Connect with us

Division Honor

Nacional ta bai cu tur tres punto den victoria contundente di 3-0 contra Estrella

E partido crucial entre Nacional y Estrella, dos ekipo sin punto ainda den e prome rond di Playoffs, tabata mas bien un “must win” pa ambos ekipo, tres punto for di e partido aki lo a nifica, mas cu ‘un suspiro di aire fresco’, bai bek di biaha tambe den contencion pa clasifica pa e fase final di Playoffs. Pa e perdedo lo a nifica keda den bom di e tabla di clasificacion, ‘cu un sero hopi halto pa subi’ pa yega final.

E empate entre RCA y Dakota na cero gol Diasabra pasa a causa cu e Playoff aki ta mas interesante ainda, apesar cu hopi lo wak e di otro manera tambe, esta cu tur dos tin cuater punto, aleha toch for di e dos ultimo ekiponan riba tabla.

Nacional a cuminsa di biaha den atake cu bon yegadanan riba e porteria defendi pa Jose Frias Vizcaino, den tur esaki Estrella tambe a contesta hungando nan wega di “balbezit” cu bon rotacion y toke, hayando nan mes cu yegadanan di hopi peliger tempran. Un wega bastante balansa den e prome 20 minuutnan unda Nacional tambe tabatin yegadanan di hopi peliger, unda Pancho Croes a brilla den defensa y Jesus bou di e tres latanan, a mantene e resultado sera.

Despues di e prome binti minuutnan e Dragonnan a mane cuminsa domina, hasiendo pressing halto pa recupera e bala mas frequente, causando hopi situacion di peliger y di gol, unda Defferey Banton, hungando den un rol mas ofensivo den e partido aki, hunto cu Edward Clarissa, a sabi di sobresali pa Nacional.

E prome gol di e partido a yega na minuut 42 pa medio di Devis Oliveros for di un tremendo pase di Rensley Tromp, cu a sprint cu bala for di linea di “middenveld”.

Nacional 1 Estrella 0.

Pa hasi cos pio, Jean Pierre van der Linden di Estrella, a wordo expulsa p’e arbitro despues di dos carchi geel consecutivo pa protesta. Asina tambe halftime a bai aden cu Nacional den bentaha.

 

Den e di dos tempo Nacional cu un bentaha numerico di hungado riba tereno, a sabi di controla e tempo di wega, creando hopi oportunidad di aumenta bentaha, Estrella den un rol defensivo a duna hopi bataya pero “en vano” na final di dia.

Nacional a aumenta bentaha al fin na minuut 56, unda Leonardo Pulido a anota pa e 2-0 for di un oportunidad cu su mes a crea hortando e bala for di defensa di Estrella net pafo di area penal.

Mas dominio a sigui di Nacional y mas bataya di Estrella defendiendo na mes y hasta crea ocasion nan mes di gol tambe. E ingreso di Phaedrick Baromeo y otronan a yuda un poco, y bo lo puntra bo mes, kiko Estrella lo por a hasi cu 11 homber riba tereno, pero, ta Nacional atrobe a sigui domina y a logra anota pa hasi e wega 3-0 na minuut 63, un gol contundente di Edward Clarissa cu asistencia di Devis Oliveros.

Asina tambe e partido ta termina, un victoria importante pa Nacional di 3-0 riba Estrella. Nacional tin awo 3 punto, un so tras di RCA y Dakota, ambos empata cu 4 punto. Estrella ta keda sin punto riba tabla y e siguiente wega contra RCA nan lo ta bringando pa nan bida. E Dragon nan lo hunga siguientemente contra Dakota y un victoria lo pone nan den un tremendo posicion pa bai final. Nos “Man of the Match” ta Edward Clarissa, e talentoso hungado hoben di Nacional.

Click to comment

Leave a Reply

Your email address will not be published. Required fields are marked *

More in Division Honor