Connect with us

Division Honor

Resumen di siman 17, un siman determinante cu sorpresa den Division Honor


Siman 17 a resulta di ta un fecha decisivo den Division Honor, pero ainda e storia di e campeonato aki no ta full scirbi! E cuater prome ekiponan si ta determina, pero, pa e order di clasificacion final mester warda pa e ultimo siman di wega, unda nos lo wak alfin tambe ken lo degrada y ken lo hunga play-off promocion/degradacion. Ata aki un resumen di e weganan e siman cu a pasa.

Estrella vs Nacional:

E Naranjadanan a bin for di un empate cu sabor di victoria den siman 16 contra nan rival mas serca, Bubali, cu ken nan tabata den bataya pa drenta play-off. Despues di e empate ey, Estrella a keda cu un bentaha minimo di dos punto so riba Bubali biniendo den e siman aki. Hungando contra Nacional nunca ta facil, sacando un punto mes lo tabata un bon logro pa Estrella bayendo den e ultimo fecha, pero nan no tabata conforme cu esey so, nan a bin pa tur tres punto.

Estrella a domina e partido aki y a sopresa hopi hende cu un tremendo desempenjo. Estrella, un ekipo cu a perde asina hopi hungadonan na lesion e anja aki, a sabi di supera tur e contratemponan ey y a bin di ‘menos pa mas’ segun e campeonato a progresa, awo Estrella ta den un bon ‘momentum’ pa bai den play-off.

E dominio contra Nacional a refleha tambe den e resultado, cu un gol tempran di Joel Geerman, cu ta e ‘man of the match’, na minuut 11 pa e 1-0. Pero nan no a baha man henter e wega, y na minuut 64, ta Melrick Dabian a hasi e wega 2-0 pa e club di Santa Cruz, hungando sin nan capitan Pancho Croes pa di dos wega consecutivo, e ekipo tabata semper bon motiva y determina cu bon ‘wega den ekipo’.

Estrella a keda asina cu 30 punto, clasificando pa play-off. Nacional tin ainda 37 punto, empata cu Dakota pero cu un average di gol inferior. Estrella lo enfrenta Dakota den e ultimo fecha y Nacional lo hunga e ‘derbi di Noord’ contra Bubali.

Britannia vs Brazil Juniors:

Britannia tabata cu speransa ainda pa yega play-off drentando siman 17. Nan tabatin mester di gana nan dos ultimo weganan, sperando cu Estrella y Bubali lo perde nan weganan. Pero e victoria di Estrella den e partido previo a dicta nan sentencia y a elimina e Pumanan for di contencion p’e anja aki.

Den e wega contra Brazil Juniors nan a domina for di comienso contra un ekipo cu a bin ‘di mas pa menos’ e anja aki. David Castro a habri marcacion pa Britannia nan minuut 26. Brazil a empata e wega na minuut 33 cu un gol di Howard Nedd, Ora cu nos a spera un wega sera for di e momento ey, pero, ta David Castro mes un rato despues a anota un di dos gol pa su ekipo bai ariba atrobe, 2-1, na minuut 38.

Hubert de Cuba / Vision Images

Brazil Juniors a cuminsa sucumbi despues di e carchi cora otorga na nan defensor Gerald Moreta na minuut 42 y un penalty duna na Britannia, unda cu Luis ‘Coco’ Estrada, cu a faya un penalty caba anteriormente, a anota e biaha aki pa hasi e wega 3-1 pa e oncena di Piedra Plat.

Despues di halftime na minuut 47, Jonathan Ruiz a anota pa aumenta bentaha na 4-1. Cu un homber menos Brazil Juniors tabatin poco opcion pa haya un miho resultado, asina mes e ‘Uptown Boys” nan a bringa te final, na un manera decoroso, y a hasta a anota un di dos gol casi na final di e wega pa medio di Benedict van der Biezen, na minuut 87. Asina e partido a termina, un bon victoria di Britannia cu lastimamente lo keda afo di play-off e anja aki. David Castro cu su dos golnan ta e ‘man of the match’.

Bubali vs RCA:

Bubali tawata cinco punto so tras di Estrella den e bataya pa play-off prome cu e wega aki y cu un victoria lo a keda net tras di Estrella cu dos punto so di diferencia, bayendo den e ultimo siman, pero, nan a topa cu un RCA hopi determina. E wega tabata bastante pareu pa mayoria di tempo, cu Bubali saliendo di biaha pa anota gol, ya cu nan tabatin mester di un victoria, toch por a sinti un aire di desesperacion, cual a afecta nan wega masha hopi, nan tawata mucho ansha y no a hunga nan wega di custumber. RCA den un ‘counter’ na minuut 35, unda Jean Pierre Fingal ta anota pa e 1-0 p’e Tricolornan.


Hubert de Cuba / Vision Images

Despues di un wega di banda pa banda, pero cu un RCA mas controla, e wega tawata tambe bastante fisico, duro, cu hopi carchi, incluyendo un carchi cora pa Erik Santos den extra tempo. E di dos gol di RCA, y e golpi fulminante pa Bubali su aspiracion di bay play-off, a cai na minuut 90, atrobe pa Jean Pierre Fingal, pa hasi e wega 2-0, eliminando Bubali. Portero di RCA, Raizel Jansen, ta nos ‘man of the match’ den e wega aki.

La Fama vs Caiquetio:

E partido aki tabatin su importancia tambe, e ekiponan ta trata di ‘evita’ perde punto pa no cai den zona di ‘descenso automatico’. Caiquetio a cuminsa e wega hopi motiva y cu determinacion. Na minuut 7 caba, Giovanni Thode a anota e gol di bentaha pa e club di Paradera, 1-0.

Djeynan Caiquetio no a baha nan tempo y a sigui duna La Fama hopi contratempo, kitando e iniciativa for e oncena di Savaneta. Caiquetio tabatin un miho wega, La Fama tabatin falta di animo y sentido di urgencia. Caiquetio a sabi di wanta e resultado aki na un manera efectivo cu bon futbol.


Hubert de Cuba / Vision Images

E partido a termina cu bastante wega duro y carchinan, incluyendo un carchi cora pa Ericson Croes na minuut 82, pero, La Fama no a sabi di probecha e situacion aki, e wega a caba 1-0 pa Caiquetio, y awor tur dos e ekiponan, cu mes tanto punto, ta den control nan mes pa evita ‘descenso automatico’ (cu te cu awo ta River Plate), y en bes di esey hunga play-off promocion/degradacion. Giovanni Thode ta nos ‘man of the match’.

Click to comment

Leave a Reply

Your email address will not be published. Required fields are marked *

More in Division Honor