Connect with us

Division Honor

Dakota ta gana Estrella cu e marcador minimo di 1-0 pa inicia playoffs di Division Honor

E prome partido di playoffs di Division Honor campeonato 2018-2019 a toca e “Classico di Aruba” entre Estrella y Dakota.

Un partido cu hopi anticipacion debi na e historial entre e dos clubnan aki, un rivalidad unico den futbol di Aruba, a resulta alfin di tabata un partido di hopi inconsistencia riba e fecha aki. Un partido cu pa mayoria di tempo tabata anti-climatico y slordig, pero, semper yena cu tension y drama si.

Dakota no a hunga un wega cu nos ta custumbra cu ne, e wega di velocidad, dominio di bala, cambio di ritmo, e “Amarillonan” den e oportunidad aki a dicidi di tira bala dilanti pa medio di pasenan largo, pero, ironicamente ta e wega ey mes a paga dividendo pa nan promer gol di e partido.

Na minuut 25, Dakota ta bai ariba pa medio di un salida relampago for di patras di Jean Pierre Heyden unda e ta haya e bala for di Jesus Villamizar for di medio campo, e ta sprint bai na banda robes di e area penal di Estrella, hasi un cruce, precies riba cabes di Fernando de Souza, unda esaki ta conecta perfecto pa anota e prome gol di wega, Dakota 1 Estrella 0.

Dakota ta domina bala y cancha pa mayoria di e prome tempo y tabatin mas chensnan pa aumenta e bentaha, hasta un bala den palo pa medio di Robert Francis, pero no a logra e di dos gol ey, Estrella en cambio cu masha poco yegada.

Den e di dos tempo e Santacruseronan ta cuminsa retene bala mas den medio campo, unda cu Jean Pierre van der Linden ta tuma mas control y distribui bala miho for di e punto ey.

Estrella a haya mas chens di gol den e di dos tempo, e mas cla un chens di Miguel Gutierrez na minuut 50 y atrobe na minuut 81, pero, no a logra concretisa. Nan a bataya te na final cu varios atakenan cu bon yegada.

Dakota tambe por a aumenta bentaha atrobe na minuut 91 y propina e knockout fulminante, si no tabata pa Pancho Croes, cu den e ‘hugada di e partido’ a salba e tiro di Juel Balentien, unda cu el a rechasa e bala cu ya tabata bayendo den net, husto riba linea di gol!

Asina mes e partido a termina cu victoria di Dakota cu e minimo resultado di 1-0. E ultimo dies minuutnan di wega tabata hopi dramatico y sensacional, riba un gran nivel, compensando pa e resto di e partido cu tabata bastante mediocre. Tres punto pa e club Dakotero cu t’asina e lider provisional riba e tabla di posicion di playoffs, sperando resultado di RCA vs Nacional. Nos ‘Man of the Match’ ta Jean Pierre Heyden di Dakota.

Click to comment

Leave a Reply

Your email address will not be published. Required fields are marked *

More in Division Honor