Category: Club

RCA “BIG WHEEL LOTTERY powered by POWERADE” ta gana 3-0

Diabierna anochi dilanti un publico bon anima di parti Caiquetio y RCA, a ranca sali e promer partido pa campeonato 2017 – 2018. Un promer mitar bon bataya pa e Indjannan di Paradera ta hasi cu halftime ta bai aden cu apenas 1-0 bentaha pa RCA cu bunita Gol di Ronald Gomez ya casi den pito di promer tempo. Den di dos tempo Caiquetio a sigi lucha pero e hoben Glenbert Croes cu apenas a drenta wega a forsa un penalti bon mereci. E estrella robesao Jeanluc Bergen a ehecuta e penalti perfecto. Wega a sigi desaroya y merecidamente e hoben Kevin Ravelo Peña ta anota e gol mas bunita di anochi despues di un bon acshon di Ronald Gomez. Ekipo Tricolor cu e anja aki atrobe ta usando masha hopi talento di su sistema hubenil, a keda masha satisfecho cu prestashon di Jason Geerman, Andrew Martinez, Adrian Koolman, Marshall Marval, Lujean Bergen, Glenbert Croes, Kevin Peña pero tambe e hobennan super talentoso cu a uni como refuerso Denrick Lopes y Leonuar Croes cu ambos tawatin un bon wega. Como suplentenan tawatin tambe e hobennan Alex Ramon, Joscar de Kort, Elijah Ponte Lira y Gregory Gomes. Den e oncena cu a start Nathan Lo-a- Nioe, Miguel Angel Gonzalez, Jeanluc Bergen y Ronald Gomez tawata esnan cu mas experenciå y tur tawatin un bon partido guiando e hobennan. Proximo encuentro di RCA “BIG WHEEL LOTTERY powered by POWERADE” ta diadomingo awo 22 di oktober pa 8or di anochi enfrentando e BUFALONAN di Tanki Leendert JTL. Fanaticada di RCA ta bai tin e oportunidad di gana un DINNER FOR 2 na OLD FISHERMAN. Cumpra bo entrada y warda bo ticket, na final di e wega lo anuncia e number di e ganador. Bo mester ta presente pa ricibi bo premio.
Foto cortesia FUTBOL ARUBA #RCApaBida

RCA ta cla pa enfrenta Caiquetio

Ekipo Tricolor cu tin e historia di mas exitoso den futbol local,  sigur desde 2008 tambe ta e ekipo cu mas exito ultimo 10 anja. Cinco titulo Campeonil y dos final perdi. E Campeonato aki a opta pa pone e Maestro di tur Maestro na Timon, esta Joseph “Joy” Rosa. RCA a hiba un preparashon fisico di bon caliber bou guia di e experto local Andy Gomes. RCA ta conta cu un staff completo cu di Masahista Icho Matos te Lider ekipo Danny Kelly tin masha experencia. Directiva a prepara pa e promer wega cu articulonan special pa anima. Directiva ta invita un y tur especialmente fanaticada di RCA pa ban yena stadion Guillermo Prospero Trinidad diabierna awo pa 8or di anochi. Bo entrada ta bandi panord pega cu e Gym. Na e prome 50 fanatico cu paga nan entrada lo tin un regaldo. Korda cu e plaka di entrada di e porta Tricolor ta pa bo ekipo preferi. #RCApaBida

Comunicado di Prensa Sv Dakota

COMUNICADO DI PRENSA

Sv Dakota ta desea di splika e motibonan pa kiko a pidi (arbitrage y) herziening di e decision di Comishon di Apelacion (den e caso Sv Nacional vs Sv Dakota).

Un herziening por wordo pidi ora tin hechonan nobo y ora ta trata algo excepcional. Den e caso aki Sv Dakota ta di opinion cu esaki ta e caso.

Sv Dakota ta sigur cu Comishon di Apelacion no a tene cuenta cu derechonan Fundamental ankra den Huishoudelijke Reglement di AVB (HR) y no a tene cuenta cu e principionan di Behoorlijk Bestuur cu cualnan principionan Comishon di Apelacion tambe Tin cu tene cuenta cu nan ora di trata un caso y tuma un decision.

Loke Sv Dakota tabata desea cu e herziening ta pa hanja e oporunidad pa wordo skucha pa asina Comishon di Apelacion tuma un decision a base di puntonan treci dilanti pa tur partidonan den e caso aki. Sv Dakota tabata desea un caso justo, cual den e caso aki no tabata asina.

Punto 1: Comishon di Apelacion a trata e caso cu 4 di su 7 miembronan, mientras mester tin presente minimo cinco (5) miembro pa por tuma un decicion valido. Esaki conforme articulo 26, inciso 1 conhunto cu articulo 26, inciso 10 HR.

