Connect with us

AVB

Nacional a gana Vesta 3-2, consagrando como campeon ABC Cup 2019, momento grandi pa futbol di Aruba

Nacional mester a bataya FC Vesta, e campeon di Corsow, pa mas cu 120 minuut p’asina titula campeon di e torneo interinsular, ABC Cup 2019, e titulo di e ‘miho club di futbol riba nos islanan ABC’.

 

Den un partido fisico pero tambe c’un toke di strategia di ahedres, Nacional a hunga Vesta igual na igual, apesar cu Vesta tabata mustra como faborito grandi riba papel prome cu e wega.

 

Vesta a bin di a gana nan dos prome weganan previo na un manera convincente pa yega na e final aki. Nan a gana e sub-campeon di Boneiro, Vespo, cu score di 3-0, y den semi final a gana e campeon di Boneiro, e oncena hopi duro di Real Rincon cu e minimo anotacion, sin permiti gol den contra.

 

Nacional a drenta semi-final como e miho cuarto lugar despues di e prome rond di ABC Cup, debi na un miho “doel saldo”. Despues a topa RCA, cu a bin di un victoria contundente di 4-1 riba Scherpenheuvel di Corsow den prome rond. Den e semi-final aki Nacional a gana RCA pa medio di penalti, p’asina yega e final aki.

 

Un partido cu Nacional a sorprende Vesta tempran caba cu un wega ofensivo culminando cu un “fastbreak” na minuut 4, unda cu for di un pase largo y precies di Ricky Hodge, cu a pasa riba cabes di Devis Oliveros, cu eigenlijk tabata den posicion adelanta su mes, pero, cu bon pensamento a para keto y no a envolvi su mes den e hugada, lagando e bala bons, unda Joshua Aguirre, coriendo y batayando, a gana e bala un fraccion di seconde prome cu e defensor di Vesta, p’asina saca e tiro y baña e portero Jairzinho Pietersz p’e 1-0 pa Nacional.

 

Ni cuater minuut despues, a toka turno na Devis Oliveros, for di un pase hopi largo, di Ricky Hodge atrobe, hayando Devis habri cu un defensor so riba dje, pa hala na su man robes, drenta area penal y saca un tiro cu su pia robes, cu a pasa net na banda robes di Pietersz, dal den tubo bai aden p’e 2-0, sorprendente resultado parcial pa Nacional.

 

Vesta a hasi nan cambionan strategico pa purba cambia e rumbo di wega y di momento a cuminsa lanta cabes, pero, asina mes halftime a bai aden cu Nacional den solido bentaha di 2-0.

 

Den di dos tempo Vesta a sigui cu nan iniciativa ofensivo y a cuminsa domina e partido, Nacional cu e bentaha a retrocede un poko den defensa tambe. Vesta finalmente a anota e gol di corta bentaha na minuut 54 pa medio di Mirco Colina, unda el a haya e bala for di un rebote despues di un salbacion di portero Jose Cruz cu pia net na rand di area penal, Colina a lastra e bala pasa tur hende y a bai den net p’e 1-2.

 

Vesta, cu mas dominio awor y tambe e ‘momentum’ di wega na nan fabor a sigui tira dilanti y press Nacional den defensa. Asina, inevitablemente, nan logra empata e wega na minuut 69, otro gol mas di Mirco Colina. Un bunita gol for di un angulo dificil na banda drechi den area penal, Colina ta saka un tiro bunita pa pone e bala na halto den net p’e 2-2.

 

Apesar cu Nacional a lanta cabes atrobe y a haya mas yegada, parando e momentum di Vesta, e partido a termina 2-2 den tempo regular, forsando asina pa bai hunga “alargue” di 30 minuut (15 minuut cada banda) pa dicidi e campeon di ABC Cup 2019, si no, mester a lansa tironan di penalti.

 

Den e “proroga” e ekiponan a bataya igual igual na mayoria di tempo, pero e prome 15 minuut a caba cu e wega ainda empata na dos.

 

Den e di dos tanda na minuut 110 di wega, Devis Oliveros di Nacional a lansa den atake, penetra den area penal, hala e defensornan, pa despues hasi un pase p’atras pa Ricky Hodge, cu na su turno a mira Fercand Sophia liber na banda robes y ta hasi un pase cu inicialmente ta dal den pia di un defensor di Vesta, pero, toch ta alcansa Sophia cu no ta basila y ta fusila e portero Pietersz pa Nacional bai ariba 3-2, un momento di euforia p’e fanaticonan di e Dragon nan.

 

Cu menos di 10 minuut faltando di wega, Vesta a purba empata e wega atrobe, pero Nacional a logra wanta e resultado te na pitaso final di referee Cassius Coffi.

 

Nacional ta campeon! Nacional a representa e pueblo di Nort y Aruba dignamente, y ta consagra nan mes como e miho club di e islanan ABC. Pabien Nacional, e Dragon nan a demonstra cu Aruba por gana e grandinan di Corsow. 

 

Ta hopi hungado di Nacional a brilla den e partido aki y e torneo ABC en general, pero mencion special ta bai pa Joshua Aguirre cu a desempeña na un manera excepcional den semi-final y tambe e final awenochi. Devis Oliveros mane semper, cu dominio di bala y su golnan, apesar di “double teaming”, Ricky Hodge cu su tres asistencianan awenochi, Leonardo Colmenares den defensa y Claudio Cavalcante cu su liderazgo y su wega den medio campo. Pabien na tur di Nacional y nan director tecnico Dreyer Bracho, pa su planteo strategico pa logra e gran hazaña aki. Aruba ta duna danki na bosonan.

Nacional v VestaOranjestad, Aruba – August 31: Copa ABC, Nacional v Vesta na Guillermo Prospero Trinidad Stadium den Oranjestad (Photo by Davyne Croes/Futbol Aruba)

Posted by Futbol Aruba on Sunday, September 1, 2019

Click to comment

Leave a Reply

Your email address will not be published. Required fields are marked *

More in AVB