Connect with us

Division Honor

Division Honor – “Power Ranking” edicion Pasco 2019 – Anja Nobo 2020

Foto: Davyne Croes/DAC Image

E campeonato 2019-2020 aki cu a cuminsa un poco stranjo, toch na ‘final di e prome rond’ a man’e bolbe bek na normalidad, e ‘normalidad’ ta cu e cuater prome ekiponan riba tabla di posicion ta historicamente e cuater grandinan di futbol Arubano. Pero, tambe por bisa cu tin un paridad claro p’e bataya pa e di cuarto lugar riba tabla (hasta p’e di tres lugar), e diferencia entre posicion tres y shete riba tabla ta solamente 5 punta, y e diferencia entre posicion seis y nuebe ta solamente 4 punta, e bataya pa evita playoff promocion/degradacion tambe lo ta hopi intenso. 

 

Tabatin sorpresa tambe den e prome rond di e campeonato aki, y por spera cu e di dos buelta di e campeonato lo bai bira hopi interesante mes, esey ta ora cu e “restart” sosode despues di culminacion di ‘Copa Betico Croes 2020’.

 

Varios ekiponan cu caranan nobo, tabatin bastante hungadonan a troka club prome cu e temporada a cuminsa y varios cambio di directornan tecnico, cu a cambia algun dynamico di e manera di hunga di varios ekiponan, strategianan a varia y tambe e resultadonan.

 

RCA, a actual campeonan ta sigui comandando e tabla di e campeonato aki, pero esaki ta un otro RCA compara cu e prome rond di anja pasa y tambe bastante diferente cu e ekipo di e di dos buelta cu a termina como campeon 2018-2019. Pero, mester bisa cu e formula nobo aki, apesar di tin casi e mesun personal di anja pasa, except un cuerpo tecnico nobo, a resulta den un RCA ‘invicto’ den full e prome buelta, cu solamente 1 gol so den contra den 9 partido, en cambio a anota 15 gol pa un averahe di 1.66 gol pa wega, cu no ta halto, pero, permitiendo un gol so den nuebe wega (ocho clean sheets), ta suficiente pa gana casi tur wega te cu awo! Un formula exitoso sin duda, un futbol pragmatico y inteligente, y awo “que hubo” si RCA cuminsa anota mas gol, ta ken lo por para nan? Nan por drecha nan punteria, paso, chens nan ta traha toch, of, nan lo tira mas dilanti den ofensiva, riska mas? Pero, con cu bai cu bin, ta resultado ta conta na final.

 

E diferencia entre RCA y nan seguidornan riba tabla, Dakota, ta e wega cu RCA a gana Dakota 2-1 den siman seis. Dakota, un ekipo hopi balansa, a sabi di anota 7 gol mas cu e Tricolornan, y nan a permiti 9 den contra, un averahe hopi bon di 1.00 (gol den contra) pa wega, excepcional, pero toch nan ta na di dos luga! Y “que tal” di Nacional? Un ekipo descumunal den ofensiva, 40 gol na fabor y solamente 11 den contra (doel saldo di +29), ta hopi bon, pero, nan a empata tres y perde dos biaha, vooral p’aso tabata contra e top dos nan, Nacional ta 10 y 7 punto trei RCA y Dakota respectivamente. Estrella, e di cuarto ekipo riba tabla, a bula pasa riba Bubali y Britannia pa drenta top cuater den un bon ratcha, except pa e derota di 1-0 contra RCA, un “inhaal wedstrijd” for di fecha tres, un wega hopi competitivo.

 

Esaki ta e ‘Futbol Aruba Power-Ranking’ pa Pasco 2019 y Anja Nobo 2020:

1.  RCA – E Tricolornan ta un ekipo cu sa con pa gana, no ta pornada nan ta campeon, pero mas importante, nan sa con pa cambia nan wega pa logra resultado, nan experiencia ta crucial, ta parce un ekipo imbatibel, pero bala ta rondo. RCA ta riba un ratcha sin perde di nuebe wega, ocho victoria y solamente un empate di 0-0 contra Britannia den siman 7. Un ekipo motiva y sin un ‘nomber grandi’ e campeonato aki, tur hende ta traha hunto den ekipo pa haya bon resultado.

 

2. Dakota – Den cualkier otro campeonato e “Amarillonan”, un ekipo hopi balansa, posiblemente lo ta comandando tabla sigur cu e numbernan aki; 22 gol na fabor y 9 den contra, e unico wega cu nan a perde tabata 1-2 cu e lider RCA den siman seis, esey ta hasi cu nan ta na di dos lugar riba tabla. E yegada di Alex “Power” Hassel den medio-campo a duna e Dakoteronan mas recuperacion di bala y a libra Albert Briceño pa hasi mas creacion ofensiva den wega, Fernando de Sousa ta nan homber gol.