Punto 2: Un miembro di Comishon di Apelacion cu a atende e reunion y a tuma parti na e decision ta un ex miembro di e Bestuur di Sv Nacional y kende a hunga futbol pa e organisashon. Articulo 26, inciso 10 HR ta prescribi cu un miembro di Comishon di Apelacion no por participa na reunion ni tuma parti na e decision ora ta trata casonan di su organisashon. Ta pa tal motibo un miembro di Comishon di Apelacion cu ta miembro tambe di Sv Dakota corectamente no a participa na e reunion y decision den e caso aki. E ex miembro di bestuur di Sv Nacional tambe Mester a keda sin particpa na e reunion y decision den e caso aki. Aki tin en todo caso aparencia di partidista (schijn van partijdigheid), cual tambe ta motibo pa no participa na reunion y decision den e caso aki.

Remarkabel ta cu casi di biaha despues cu Comishon di Apelacion a tuma su decision, sr. Peterson (mihor conoci como “Jan Poets”) a pone riba su Facebook Page cu Sv Nacional a gana e apelacion. Na es momento ey Bestuur di AVB ni Sv Dakota tabata na altura cu un decision a wordo tuma. Sv Dakota a wordo informa di e decision e dia despues den oranan di atardi.

Punto 3: Comishon di Apelacion no a tene cuenta cu articulo 63, inciso 3 HR cu ta bisa cu e partido contrario, den e caso aki Sv Dakota, tin e derecho pa trece su puntonan dilanti y tambe pa skucha testigo. Sv Dakota no a hanja e oportunidad di trece nada dilanti den e caso aki. Aunke cu Sv Dakota a pidi por escrito (via email) na diferente ocasion pa wordo skucha y un miembro di Comishon di Apelacion a informa na miembronan di Sv Dakota cu nan lo wordo skucha, e Comishon di Apelacion a tuma su decision sin skucha Sv Dakota. Es mas, Sv Dakota no a hanja ni e apelashon di Sv Nacional pa wak y no tabata sa mes a base di kiko a apela te despues di e decision.

E derecho di un partido pa defende su mes y pa wordo skucha den un caso ta basa tambe riba e beginsel van behoorlijk bestuur di “Hoor en Wederhoor”. Es decir tur partido den un caso mester wordo skucha.

Esaki ta un di e basenan fundamental cu den cualkier tipo di decision Mester tene cuenta cune, y si no hasi esaki e decision ta uno co no por keda para.

No ta comprendibel con Comishon di Apelacion ta skirbi den su decision cu e ta suficiente informa a base di e documentonan ricibi y pesey no a hanja necesario pa skucha Sv Dakota.

Pa prome, Comishon di Apelacion no por kita e derecho di Sv Dakota pa defende su mes y pa wordo skucha a base di e articulo 63 HR y base di e beginsel van behoorlijk bestuur di “Hoor en Wederhoor”. Pa di dos, Sv Dakota no a hanja ningun momento e oportunidad pa entrega documentonan pa defende su mes contra di e apelacion di Sv Nacional. Sv Dakota no a hanja e apelashon ni pa lesa, aunke cu a pidi pa hanja un kopia di esaki. Pa di tres, Comishon di Apelacion no por bisa cu e tin suficiente documentonan pa dicidi riba e apelashon di Sv Nacional, mientras e no a duna Sv Dakota e oportunidad pa entrega documentonan den apelacion ni pa wordo skucha pa asina por trece su puntonan dilanti. Comishon di Apelacion a tuma un decision basa solamente riba e puntonan treci dilanti dor di Sv Nacional.

Punto 4: Comishon di Apelacion a tuma decision riba dos punto sin motiva con a jega na esaki mientras e ta obliga pa hasi esaki (Motiveringsbeginsel).

Situashon 1: Pa Comishon di Apelacion por a contesta e pregunta si e hungador di Sv Nacional, riba kende Sv Dakota a protesta y a hanja rason den su protesta, durante di e wega di Sv Dakota y Sv Nacional ta un hungador legal of no, Comishon di Apelacion Mester a contesta Prome kiko a base di articulo 55, inciso HR ta e consequencianan ora un team retira for di Campeonato, den e caso aki Sv Jong Aruba. E articulo ta bisa cu tur e partidonan hunga door di e team cu a retira for di Campeonato, den e caso aki Sv Jong Aruba, ta wordo considera No hunga! Comishon di Apelacion Mester a contesta e pregunta si e carchi geel cu e hungador di Sv Nacional a ricibi durante di e wega contra di Sv Jong Aruba, cual team a retira for di campeonato, ta cai afor of no mirando cu e wega ey ta wordo considera No hunga. Si e no ta conta mas, e hungador di Sv Nacional lo a hunga cu tres carchi geel contra di Sv Dakota y lo tabata un hungador no-legal pa cu e wega ey. Comishon di Apelacion a keda sin contesta e preguntanan aki. Piyo ainda, Comishon di Apelacion ta bisa cu loke ta trata carchi etc. ta un otro caso, mientras E caso Aki ta trata si e hungador tabata tin tres carchi geel of no durante di e wega contra di Sv Dakota. Pesey ta inexplicabel con Comishon di Apelacion sin ningun tipo di motivacion ta bisa cu e hungador di Sv Nacional ta uno legal durante di e wega di Sv Dakota.

