Connect with us

AVB

RCA a derota Scherpenheuvel den tempo extra den un partido dramatico pa inicia ABC Cup

Foto: Davyne Croes/Futbol Aruba

RCA, e flamante campeon di Aruba no ta aheno na drama, riba e anochi aki tabatin mester di hopi curason y bataya pa gana Scherpenheuvel di Corsow den inicio di ABC Cup 2019.

Scherpenheuvel, un ekipo cu a domina den campeonato di Corsow e anja aki, apesar di a sali sub-campeon, no tabata rival facil pa e Tricolornan di Solito, considerando tambe cu Scherpenheuvel tabata den pleno competencia te cu un siman pasa, mientras cu RCA ta recientemente den preparacion di pre-temporada despues di tabata den receso for di Juni caba.

Un partido bastante pareu den e prome tempo, cu RCA miho toch, teniendo mas chens di anota, cu bon posesion y toke di bala, hasta a frustra e oncena di “Skerpene” pa mayoria di e prome tempo, pero RCA cu algun bon yegada y oportunidad di gol, no a logra anota pa tuma bentaha. Scherpenheuvel, un ekipo devastador den ofensiva, no por a hunga na wega debi na un planteo hopi efectivo di e ekipo Arubano.

Halftime ta bai aden sin anotacion, pero, pa RCA cu hopi optimismo pa logra un bon resultado den e wega aki, e leve dominio di e Tricolornan bou liderazgo di Eric Santos, hunto cu wega hopi efectivo n’e punto ey di Steven Melchor, y Jamir Howell-Brokken den volante di contencion.

Den e di dos tempo di biaha Scherpenheuvel a tira den atake, semper hopi peligroso mes ya cu den un “split second” por cambia e resultado cu nan trio di atakante cosisti pa Nicolas Rocha, e Uruguayo maximo goleador di Corsow, hunto cu Jimbertson Vapor y Christopher Isenia.

Na momento cu e partido tabata bastante nivela den e prome parti di e di dos tempo, na minuut 65, Scherpenheuvel ta traha nan oportunidad den persona di e incansabel Rocha, un contra-golpi efectivo, unda cu Rocha cu hopi velocidad ta laga dos hungado di RCA riba hala robes, penetra na banda di area penal, haciendo un pase perfecto pa Jimbertson Vapor cu tabata liber den box, domina e prome toke efectivamente y a fusila Eric Abdul cu no tabatin chens, Scherpenheuvel 1 RCA 0.

RCA, di biaha a cuminsa hasi cambionan strategico pa busca mas ofensiva y purba empata e wega, eventualmente nan a trece e talentoso Andrew Martinez y despues e rapido Yenuel Kelly. RCA purbando na empata e wega, pero mientras tanto ta Scherpenheuvel ta haya algun yegada mortal, pero si no tabata pa Eric Abdul, cu a hasi tres salbacion crucial y spectacular, p’asina mantene e resultado 1-0 te na e punto ey. Asina RCA a sigui traha, sin para, cu hopi “will-power” y mas chens pa empata, pero no a logra concreta, y e holoshi a sigui move, tempo tabata cabando.

Ora cu e tempo reglamentario a yega su fin na minuut 90, hopi fanatico di RCA bastante “down”, toch a haya un “boost” ora cu e referee principal Cassius Coffi a indica cu ta bai tin 5 minuut di tempo adicional debi nan e hopi momentonan di asistencia pa lesion. Asina mes tempo no a warda atrobe y nos a yega te den e ultimo minuut di e partido ora cu RCA ta haya un tiro liber p’afo di e area penal di Scherpenheuvel, un poco na banda robes.

Mientras cu mas seconde ta pasa p’e pitaso final, RCA cu kizas nan ultimo suspiro den e tiro liber aki, ta Steven Rua Melchor ta haya e lus berde for di Eric Santos pa lansa e tiro, unda Melchor ta pone e bala den net na banda drechi di portero Sumter, un bunita tiro pa salba RCA for di e derota na minuut 90+4, RCA 1 Scherpenheuvel 1.

Un banjo di awa frieuw pa e oncena di Corsow, e empate a forsa tempo extra. Den e alarge RCA, awo cu mas pia fresco y tambe un planteo efectivo, mas ofensivo cu Scherpenheuvel, ademas di un “edge” psycologico a cuminsa di biaha tirando den atake, Scherpenheuvel no tabatin contesta, asina “demoledor” RCA tabata den e tempo extra aki. Golnan a cuminsa cai un trei otro.

Na e di dos minuut den alarge caba, Jean Piere Fingal a combina cu Andrew Martinez unda e hoben talento a anota pa hasi e wega 2-1 pa RCA. 

Scherpenheuvel a reacciona di biaha y a sali pa busca e empate, pero RCA a warda cu pasenshi y a haya nan oportunidad nan, nan a yega atrobe. Na minuut 102 den tempo extra, Jean Pierre Fingal cu un gol di media buelta ta hasi e wega 3-1 pa e Tricolornan.

Den e di dos mita di alarge, ta Steven Melchor den un “break” ta hasi un pase pa Yanuel Kelly, cu ta dal e golpi di knockout na minuut 114, RCA 4 Scherpenheuvel 1. Un resultado impresionante pa RCA y Aruba, merecidamente. Nos Man of the Match ta Steven Melchor, un decision sera ya cu ta hopi den RCA a brilla riba e anochi aki.

Na Kralendijk, Boneiro, Nacional a perde cu Real Rincon, campeon di Boneiro, cu anotacion di 2-1. Na Willemstad, Vesta, campeon di Corsow ta gana Vespo, subcampeon di Boneiro cu anotacion di 3-0.

Keda pendiente cu FutbolAruba pa mas reportahe amplio di Copa ABC y e siguiente partidonan.

Click to comment

Leave a Reply

Your email address will not be published. Required fields are marked *

More in AVB