Connect with us

Division Honor

Despues di tres fecha den Division Honor 2019-2020, ken a sobresali y kiko por spera di awo en adelante

Por resumi e prome tres fechanan di Division Honor den e campeonato nobo n’e forma aki; 

e cuater prome ekiponan ta e mes un nan cu a bai playoffs anja pasa, e tradicional top cuater di Aruba.

 

E campeon actual RCA na cabes atrobe, sigui pa e sub campeon Nacional, despues Estrella y Dakota como di cuater. Ta mas cu husto pa bisa cu no ta mucho a cambia den Division Honor e anja aki, e grandinan ta keda grandi y e chikitonan ainda no ta lantando cabes! E pregunta ta; ken di e “chikitonan” ta bai challenge pa e di cuarto lugar ey? Anja pasa Brazil Juniors a sorprende tur hende den e prome rond di e campeonato, apesar cu nan a desinfla den e di dos rond ora cu e ekiponan grandi a desifra nan wega.

 

E anja aki nos no a mira niun ‘ekipo sopresa’ ainda! Bubali, ekipo tradicional, cu a sobresali den e di dos rond di e campeonato pasa y casi a yega playoffs, ta e ekipo mas cerca atrobe di e top cuater, nan a perde un bon chens pa acumula mas punto riba tabla Diadomingo ultimo den e ‘Derbi di Nort’, ora cu nan rival Nacional a haya nan mes cu nuebe hungado riba cancha na minuut 69, y hasta cu solamente ocho hungado na minuut 83. Bubali a empata e wega hopi laat, nan mes hungado cu 10 hungado, pero no a bai pa e stokada final ora cu Nacional a keda cu solamente ocho homber riba cancha, un diferencia numerico grandi sin duda algun, cu bastante tempo di descuento ainda faltando den e partido.

 

RCA ta sigui siendo e ekipo dominante te cu awo, nan a gana tur nan tres prome partidonan, anotando ocho gol y sin gol permiti den contra, dus, tres ‘clean sheets’! Hungando un futbol bastante atractivo cu bon toke y dominio di bala, pero tambe mester remarka cu tabata contra tres ekipo den e parti abou di tabla di posicion. Ta ora nan midi forsa cu e top cuaternan nos lo sa mas di e nivel di e campeon.

 

Nacional ta e ekipo cu a anota mas gol te cu awo den e campeonato, 13 den tres wega, nan ta sigur e miho ekipo ofensivo te cu awo, conoci como un ekipo compacto y bon para riba cancha den pasado, e anja aki cu un cara nobo ofensivo sin duda. E victoria di 4-1 den siman un riba Britannia, un ekipo tradicionalmente competitivo pero cu ainda no ta nan nan nivel di custumber, tabata impresionante! Nacional tabata tambe den bentaha contra Bubali den e “derbi” te ora cu nan a cuminsa destrui nan mes cu tres carchi cora consecutivo, pero a logra un punto toch na final.

 

Estrella ta solido te cu awo den e campeonato apesar di a cuminsa cu un empate contra La Fama den e prome wega. Despues e “naranjadanan” di Santa Cruz a convence den nan ofensiva, cu bon prestacion te cu awo di nan astronan hoben Trevor Faro y Denrick Lopez.

Estrella ta sigui hunga un wega ofensivo atractivo, ta nan defensa si mester di refuerso ya cu nan capitan y defensa central Pancho Croes no a hunga tur e weganan te cu awo.

 

Dakota ainda no ta hungando na e nivel cu a spera, nan ta solido, pero nada special te cu awo. Toch shete gol anota y tres den contra ta ok. Den e ultimo partido contra La Fama nan a rekeri un resolvencia grandi vooral di parti di nan back central Nickenson Paul cu a construi y a anota un gol laat pa salba tres punto pa su ekipo, despues cu nan a keda cu dies hungado debi na expulsion, un victoria importante di chiripa contra un rival duro e anochi ey.

Pero e tema ta sigui di ta ‘e bataya pa e di cuarto luga’; e ekipo cu mas chens pa challenge pa e di cuarto puesto riba tabla por ta entre Bubali, Britannia y La Fama mes.

 

Bubali te cu awo ta e mas fuerte di e tres ekiponan aki, nan a perde un bon chens di bai cu tur tres punto den e ‘derbi di Nort’, chens perdi. Nan no a perde ainda tampoco, ademas di un bon empate contra Dakota y un contundente victoria contra Britannia den siman 2. Bubali a enfrenta tres ekipo duro te cu awo y a demostra cu nan por, y ta un candidato fuerte cu por yega playoffs e anja aki despues di tabata hopi cerca den e ultimo dos campeonatonan.

 

Britannia definitivamente no a cuminsa e campeonato man’e a spera, ta nan portero, e hoben Jean Carl Henriquez t’esun cu a sobresali mas te awo, esey ta bisa hopi. Expectativa ta halto despues di e adquisicion nan nobo p’e campeonato aki, claro, ta tempran ainda, pero tin hopi talento den e ekipo aki y ta spera mas di e Pumanan di Piedra Plat e anja aki despues cu nan no a yega playoffs anja pasa.

 

La Fama ta competitivo e anja aki, den nan prome tres weganan nan a topa cu tres ekiponan den top cuater. Nan a empata cu un bon ekipo di Estrella den e prome fecha, pa despues perde convincentemente contra e campeonan RCA. Contra Dakota den nan ultimo partido, nan tabatin tur chens di saca por lo menos un punto den un bon partido, apesar di hopi lesion y ausencia di hungadonan, tambe sin nan coach Breinburg cu tabata cu e seleccion nacional femenino den exterior. Por spera mas di La Fama e anja aki, nan por sorprende.

 

Brazil Juniors no a alcansa mas e nivel cu nan tabatin den e prome rond di campeonato pasa, unda nan a sorprende tur hende cu nan wega dynamico, esey ta den pasado, nan tin falta di ayudo den medio campo e anja aki sin Owen Van Der Wijne, cu a bai Britannia y tambe David Ocean dilanti, cu a bai La Fama. Apesar cu nan a haya Deffery Banton pa yuda nan den defensa, ta ofensiva y gol nan falta. Sin e nivel perdi ey ta bai ta un reto grandi pa yega playoffs.

 

Independiente Caravel a caba di subi pa Division Honor e anja aki, pero anja pasa nan a sorprende den Copa Betico Croes, unda nan a bai final eliminando RCA den semis, alfin nan a keda como sub campeon di e torneo. Den e wega contra Estrella e campeonato aki, nan a cuminsa bon, bai den bentaha, pero despues nan a perde nan ritmo y Estrella a domina e wega foi eynan. Caravel a anota 4 gol den tres wega, pero, tambe a permiti 13 gol den contra.

 

SC United tambe a caba di ascende pa Division Honor e anja aki, pa di prome biaha den nan historia. Un ekipo compacto cu ta duna bataya pero sin punto ainda, falta di mas profundidad den nan planteo, y experiencia competitivo na nivel di Division Honor. United a anota solamente 2 gol den tres wega y a permiti 10 den contra, cu e numbernan aki ta dificil pa alcansa playoff y lo mester bataya hopi pa sali for di fondo di tabla di e division.

 

Click to comment

Leave a Reply

Your email address will not be published. Required fields are marked *

More in Division Honor