Connect with us

Division Damas

Britannia Damas ta campeon di Aruba pa di cinco biaha consecutivo

Britannia Campeon Division Damas 18/19
Foto: Davyne Croes /Futbol Aruba

E final di Playoff futbol Division Damas entre Britannia y RCA a resulta di tabata un partido dramatico cu yen di emocion, mane a spera di e dos ekiponan aki, despues cu nan a hunga dos wega caba den e Playoff final aki, unda nan a keda iguala den tur dos di e weganan cu anotacion di 0-0 y 3-3 respectivamente, p’asina forsa un di tres partido pa dicidi di “una bes” ken ta keda como campeon di Aruba.

Den e campeonato regular ta e dos ekiponan aki a caba como number 1 y 2 riba e tabla di posicion. Den e prome rond di Playoffs, den e cuadrangular cu tabata inclui ademas di nan dos, La Fama y River Plate tambe, ta e dos ekipona aki a caba como prome y di dos riba tabla atrobe. Ta p’esey nan dos ta den final, e dos miho ekiponan di Aruba e campeonato aki. Den e partido previo, e drama na “Frans Figaroa” Diadomingo pasa, unda Britannia mester a bataya for di un deficit di 0-3 den e prome tempo pa empata e wega 3-3 den e ultimo secondenan di e partido, drama asina cu nos a wak den “Champions League” e anja aki, awo nos a wak e na Aruba tambe!

E partido den su inicio a mustra un RCA den atake tempran, un Britannia bastante conservativo, tratando di defende bon, manteniendo nan disciplina, toch un wega di banda pa banda for di pitaso inicial dilanti un publico grandi cu a bin apoya e heroenan femenino di futbol na stadion CDGT.

E prome gol di e partido a bin tempran den wega den pia di Valeska Felix na minuut 10 pa RCA, un bunita gol cu a bin di un tiro di distancia, Felix cu a haya e bala coriendo casi riba e hala robes, for di un pase for di banda drechi net na e ultimo linea 16 di Britannia,  RCA 1 Britannia 0.

Britannia a responde di biaha, nan a keda disciplina y di biaha a tuma iniciativa den atake y tras di e pase di Lissandra Fradl cu tabatin un tremendo partido, Aaliyah Simon den un “fast break” kibrando e off-side trap,ta haya e bala y ta empata e partido na minuut 26, RCA 1 Britannia 1.

Despues di halftime, Britannia a cuminsa press halto, causando hopi problema pa RCA, cu no tabatin salida for di nan teritorio y asina tambe logra bai ariba na minuut 72, den un otro counter efectivo, despues di un gol di Jorraine Maduro nan capitan, RCA 1 Britannia 2.

Den tempo extra di wega, Tarianna Doornkamp di Britannia, cu a cuminsa e wega aki riba banki, ta hasi e wega 3-1 pa e Lady Pumas nan, RCA 1 Britannia 3.

Net un minuut despues di e di tres gol di Britannia, faltando un minuut pa wega caba, RCA batayando ainda, den tempo extra, mustrando e actitud “never give up”, ta haya un gol di cabes di nan capitan Milvienne Henriquez, un hungado cu a core henter anochi, henter cancha, den un momento hopi dramatico mes, cu un minuut mas ainda un milager por a sosode, asina tabata e espirito di e gran Playoff final aki, RCA 2 Britannia 3.

Pero mane den bida mes, tur cos bon lo tin cu yega na un fin, inevitablemente, apesar cu den e caso aki, nos tur den futbol, no tabata kier pa e evenemento hopi bunita aki yega na su fin, e holoshi no por a yuda RCA awenochi, referee Eugene Faro a haye ta fluit pa final di e drama aki, e partido a termina 3-2 na fabor di Britannia, y asina e Lady Pumanan, awo un ‘dinastia’ den futbol femenino riba e baranca aki, ta e flamante campeon di Aruba, Division Damas pa e campeonato 2018-2019. Campeon atrobe, campeon pa di cinco anja consecutivo!

Nos lo corda pa semper e heroenan aki; Mylene Croes, Michela Werleman, Lissandra Fradl, Anouk Bluemink, Joraine Maduro entre otronan pa Britannia, ta hopi tin pa menciona, ne otro banda hungadonan mane Christy Ann Brete, Marjolein Ruitenbeek, Josrine Saladin y hopi otro nan mas, danki na nan tur pa a brinda nos algo asina sensacional.

Pabien na Britannia y pabien na RCA tambe, e damasnan a gana, nos tur a gana, deportivismo a gana, futbol a gana awenochi, sin duda.

Click to comment

Leave a Reply

Your email address will not be published. Required fields are marked *

More in Division Damas