Connect with us

Division Damas

Britannia y RCA ta empata sin gol den e prome wega di Playoff final Division Damas

E miho dos ekiponan e campeonato aki den Division Damas a enfrenta otro den e prome partido di Playoff final pa dicidi ken lo bai ta e campeon di Aruba!

Britannia, e campeon di temporada pasa, a domina den a campeonato regular e anja aki atrobe, terminando den prome luga den campeonato regular y tambe e prome rond di Playoffs, hunto cu RCA, cu a keda den ambos proceso den di dos luga. E dos ekiponan aki tabata claramente e mihor nan den Division Damas e anja aki.

Den e cuadrangular di e prome rond di Playoff nan a domina e contrincantenan; River Plate y La Fama, p’asina alcansa na yega e rond final di Playoffs aki, manera tabata di spera.

E partido den e prome mita tabata bastante pareu, e “Pumanan” cu un leve bentaha den posesion y control di bala, pero, e “Tricolornan” cu bon wega di contra golpi. Ambos ekipo cu yegadanan peligroso cu por a resulta den gol, Marietje Werleman, portero di RCA, en particular tabatin hopi trabou bou di e tres palonan den e mita aki.

Britannia cu bon yegadanan, cu nan protagonistanan den ofensiva; Jennifer Henao, Anouk Bluemink, y tambe Tarianna Doornkamp cu su tironan liber y di skina efectivo, a duna RCA bastante contratempo pa e duracion di e partido. Latisha Martha ta un hungado di RCA cu a sobresali hopi den defensa pa wanta e resultado y tene RCA den bataya.

E di dos tempo ta unda RCA a cuminsa demonstra nan forsa den atake tambe, tabata nan chens pa domina den teritorio Puma e biaha aki. E trio di Christy-Ann Brete, Marjolein Ruitenbeek y Josrine Saladin a sobresali hopi pa e Tricolornan.

Britannia a haya nan mes ta defende mas e biaha aki, pero, nan mes a conta cu e talentonan; medio campista Lisandra Fradl cu a core tur caminda, Michella Werleman cu a bataya hopi, y claro, e talentoso Mylene Croes cu a demonstra di ta un hungado completo di futbol, awendia un portero ainda cu un pia di oro pa tironan potente y peligroso. Mester menciona cu Mylene ta e ganado di e ‘Golden Boot’ di Division Damas anja pasa durante e evenemento di Ballon D’or.

RCA a haya nan mes cu mas yegada den e di dos tempo, pero no por a concretisa, e biaha aki ta Britannia tabata hopi peligroso den nan contra golpi nan.

Un bataya hopi nivela a termina den un empate sin gol, pero toch un wega bastante atractivo y bastante deportivo, digno di un final! Net despues di e partido e ekiponan a alinea y den un expresion di deportivismo pa intercambia “high five” al estilo di NHL Hockey. Algo cu ta e norma tambe den futbol di division nan menor, cuminsando cu U5, pero, por remarka cu nos no ta wak esey ainda den Division Honor! Nos “Woman of the Match” pa e partido aki ta Josrine Saladin di RCA.

Asina e dos ekiponan a keda igual despues di e prome wega di Playoff final di Division Damas. E di dos wega lo tuma lugar Diadomingo dia 19 di Mei, 8:00pm na CDFF na Noord, e partido por resulta di ta decisivo, ya cu e ganado di e partido ey lo corona campeon di Aruba, si encaso tin empate atrobe, lo hunga un di tres partido Diaranson 22 di Mei, 8:00pm na CDGT na Dakota.

 

Click to comment

Leave a Reply

Your email address will not be published. Required fields are marked *

More in Division Damas