Connect with us

Division Honor

Nacional y RCA lo topa pa e titulo campeonil den AVB Playoff Final di Division Honor 2018-2019

Foto: Hubert de Cuba /Vision Images

Nacional y RCA lo bataya pa dicidi ken ta sali campeon den e final di Division Honor e anja aki. Ambos ekipo a gana nan ultimo partido den e Playoff semi-final; RCA ganando di Estrella cu score di 6-1 na CDFF na Noord, a keda cu 13 punto y un diferencia di gol di +8, y Nacional ganando di Dakota cu anotacion di 1-0 den e ultimo minuutnan di wega, tambe a keda cu 13 punto pero cu un “doel-saldo” di +6.

Na final di e cuadrangular hunto cu Estrella y Dakota, cualnan a keda elimina, ta RCA y Nacional mes a keda den top dos riba e tabla di Playoffs, ganando asina e derecho di bai hunga den e final p’e titulo. Ultimo biaha cu Nacional a gana e campeonato, na 2017, ta RCA mes tabata nan rival den e anja ey.

E final e anja aki lo presenta dos contrast “duidelijk” den style di wega di ambos ekipo. E Tricolornan di RCA cu nan wega di posesion y toke, versus e wega atletico y metodico di e Dragonnan di Nacional. Ta dificil pa conclui ta cua sistema lo impone den e serie final aki di por lo menos dos wega. Dos ekipo bastante pareu, den e  serie semi-final di Playoffs, RCA a gana Nacional 3-0 den e prome rond, y den e di dos vuelta ta Nacional a sali victorioso cu anotacion di 2-0 entre e dos rivalnan aki. Den e campeonato regular tambe e dos ekiponan aki a tuma turno un biaha mas, unda ta Nacional a gana e partido den e prome rond cu score di 2-0 y RCA a gana den di dos rond 2-1.

E forsa di RCA ta den nan creatividad den medio campo, hopi biaha cu distribucion di bala cu ta sali for di nan linea defensivo p’adilanti, hasiendo uso di e versatil Erick Santos, cu por cierto ta bon den rol di contencion pero tambe di creatividad, hasta por tira dilanti y anota si mester, un hungado di ful cancha, cu por yuda y duna e “brain” Jean Luc Bergen hopi chens pa crea wega den volante. Dilanti, RCA ta conta cu nan goleador e anja aki den persona di nan capitan, Frederick “Ronald” Gomez, cu e campeonato aki a haya bon asistencia di e hungado revelacion, e hoben Andrew Martinez, cu conhuntamente cu Ronald Valderama a hasi un gran diferencia tambe pa RCA den Playoffs.

Nacional su forsa ta den nan ‘colectivo’ y un sistema imponente y devastador. Un sistema cu en berdad ta mas grandi cu cualkier hungado individual, hopi efectivo y te cu awo masha exitoso mes. Nacional ta conta cu un defensa poderoso ancra pa Leonardo Colmenarez cu bon asistencia riba lateral drechi di e versatil Deffrey Banton, un motor riba cancha, y Claudione Cavalcante, nan capitan, den medio campo. Pero, nan “X-factor” ta sigi di ta e miho futbolista “pound for pound” riba nos dushi baranca aki, Devis Oliveros, e ganado di Ballon D’Or 2017, Sapato di Oro anja pasa, y un biaha mas e goleador di Division Honor e anja aki tambe! E hungado aki, por cambia un resultado di un partido den un fraccion di seconde.

E diferencia entre e dos ekiponan aki den e Playoff Final lo wordo dicidi pa ‘ken lo ehecuta nan wega miho’, cual sistema lo impone riba e otro? Cual hungado lo por hasi e gran diferencia p’asina gana e titulo maximo e anja aki?

E prome partido di e gran Playoff Final aki lo cuminsa Diaranson awo 12 di Juni pa 8:00pm na Stadion G.P. Trinidad. Lo tin un di dos partido Diasabra 15 di Juni y si tin mester, un di tres partido Diaranson 19 di Juni, tur e dos weganan aki tambe pa 8:00pm na Stadion G.P. Trinidad.

Mientras cu nos no sa ta kiko lo bai pasa den e Playoff final aki, un cos ta sigur, lo bai tin un campeon nobo di Division Honor e anja aki, e lo ta e Tricolornan di RCA of e Dragonnan di Nacional?

Click to comment

Leave a Reply

Your email address will not be published. Required fields are marked *

More in Division Honor