Connect with us

Division Honor

Jamaica a gana un Aruba competitivo 2-0 na Kingston, awo nos falta gol y haya mas punto

Foto: Hubert de Cuba /Vision Images

Aruba ta perde 2-0 cu Jamaica pero den un wega competitivo na Kingston, e seleccion no sa perde facilmente mas, awo mester busca con pa anota gol y asina cuminsa haya punto y hasta gana weganan tambe.

E derota di 2-0 contra un “powerhouse” di Concacaf man’e Jamaica na Kingston ta decoroso, e Jamaiquinonan mes a declara cu nan mester a bataya duro contra un seleccion chikito man’e Aruba. Den pasado tabata mas facil pa gana Aruba, e ultimo biaha cu nos a topa Jamaica nos a perde 6-0 den Caribbean Cup.

Apesar cu nos seleccion no tin punto ainda den e Nations League aki, por bisa cu Aruba nunca a perde un wega cu mas di dos gol di diferencia tampoco, bon, mas bien nan a permiti solamente 5 gol so den 3 wega, menos cu Antigua y Guyana, kende nan ta posiciona como number dos y tres respectivamente riba e tabla. Pero mester menciona tambe cu Aruba a anota un gol so den tres wega, causando e doel saldo di -4 (igual cu Antigua y Guyana).

Den e wega cu Jamaica, cu ta lider di e grupo cu tres victoria, nuebe punto y un doel saldo di +12, Aruba a competi bon. Jamaica a anota tempran na minuut 13 pa medio di Devon Williams. E di dos gol a bin te cu na minuut 88 ora cu Shamar Nicholson a hasi e wega 2-0, casi na final. Jamaica a haya un penalti dudoso den e di dos tempo, pero e tiro tabata desvia toch.  Bon actuacion defensivo di Aruba, bastante bon organisa riba cancha y tambe den porteria defendi pa Eric Abdul, e “Golden Glove” di Aruba.

Pero, awo ta tempo pa pensa con nos ta bai anota gol, p’aso pa logra punto y gana wega mester anota gol. Ta bon si cu nos no ta un “doormat” pa niun seleccion, ni pa un ekipo elite top cuater di Concacaf man’e Jamaica. 

Toch Aruba su ofensiva ta anemico y mester gol, mester di e puntero ey cu por cambia un wega den ‘un habri y sera di wowo’, apesar di un planteo defensivo, preventivo, ta bon, pero e elemento ey ta hasi hopi falta. Nos tin punteronan jong cu ta creciendo y algun hungado estableci cu ta traha hopi duro, pero no ta suficiente ainda, ban ta hopi sincero.

Riba e isla aki nos tur sa cu e mihor goleador di nos Division Honor pa tres anja sigui caba y e anja aki no ta excepcion tampoco, ta Devis Oliveros, e puntero y goleador nato di Nacional.

Hasta mi por bisa cu, teniendo hungadonan man’e Oliveros ta un “plus” grandi pa nos futbol, nos liga a mehora cu yegada di hungadonan asina. Awo nos ta bisa, ok, Devis, Colombiano di nacimento, no tin paspoort Hulandes, e no por representa Aruba, jammer! Pero, que hubo si nos cuminsa e proceso di naturalisa e gran hungado aki, claro si e kier, pa bin na e documentonan legal pa un dia por representa Aruba, ohala cu mas pronto posibel.

Ta hopi paisnan ta hasi tur posibel pa atrae talentonan asina pa yuda nan, pa drecha nan imagen riba e stage internacional y en cambio yuda nan mesun talentonan tambe.

Hopi ta corda e situacion di Kevin Prince Boateng di nacionalidad Aleman cu despues a dicidi cu e no kier hunga pa Alemania mas, apesar cu su ruman Jerome si, a logra haya un paspoort di Ghana, citando cu su tata tin un vinculo (apesar di hopi distancia) cu e pais Africano. E autoridad nan Ghanes a hasi tur posibel pa procesa legalmente e papelnan p’e haya su paspoort y representa e pais. Tin masha hopi caso asina den deporte, ta intencion di procesa e papelnan mester tin y hopi gana di logra. Korsou a bringa te final pa Patrick van Aanholt, e astro di Crystal Palace den Premier League Ingles, cu na un punto a dicidi pa hunga pa “Oranje” pero awo a resulta cu e lo join Korsou toch! 

Awo e caso di Oliveros no ta facil den corto tempo, excepto si e lo tin un vinculo cu Aruba of Hulanda, un coneccion familiar etc. Si, no, tambe e por haya status legal di ciudanania Hulandes ora e completa cinco (5) anja bibando y trahando legalmente na Aruba (oftewel teritorio Hulandes). “Where there is a will there is a way”.

Esakinan ta ideanan honesto di un fanatico di Aruba, cu kier pa nos mehora, pero cu tambe ta wak un oportunidad pa cu nos seleccion nacional, mirando cu tin un talento grandi (kizas hasta otronan mas tambe), cu ta sintando un banda sin un seleccion nacional, ban discuti y trece solucion.

Aruba su siguiente partido ta contra Jamaica mes, e Reggae Boyz, Diamars 15 di October pa 7pm, e partido di buelta cu ta suppose di ta na cas, pero cas pa nos awo ta stadion Ergilio Hato na Willemstad, Korsou. 

"We give everything we had" – Eric Abdul reactions after today's match against Jamaica | Arubaanse Voetbal Bond – AVB 🇦🇼 #CNL #FollowTheDream

Posted by Nations League on Saturday, October 12, 2019

#CNL Highlights – Jamaica 2-0 Aruba

📹 Relive Jamaica Football Federation ( J.F.F )’s 🇯🇲 2⃣-0⃣ victory against Arubaanse Voetbal Bond – AVB 🇦🇼! | #FollowTheDream #CNL

Posted by Nations League on Saturday, October 12, 2019

Click to comment

Leave a Reply

Your email address will not be published. Required fields are marked *

More in Division Honor