Connect with us

Division Honor

RCA ta forsa un di tres wega contra Nacional pa dicidi ken lo sali campeon di Aruba, Division Honor 2018-2019

Foto: Davyne Croes /Futbol Aruba

RCA a gana Nacional 1-0 den e di dos wega di Playoff Final, p’asina forsa un di tres encuentro decisivo Diaranson 19 di Juni na CDGT.

Den e partido clave aki, unda RCA tabata cu ‘lomba contra muraya’ despues di a perde e prome wega cu score di 1-3, pero a sabi di bons bek e biaha aki cu un victoria, despues di e gol di Jean Pierre Fingal. Un hugada cu a lanta polemica y e partido tambe eventualmente a bay den protest, mas bien pa un otro motibo, cu na ultimo momento a wordo dicidi sin consequencia y e partido decisivo lo wordo hunga Diaranson unda un campeon nobo lo wordo corona.

 

Den e prome partido di AVB Playoff Final, Nacional a hunga nan wega strategico na un manera perfecto, unda nan a aplica un formacion defensivo aplicando e “diamond”, unda cu e Tricolornan no a haya espacio pa avansa y ataka husando nan volantenan, mas bien e Dragonnan a forsa RCA pa ataka mas riba nan flank, unda cu nan mester a hunga cu mas velocidad y tambe comete menos erornan posibel. Esey no tabata e caso pa RCA, nan a perde e bala hopi biaha sin mester debi na e wega di presion di Nacional. Ora cu RCA alfin a haya nan chensnan, nan no tabata precies dilanti gol. Nacional en cambio si a sabi di probecha nan chensnan ora nan a tira den atake.

Na final e presion aplica pa Nacional tabata demasiado pa RCA, apesar cu e wega tabata bastate nivela, toch Nacional a hunga nan wega mas efectivo y a bai cu e victoria contundente di 3-1, golnan anota pa Emerson Leocadio na minuut 22, e joya di gol di Devis Oliveros na minuut 73 pa duna e bentaha di victoria na e Dragonnan, y e gol pa cementa e wega di Edward Clarissa na minuut 90+4, den tempo extra. E unico gol di RCA a wordo anota pa Ronald Gomez na minuut 67.

Den e di dos partido mane a wordo menciona, un wega bastante nivela tambe, pero cu un RCA cu a sali cu mas gana pa bai cu e victoria y forsa un di tres partido final, Nacional lo a titula campeon cu un empate mes. E partido a wordo afecta enormemente, por lo menos den bista di Nacional, debi na e carchi cora otorga den tempo extra di e prome tempo na nan hungado Gregorio v/d Biezen. Nacional a hunga e di dos tempo cu un homber menos riba cancha.

 

Den di dos tempo a bin e hugada polemico p’e fanaticonan di Nacional, pero en cambio decisivo p’e fanaticonan di RCA, unda cu na minuut 66 Jean Pierre Fingal no a “give up” riba un hugada y a bai halto hunto cu e portero di Nacional, Jose Cruz, y asina forsa e bala foi man di Cruz, unda e bala a cai den area penal y Fingal a pone e bala den net pa e 1-0, cu tabata tambe e resultado final, apesar di e protestanan di e hungadonan di Nacional. Asina RCA a gana y a forsa un di tres partido decisivo.

Ta di remarka cu e dos ekiponan aki a hunga otro e campeonato aki den seis oportunidad cu cada ekipo bayendo cas cu tres victoria. Asina ta cu despues di hopi futbol den campeonato regular, despues di e prome rond di Playoffs, y awo despues di dos wega di Playoff Final, ainda ta rekeri un partido mas pa wak ken di e dos ekiponan aki lo titula campeon di Aruba den Divison Honor.

Click to comment

Leave a Reply

Your email address will not be published. Required fields are marked *

More in Division Honor