Connect with us

Copa Betico

RCA ta campeon di ‘Copa Betico Croes 2020’ ganando di Dakota den e superclasico

Davyne Croes/DAC Image

Despues di e humiliante salida for di Copa Betico Croes di anja pasa na man di Independiente Porto Caravel di Division Uno, culminando un anja y pico sin playoff y sin trofeo, e Tricolornan di Solito, e ekipo mas campeonil di nos isla, a pone pia abou, pa haya nan mes bek. A reorganisa y a hasi hopi cambionan, tur locual a duna fruta na final, ganando e ultimo titulo di Division Honor y awor e Copa Betico Croes 2020 tambe.

RCA ta riba un racha sin perde for di comienso di e campeonato y awor den Copa Betico, nada no a cambia, ganando cuater wega sigui pa culmina hisando e copa aki. RCA djies sa con pa gana wega di futbol, hasta si ta pa penalti, ganando tres wega n’e forma ey, y awo gana e campeon saliente Dakota 3-1 den final.

 

Pero no ta solamente a gana Dakota, a gana nan convincentemente. Dakota mes a termina asina un racha exitoso tambe, unda nan a gana e titulo di Division Honor 2017-2018 y e ultimo Copa Betico 2019. Awo ta RCA ta bek ariba y ta parce cu nan ta dicidi pa keda eynan.

 

E Tricolornan a cuminsa e partido poniendo presion di biaha riba Dakota, ta man’e un net nan a pone riba e teritorio di e Amarillonan, un “pressing” halto y intenso, Dakota djies no tabatin hopi salida, y tempran caba Phaedrick Baromeo ta hasi penetracion y un pase den area penal y ta haya Ronald Gomez cu ta deposita e bala cu cabes den net pa e 1-0 na fabor di RCA na minuut 4 caba.

E presion enorme di RCA ta sigui despues di e prome gol. Dakota hungando sin dos di nan estelarnan, Alex ‘Power’ Hassel y Nickenson Paul, tampoco a yuda, vooral contra e RCA aki, mi no ta sigur kiko por a wordo hasi, pero, bo mester tur bo piesanan clave pa competi cu RCA, kizas ni esei lo tabata suficiente, imaginabo tambe si RCA lo tabatin Glenbert Croes y Stiven Melchor disponibel den e wega aki?


E club di Solito ta anota atrobe na minuut 15, e biaha aki ta Baromeo mes ta anota e gol di amplia bentaha for di un bon pase di Gomez cu a debolbe e fabor na Baro. RCA 2 Dakota 0.

 

Dakota a wordo forsa pa hunga for di un posicion di “counter attack” te cu awor aki den e wega, pero e contra golpinan no tabata efectivo, apesar di e esfuerzo grandi especialmente di Joshua Gross, pero feit ta cu e medio campo tabata pertenece na Erik Santos, Jean Luc Bergen y compania. E ausencia di Hassel y su recuperacion di bala a laga Daniel Briceño y Dakota sin libertad pa creatividad ofensivo, anulando e efectividad di Fernando de Sousa y Bruno Conceição den delantero.

 

Despues di minuut 20 alfin Dakota a man’e haya un suspiro, ya cu bentaha di 2-0 RCA a baha nan pressing y intensidad despues di un desgaste fisico imponente cu a logra dunanan e resultado te cu e punto ey.

 

Asina mes e no tabata facil pa Dakota, e yegadan no tabata hopi y ni di calidad, RCA tabata defendiendo e resultado bon, no tabatin hopi trabou pa nan portero Jean Pierre van der Biezen, te cu na minuut 25, unda a laga Joshua Gross di Dakota lansa un tiro di por lo menos 35 meter pa banja e portero, insolito, cu tur e dominio di RCA, awor e partido a sera door di un gol di Dakota, cu awor a haya animo. RCA 2 Dakota 1.

Te cu halftime cu e resultado 2-1 pa RCA y tambe ora cu e partido a reanuda despues di e pausa, nos a wak un wega bastante nivela, Dakota cu mas yegada awor, nan a drenta bek den e wega, y cu chens pa hasta empata.

 

Asina futbol ta, ta un gol so mas lo a empata e wega. E partido mes a baha un poco di nivel y tabata hopi mas agresivo y duro den e prome parti di e di dos tempo, pero arbitro Ricky De Leça y su ekipo cu bon actuacion a logra mantene calmo. Tur dos ekipo cu algun chens, ta Dakota mester a sali bai busca e empate, pero, contra un ekipo man’e RCA, e maestronan di hunga un resultado cu nan experiencia.

 

Ora cu Dakota ta cuminsa insisti y ta busca e gol di empata e wega, y kizas logra bai den tempo extra, hasta yega na tironan di penalti, y ‘contra biento y marea’ toch logra gana e copa atrobe.

Pero, saliendo pa busca e empate tambe ta laga buraco atras, locual a cuminsa sosode bastante biaha. 

Ta ora cu Dakota tabata serca di yega na e empate anhela ey, RCA su hungadonan cu tabata spera pa e momento indica pa probecha di un oportunidad pa e “stokada final”, a haya exactamente loke nan tabata kier, e “script” no por tabata mihor. 

 

E ingreso di Digion Ras pa Jean Luc Bergen den e segundo tempo, sigur no tabata pa contene e resultado, apesar di otro cambionan di RCA cu opcion nan mas defensivo, e tabata mas bien pa busca na haya e golpi di knockout fulminante den e combate aki entre e dos club gigantenan aki. “Dicho hecho”, un otro plan di RCA cu a resulta den e gran racha aki cu e club ta pasando aden. 

 

E golpi ey a yega na minuut 88 den pia di Digion Ras mes, un delantero nato, pero e biaha aki di distancia, a haya su mes na rand di area penal na banda robes, a lansa un tiro cu su pia drechi cu un comba unda e bala a dal den e di dos palo bai den net, unda Joscar de Kort no por a alcansa, un joya di gol pa hasi e wega 3-1 pa RCA.

Cu e pitaso final RCA ta consagra campeon di ‘Copa Betico Croes 2020’, un titulo mereci, manteniendo tambe asina e racha ‘sin perde’  di e Tricolornan cu a cuminsa for di e final di Division Honor anja pasa. Pabien RCA y tambe Dakota pa e spectaculo presta na e fanaticada di futbol.

Pa conclui e articulo aki cambiando di tema; p’aso bida sa ta euforia, pero bida sa ta agonia tambe. Nos di Futbol Aruba kier uni nos mes na e fanaticada di futbol pa pidi y roga pa e pronto recuperacion di e futbolista Amy Henao di SV Britannia Lady Pumas, cu nos creador trece sanacion pa cu e bida hoben aki, forsa pa bo Amy.

 

1 Comment

1 Comment

  1. Emk

    January 26, 2020 at 9:55 am

    Hopi bunita reportahe. Mi a echt biba henter e wega di nobo.

Leave a Reply

Your email address will not be published. Required fields are marked *

More in Copa Betico