Connect with us

Division Honor

E cuadra di play-off di Division Honor no ta cla ainda bayendo den e ultimo siman

Den un siman 17 di partidonan sumamente importante, pa determina e cuater prome lugarnan riba e tabla di clasificacion di Division Honor, pero tambe pa sa ta ken lo descende automaticamente y ken lo hunga play-off di promocion/degradacion e anja aki.

E prome cuater nan ta defini awo, mientras cu nos sa awo ken ta keda den di cuarto puesto tambe, pero nos no sa ainda ken ta keda den posicion uno, dos y tres! Ken lo keda den e prome puesto y gana e ‘campeonato regular’ no ta conoci ainda.

Dakota ta keto bai lider riba e tabla, cu 37 punto, mesun cantidad di punto cu Nacional cu ta den di dos luga, pero Dakota tin un wega den man tambe, un “inhaal wedstrijd” pendiente contra River Plate debi na nan participacion den e “Concacaf Club Shield” na Corsow. Ademas di e wega contra River Plate April 23, nan lo hunga contra Estrella riba e ultimo fecha April 28.

Nacional tambe a keda cu 37 punto debi na nan derota di 0-2 contra Estrella e siman aki. Nan tin un wega so mas contra Bubali. E Abehanan tin mas chens pa keda cu e puesto number un riba tabla, pero si nan perde tur dos wega y Nacional gana nan ultimo wega, e storia lo ta otro. Si nan keda empata den punto, Dakota tin e miho average di gol, bastante grandi (+28 vs +14).

RCA ta solido den di tres luga cu 35 punto cu un wega mas pa bai, ainda nan por keda cu e titulo di campeon di ‘campeonato regular’ (prome cu play-off), si Dakota perde tur dos wega pendiente y Nacional perde of empata nan ultimo wega, paso, RCA tin miho average di gol cu Nacional (+23).

Estrella cu 30 punto, lo keda cu e puesto number cuater debi na e derota di Bubali na man di RCA den siman 17 cu a pasa, pero nan no por subi mas ni kiko pasa, cu nan ta den play-off, esey ta sigur awo!

Britannia a keda elimina for di contencion pa play-off despues cu Estrella a gana Nacional den e siman aki, nan no tin niun chens mas pa yega den e prome cuater nan, pero, cu un wega mas pa bai, nan por keda cu e puesto number cinco si nan ganan nan wega pendiente cu RCA den e ultimo siman, sperando cu Bubali no golea Nacional den e ‘Derbi di Noord’.

Bubali tambe ta elimina for di play-off cu un wega mas pa bai, un lastima, paso, Bubali tabata e ekipo sensacion den e di dos mita di e campeonato. E empate cu Estrella y e derota na man di RCA a frustra nan chens nan. Nan por keda cu e di cinco puesto, si nan gana y Britannia perde cu RCA den e siguiente wega, of si nan keda cu miho average di gol si nan dos keda empata na punto.

Brazil Juniors, e ekipo benjamin di Division Honor, a cai hopi den e di dos mita di e campeonato, despues di a sorpende tur hende cu nan tremendo desempenjo na cuminsamento. Toch Brazil, e ekipo cu a promove for di Division Uno e anja aki, ta sigura pa keda cu e puesto number shete riba tabla cu 17 punto, y matematicamente no por baha mas di e puesto ey, dus, nan ta sigur di hunga otro anja den Division Honor atrobe!

La Fama y Caiquetio ta empata te cu awo, cada un cu 13 punto den puesto ocho y nuebe, La Fama ainda cu miho average di gol (-21 vs -28). Akinan cos ta bira interesante, paso, si nan tur dos gana of empata nan ultimo wega (La Fama vs Brazil Juniors y Caiquetio vs River Plate), nan lo evita descenso automatico y lo hunga den e play-off di promocion/ degradacion contra e di dos y tres clasifica di Division Uno. Pero, si Caiquetio perde su ultimo wega y River Plate gana nan dos ultimo weganan, e oncena di Madiki lo bai hunga den e play-off ey y no Caiquetio, debi na miho average di gol! Caiquetio lo descende for di e division mas halto.

La Fama ainda no ta cla tampoco, si nan perde nan ultimo wega cu score abulta y River Plate gana nan dos ultimo cu score abulta, ainda River por surpasa La Fama y evita degradacion automatico, tur cos ta depende di miho average di gol den e caso ey, te cu awo La Fama tin un average di -21 vs -26 di River Plate.

Ta hopi cos por pasa ainda, e campeonato aki no a scirbi su ultimo capitulo ainda, nos lo tin cu warda pa e ultimo siman di weganan, keda pendiente cu Futbol Aruba pa mas updates.

Click to comment

Leave a Reply

Your email address will not be published. Required fields are marked *

More in Division Honor