Wega final di futbol ta entre SV RCA y Deportivo Nacional

Diamars anochi e comision di apelacion (Beroepscommissie) di Arubaanse Voetbal Bond (AVB) a reuni riba e beroep cu Deportivo Nacional a entrega contra e decision di directiva di AVB, relaciona cu e ultimo wega hunga den liga “Division di Honor” entre SV Dakota y Deportivo Nacional. Despues di deliberacion interno, e comision a duna Deportivo Nacional rason den nan ponencianan y como tal e wega final pa e titulo di campeon lo bay entre SV RCA y Deportivo Nacional.

Directiva di AVB mes no a participa den e decision aki pa dos motibo. E prome ta pasobra Beroepcommissie ta traha independiente. Y e di dos motibo ta pasobra cu e beroep ta contra e decision di directiva di AVB mes y no contra e protesta di SV Dakota.

Pa awor, e decision aki ta final, tanto pa Deportivo Nacional como pa directiva di AVB y manera cu reglamento ta prescribe, e decision ta “bindend voor alle partijen”. Despues cu AVB a ricibi dicho decision lo cuminsa prepara pa organisa e weganan final. Mester tene en cuanta cu e 4 dianan cu ta stipula pa regla pa por organisa un partido. Probablemente e prome di e tres weganan lo cuminsa otro siman.

Ta bon pa menciona cu tawata tin hopi critica ariba AVB, entre otro cu no tin transparencia y cu AVB no ta sali informa encuanto e caso. Desde un principio AVB a informa cu na momento cu un beroep keda entrega, esaki tin un proceso cu e tin di encamina. AVB a pidi pa duna e comision e espacio necesario pa nan por trata e caso debidamente y pa nan por tuma un mihor decision cu ta posibel. AVB tawata di opinion cu tanten cu no tin un decision no lo duna ningun comentario pa asina evita cu e comentarionan por wordo mal uza.

Despues cu AVB a tuma nota ayera nochi y awe durante henter dia encuanto un noticia cu tawata circulando rond ariba social media cu Deportivo Nacional a hanja razon den nan beroep, AVB a opta pa no reacciona pasobra AVB tawata en espera di e decision final for di e comision di Apelacion. AVB ta di opinion cu mientras no ricibi e decision final no por reacciona ariba insinuacionan. Pues awor cu e decision a keda entrega na AVB, e clubnan a wordo notifica y awor tin cu bai organisa e Play Off final.

Start a Conversation

Your email address will not be published. Required fields are marked *