for di minuut 77 debi na expulsion den un wega duro, buscando e empate, toch ta e estelar di Britannia, Luis Estrada, ta anota un biaha mas na minuut 88 pa cementa e wega aki na fabor di e Pumanan di Piedra Plat, hasiendo e wega 3-1, cu tambe tabata e resultado final. ‘Hattrick’ pa Luis “Coco” Estrada cu ta tambe nos ‘Man of the Match’.

SV Estrella vs SV Brazil Juniors

Den e di dos partido di Diasabra Estrella a enfrenta Brazil Juniors, e ekipo revelacion di anja aki den Division Honor. Estrella ta bin di un empate cu Caiquetio y  Brazil Juniors di un victoria contundente riba River Plate den siman 10. Den e prome rond di e campeonato, Brazil Juniors a gana Estrella 2-0 den un bon partido, e wega aki tabata esun di revancha pa e “Naranhadanan”. Un partido bastante balansa for di cuminsamento, pero ta Estrella ta anota prome pa bai ariba na minuut pa medio di Jean Pierre van der Linden den su di dos wega cu Estrella e campeonato aki. Halftime a bai aden cu Estrella cu bentaha di 1-0. E di dos tempo a sigui na mesun ritmo, un partido dinamico cu hopi accion, pero tambe intenso cu hopi carchi, geel y tambe cora. Brazil a insisti y ta haya nan chens na minuut 59, ora cu Frederick “Fecho” Brown ta anota e gol di empate 1-1. Despues di hopi wega di banda pa banda y hopi intenso, Estrella ta lansa den atake na minuut 77, unda cu Anuar Kock cu e hugada di e partido ta penetra den area penal di Brazil Juniors for di circulo central, lagando varios hungado atras, yegando linea final ta hasi un cruce perfecto riba pia di Jean Pierre van der Linden cu ta djies tap in pa su di dos gol y e 2-1 na fabor di Estrella. Cu hopi bataya, deportivo y anti-deportivo, e partido ta termina 2-1 pa Estrella. Nos ‘Man of the Match’ ta Anuar Kock di Estrella.

SV RCA vs ASV River Plate

Den e partido number cuater di e fin di siman, RCA a enfrenta River Plate den e ‘Derbi di Playa’. RCA, un ekipo cu a cuminsa ascende na final di e di prome rond yegando den e top cuater pa dia cu e campeonato a yega na e receso di Pasco, a perde sorpresivamente den e semi final di ‘Copa Betico Croes’ cu Porto Caravel, locual a condusi na un cambio den e direccion tecnico. River Plate ta den un situacion hopi complica bringando pa nan bida den e ultimo lugarnan riba tabla. E partido den e prome tres pa cuater minuutnan tabata domina pa River Plate, mientras cu RCA tabata busca na establece nan wega. E pressing halto tempran di River tabata duna resultado, pero no pa mucho tempo. RCA den un habri di wowo a haya un buraco den e defensa di e ekipo di Playa Pabou y Frederick “Ronald” Gomez no a perdona pa hasi e wega 1-0 y a consolida su liderato riba e tabla di goleadornan. River despues a cai den otro y a bandonan nan plan inicial di wega. RCA di aki a domina y na minuut 19 e mariscal di medio-campo,Jean Luc Bergen, a anota pa hasi e wega 2-0. Net dos minuut despues ta e goleador Frederick Gomez su turno atrobe pa anota pa hasi e wega 3-0, djei e avalancha di golnan a continua, River Plate no tabatin contesta. E golnan cu a sigui tabata na minuut 44, Jean Pierre Fingal pa 4-0, te cu halftime. E prome minuutnan di e di dos tempo River a bolbe cu iniciativa, nan a organisa y controla nan mes miho, pero kizas mester a tira mas dilanti pa press RCA atras. E golnan di RCA a sigui na boshi atrobe! Golnan na minuut 62, atrobe pa Bergen di penalty pa 5-0, na minuut 67 tabata turno di Andrew Martinez pa e 6-0, na minuut 82 tabata Fingal atrobe pa e 7-0, y ta Fingal mes a anota e ultimo gol di wega na minuut 89 pa su di tres gol, su ‘Hattrick’. RCA a domina y no a perdona, awo nan ta den di dos luga riba tabla, ‘Man of the Match’ ta Ronald Gomez.

SV Caiquetio vs SV Nacional

E ultimo partido di siman 11 den Division Honor tabata entre e actual lider di campeonato Nacional enfrentando Caiquetio. E partido di cuminsamento tabata hopi competitivo, un sorpresa placentero. Caiquetio a presenta cu un plan di wega solido, si, un poco defensivo, pero cu hopi disciplina a bataya Nacional igual pa igual. Nacional den hopi ocasion a cai tambe den e “off-side trap” di e Indjannan di Paradera. E Dragonnan di Nort a bai ariba na minuut 18 pa medio di un gol di e ultimo ganado di “Golden Boot”, Devis Oliveros. Caiquetio a sigui hunga Nacional na e mesun manera, sin flaquea, sin mester di bandona nan strategia di wega, en cambio, nan a logra empata e wega na un bon manera na minuut 37 pa medio di e gol di Juan Camilo Sanchez, 1-1. Apesar di e bon momento di Caiquetio, e Dragonnan toch ta logra aumenta bentaha net prome cu halftime na minuut 43, 2-1 pa Nacional. Despues di halftime e wega ta sigui riba mesun ritmo, un wega bon balansa, Nacional tirando den atake, Caiquetio respondiendo cu bon defensa y contra-golpi efectivo. Ta te na minuut 73 otro gol ta cai, Devis Oliveros ta bolbe anota pa aumenta e bentaha di Nacional na 3-1. Caiquetio a duna bon bataya pero na final ta Nacional a sali victorioso cu anotacion di 3-1, asina a consolida liderato riba tabla di posicion cu 5 punto di bentaha riba RCA. Caiquetio ta keda cu 6 punto, pero a subi un plaza pa posicion nuebe, pasando riba River Plate pa miho averahe di gol, y solamente dos punto tras di La Fama. Nos ‘Man of the Match’ ta Claudio Cavalcante pa su dominio den medio-campo den e wega aki.

Click to comment

Leave a Reply

Your email address will not be published. Required fields are marked *

More in Division Honor