Connect with us

Division Honor

RCA a gana Estrella 2-1 p’asina consolida e prome luga riba tabla di Playoffs Division Honor

Foto: Hubert de Cuba /Vision Images

RCA, ainda invicto den Playoffs, a bin di empata cu Dakota den e partido previo y lo kier a logra un victoria contra Estrella pa consolida nan prome luga riba tabla di posicion. Estrella, sin punto te cu awor, a bin pa busca un bon resultado, si no, un victoria mes pa termina e prome rond aki di Playoffs cu algo y drenta den contencion.

E problema di Estrella te cu awor den Playoffs, y locual tabata e caso tambe den campeonato regular, ta e homber gol. Ta ken lo bai anota e golnan pa e Naranjadanan? Cu tanto lesionnan andando, di Hugo Robert, Anuar Kock, Phaedrick Baromeo cu ainda no ta 100% y pa colmo e carchi cora y suspension di Jean Pierre v/d Linden, un problema grandi pa nan.

Estrella a cuminsa bon den e wega aki, nan a domina bala, manteniendo e iniciativa den e prome parti di e wega, nan a haya nan gran chens pa cambia nan fortuna na minuut 40, unda cu Naibert Elizabeth a anota den un hugada cu e mes a cuminsa, cu asistencia, for di su mesun linea di defensa, penetra den area penal di RCA, den un wega fisico a mantene dominio di bala y pone esaki den gol, Glenbert Croes di RCA a purba trek e bala bek na ultimo momento foi linea di gol, pero envano. Estrella 1 RCA 0.


Pero e euforia di e gol ey di Estrella no a dura mucho, ya cu net cuater minuut despues Kevin Peña di RCA ta anota un gol pa empata e wega na un gol pa banda, despues di un atake rapido for di patras, den solamente tres pase, di Ronaldo Valderama pa Jean Pierre Fingal pa Peña, cu no a basila y ta fusila e portero Navarro, un contra-golpi decisivo, Estrella 1 RCA 1.

Despues di halftime Estrella a “eigenlijk” sigui cu nan wega di control di bala y semper purbando di avansa, cu algun yegada, pero, RCA tambe tabata spera pa un apertura pa hasi nan move, y “dicho hecho”, esey mes tabata e caso na minuut 53, unda Miguel Gonzalez for di su posicion di leftback a mira un oportunidad y a lansa te den area penal di Estrella, y husto drentando den e ultimo 16 a los un tiro duro na banda drechi di portero Injerreau Navarro, cu no a sera su skina, e bala a dal den tubo y bai aden, Estrella 1 RCA 2.

Estrella a purba, nan tabatin algun yegada, pero sin hopi peliger, e calidad dilanti tabata falta, e talentoso hoben, Trevor Faro, tabata isola tambe den hopi aspecto, su so dilanti, cu poco oportunidad. E partido a sigui pareu cu hopi bataya, pero, Estrella tabatin mester di mas cu esey pa saca un mihor resultado pa haya punto, algo sigur hopi necesario n’e punto aki.

E partido a termina den un victoria p’e Tricolornan di RCA, un victoria hopi bataya, traba y duro, pero nan lo ta contento cu e tres puntonan, y awo nan ta comanda emfaticamente e tabla di Playoffs cu shete punto, apesar cu nan Director Tecnico, Omar Tromp, no kier celebra mucho, p’e ainda nan no a logra nada, falta hopi ainda! segun e.

Estrella, decepciona cu e derota sin duda, awor tin e tarea hopi duro di practicamente purba gana nan tres partidonan cu falta den Playoff, nan no tin ningun punto ainda.

Nos ‘Man of the Match’ ta Kevin Peña di RCA. Siguientemente RCA lo enfrenta Nacional dia 25 di Mei y Estrella lo enfrenta Dakota dia 26 di Mei.

Click to comment

Leave a Reply

Your email address will not be published. Required fields are marked *

More in Division Honor