Connect with us

Division Honor

Nacional y Dakota a keda 1-1 den un duelo dramatico y emocionante foi cuminsamento te fin

Foto: Hubert de Cuba /Vision Images

Nacional versus Dakota ta awendia e rivalidad mas competitivo cu tin den futbol Arubiano. E puristanan lo bisabo cu e clasiconan tradicional ta RCA vs Dakota, Estrella vs RCA, of e clasico di Aruba, Dakota vs Estrella, pero, awendia ta Nacional-Dakota ta presenta un futbol di caliber halto, hopi competitivo, na un velocidad halto y tecnica increibel.

Dakota, biniendo di e partido contra RCA unda nan a empata sin gol pero a logra acumula 4 punto den dos wega, y Nacional cu a bin di haya nan prome tres puntonan den Playoffs despues di un victoria contundente di 3-0 contra Estrella. E sentido comun ta cu Nacional lo a bai “todo por todo” pa e victoria pa yega mas serka di RCA. Dakota, cu ainda falta pa yega e nivel di campeon, unda nan por ta hopi dominante, tabatin mas opcion cu e resultado, pa keda invicto “somehow” y keda serka di e lider riba tabla.

E prome mita di wega tabata bastante balansa, e prome 15 minuut Dakota hungando nan wega di toke y teniendo e bala for di Nacional, pero e Dragonnan tabata bon den ‘cambia strategia durante wega’, y di pronto a cuminsa hasi pressing halto, sorprendiendo e linea defensivo di Dakota cu sa keda cu mucho tiki hende patras den defensa ora nan subi.

Asina e gol di Nacional a yega, na minuut 19, Devis Oliveros a haya su mes riba e hala robes di e Abehanan, net na rand di area penal, haya su mes “one on one” cu Nickenson Paul, cu pa un “split second” a desconcentra y ta pidi pa offside, pero e bandera ni pitaso no a yega, Oliveros ta los bai, drecha bala y ta saka un tiro potente y perfecto pa bati e porteria defendi pa Eric Abdul, Nacional 1 Dakota 0.

Wega ta sigui di banda pa banda, cu Nacional cu otro bala den tubo na minuut 25 den un tiro liber di Chito v/d Biezen, sigui pa un hugada controversial na minuut 26, unda cu un penalty no a wordo duna na e Dakoteronan. Den e ultimo 15 minuut nan di e prome tempo Dakota tabata mas cu bala, insistiendo mas buscando e empate, Fernando de Sousa a haya su mes den box, su so cu portero Adrian Donayre na minuut 37, pero no a logra anota, Donayre sin duda a salba su ekipo na varios ocasion.

Dakota buscando, tocando bala y hayando hopi chens, pero asina mes ta Nacional tabata e ekipo mas efectivo den e prome mita, ariba 1-0.

Den e di dos tempo Dakota a sigui insisti, buscando e gol di empate, pero ironicamente ta Nacional a hera anota atrobe, pero, Defferey Banton ta faya e gol di su bida net den cuminsamento di e di dos tempo, pa mas laat desperdicia otro chens di gol, increibel pero berdad. Jammer, Banton ta un hungado cu ta traha cu alma y cuerpo pa su ekipo, ta e ultimo “touch” ta hasi falta.

E entrada di Shemar Monticeuex den wega a cambia e fortunanan p’e Dakoteronan y di biaha nan por a haya un penalty na minuut 58, un man den area penal cu no a wordo gefluit. Pero cu mas insistencia, na minuut 60 ta Monticeuex mes ta duna un bunita pase na Fernando de Sousa cu a  anota e gol di empate. Nacional 1 Dakota 1.

Un partido di hopi tension, y competitivo, un bataya fisico y strategico, pa banda di minuut 75 ta Dakota tabata ganando e wega fisico ey cu e cambionan aserta tambe di nan Director Tecnico David Abdul, cu a forsa Nacional hala mas atras den defensa sin por a contesta! E dirigente di Nacional, Dreyer Bracho, mester a contra aresta cu su mesun cambionan defensivo y ta scapa su ekipo y logra un punto toch.

Dakota por a bai cu e tres puntonan na final di e wega, pero no a logra anota mas te cu pitaso final. Bon wega, e miho te cu awor den Playoffs, pero lastima pa algun incidentenan anti-deportivo y expulsion den tempo extra ta haya mas atencion cu e gran partido aki mes.

Nos “Man of the Match” ta Leonardo Colmenarez, e defensor di Nacional.

Click to comment

Leave a Reply

Your email address will not be published. Required fields are marked *

More in Division Honor