 

3. Nacional – Ta prueba cu anota hopi gol no ta necesariamente e clave pa bon resultado, mester sa gana ora mester gana tambe. E ekipo di Nacional ta diferente cu anjanan anterior, ta un placer pa wak nan hunga bala y anota asina hopi gol, te cu awo 40 gol den nuebe wega! Nan tin tres hungado den top 10 di goleadornan, Devis Oliveros su so tin 16 gol anota, mas gol cu henter e ekipo di RCA. Ta parce cu Nacional falta profundidad riba banki man’e den otro anjanan, y perdiendo Valdo Leocadio, Deffrey Banton y Chito v/d Biezen, hungadonan di experiencia a afecta nan wega. Apesar cu mester bisa cu 11 gol den contra den nuebe wega ta fenomenal. E empate cu Bubali y La Fama a costa nan punta.

 

4. Estrella – Merecidamente a yega bek den top cuater, hungado un futbol hopi creativo, un wega di posesion, y hasta trahando chensnan di gol, pero, mester anota tambe! si tabata asina nan lo tin un mihor doel saldo cu +4. Talento tin pa anota mas gol den pianan di Trevor Faro y Denrick Lopez, Anuar Kock tambe por anota si mester. Estrella tabata protagonista di probablemente e miho wega di e campeonato aki te cu awo, e partido dramatico contra Nacional den siman shete unda nan a empata 3-3, partido hopi competitivo unda cu no tabatin ni un carchi di amonestacion, super deportivo y atractivo.

 

5. Bubali – “Believe it or not” a bin di menos pa mas den nan wega den e ultimo partidonan, apesar di nan miho dos desempeñonan di e campeonato, unda ironicamente nan a perde 1-2 y 0-2 cu Estrella y RCA respectivamente. Si nan sigui hunga asina, sigui cu e golnan di Jhon Silva, cu Ethan Tromp y Mark Jacobs hayando nan forma y cu bastante pianan hoben y talentoso, nan por ta contendiente pa e di cuarto lugar riba tabla y playoffs. Bubali ta un punta so for di cuarto y tres lugar riba tabla, trei Estrella y Nacional.

 

6. Britannia – Un ekipo cu sin duda tin hopi talento, technica y condicion fisico, por hopi mas, claro, tin hopi caranan nobo tambe cu a yega den e campeonato aki, kizas ta question di tempo pa nan a custumbra cu otro? Ta hasi falta tambe un Luis “Coco” Estrada, un motor den medio campo, clave p’e wega ofensivo, cu “leadership” pa maneha e ekipo riba cancha. E Pumanan ta den di seis lugar riba tabla, y apesar di e talentonan cu a yega e anja aki, falta gol! Coach Juan Valdez a bai, e ekipo ta preocupa cu nan lo no yega playoffs atrobe pa di dos anja sigui.

 

7. Caravel – E ekipo sorpresa di e campeonato aki. E Piratanan ta cinco punta so trei Estrella pa e di cuarto puesto riba tabla. Ora cu hopi a kere cu ta La Fama ta e ekipo pa sobresali y bataya pa e di cuatro lugar, ta Caravel a bin di abou, ganado La Fama y Bubali, ambos cu score di 1-0, pa consolida nan mes den di shete lugar, hopi cerca di top cuater y playoffs. Un ekipo bon para riba cancha cu un wega fisico y cu sa defende.

 

8. La Fama – Un ekipo cu tabata coriendo riba tur cilinder, pero a perde sorprendentemente e dos ultimo weganan importante contra nan rivalnan mas di cerca cu ta Caravel (0-1) y Brazil Juniors (2-5). Esey a hasi cu e Savaneteronan a cai te den posicion ocho riba tabla, apesar di un doel saldo di +2, mihor cu tur e ekiponan bou di top cinco, pero, awor ta den bataya pa evita playoffs di promocion/degradacion (y yega e posicion shete), apesar cu ainda falta mitar campeonato pa bai.

 

9. Brazil Juniors – Cu nos a kere ta cla pa bai hunga pa promocion/degradacion na final di campeonato, a lanta cabes alfin y a gana nan dos ultimo weganan, incluyendo e victoria grandi di 5-2 riba La Fama den e ‘derbi di brug p’ariba’. Un ekipo cu no ta esun di e prome buelta di anja pasa, pero, ainda tin nan wega di hopi velocidad, cu talentonan man’e Theo Texeira, Shequan Cornett, hunto cu Albert Francis y su olfato pa gol y Deion Geerman cu ta un homber clave den medio campo, un trahado incansable sin duda, nan tin chens di sali foi “sotano”.

 

10. SC United – Mester di punta urgentemente, pero, mester bisa cu nan a duna Estrella bataya den nan ultimo wega apesar cu nan a perde 1-3 na final, e wega tabata 1-1 na halftime. Si United hunga asina contra La Fama, Brazil juniors, y Britannia, nan por duna bataya pa evita degradacion automatico, mester sigui cu e intensidad cu nan a demonstra den wega contra Estrella, tur cos ta posibel, milager ta existi ainda!

 

Cu esaki tambe nos ta bisa ‘Bon Pasco y Felis 2020’ na tur e fanaticonan di Futbol y e seguidornan di Futbol Aruba, bo fuente di futbol na nos dushi isla.

Click to comment

Leave a Reply

Your email address will not be published. Required fields are marked *

More in Division Honor

FutbolAruba App

FREE
VIEW