Situashon 2: Comishon di Apelacion no a motiva a base di kiko a jega na e pensamento cu AVB a crea e impreshon cu 7 di e hungadornan di Sv Nacional cu no a entrega e documentonan manera prescribi den reglamentonan di AVB, a bira legal dor cu AVB a tuma e documentonan aki (riba cual Sv Dakota a protesta).

Aparte cu Comishon di Apelacion ta obliga di motiva cualkier decision cu e tuma, akinan ta pisa mas pa motibo cu Sv Nacional No a Ni trece e punto aki como un punto pa nan apelacion. Comishon di Apelacion a tuma un decision riba un punto cu No tabata ni punto di apelacion di Sv Nacional.

Punto 5: Comishon di Apelacion a sinta riba e stoel di AVB y di su Algemene Ledenvergadering dor di pone e responsabilidad pa cu e documentonan riba AVB y no riba e teamnan manera Semper tabata e caso. Nunca tabata obligashon di AVB pa controla e documentonan cu un team ta entrega. Semper e tabata e obligashon di e teamnan pa entrega documentonan cu ta na ordo conforme reglamento di AVB. Esaki Semper a wordo acepta dor di e teamnan.

Comishon di Apelacion No por dicidi di un dia pa otro cu desde awor e responsabilidad di esaki ta serka AVB. Desde cu AVB ta existi e responsabilidad aki ta serka e teamnan. Comishon di Apelacion No por sinta den e stoel di AVB ni di e Algemene Ledenvergadering. Comishon di Apelacion mester tuma un decishon a base di e reglamentonan vigente di AVB. Comishon di Apelacion por duna sugerencia pa trece cambionan den e reglanan, pero No por cambia esaki riba su mes. Nan No por crea reglanan nobo. Cual den e caso aki a tuma lugar.

Remarkabel ta cu den casonan den pasado Comishon di Apelacion a dicidi cu ora no cumpli cu e regla di entregamento di documentonan, esaki ta trece cune cu e hungador no ta uno legal.

Punto 6: Comishon di Apelacion a interpreta articulo 9 di Strafbepaling totalmente robes. Otro cu Comishon di Apelacion ta pensa, e articulo aki no ta conta den e situashon cu un hungador a hanja un carchi geel durante di un wega (y cu ta acumula su di tres carchi geel). Basa riba e interpretashon incorecto di Comishon di Apelacion, (di awor bay dilanti) e referee mester traha un rapport pa cada hungador cu a hanja un carchi geel durante di un wega (y a acumula tres carchi geel den diferente partidonan). Aparte cu Comishon di Apelacion no a tene cuenta cu referee ta anota carchi geel riba e formulario di wega di cada team (“wedstrijdformulier”), Comishon di Apelacion no a tene cuenta cu un referee No por traha un rapport asina pa e simpel motibo cu e referee No ta hou bij den cua partidonan un hungador ta hanja carchi geel y ki ora e ta acumula tres carchi geel den tres diferente partido. Alaves Nunka esaki a wordo hasi na Aruba y tampoco na otro parti di mundo. Comishon di Apelacion a dicidi algo cu No por wordo hasi y no lo wordo hasi den futuro Tampoco. A base di e decision incorecto aki, awor bay dilanti un hungador cu tres carchi geel por hunga normal si e referee no a traha un rapport y AVB no a informe cu e no mag di un hunga e siguiente wega.

E puntonan ariba menciona ta Sigur puntonan excepcional i/o nobo pa asina Beroepscommissie dicidi pa cambia nan decision. Si esakinan no ta, kiko ta anto? Derechonan mester wordo respeta y tur partido mester wordo trata igual. E biaha aki, esaki lamentablemente No tabata e caso.

Sv Dakota ta lamenta cu e mesun 4 miembronan di Comishon di Apelacion cu a tuma e decision di cual Sv Dakota a pidi herziening ta e mesunnan cu a dicidi pa no acepta e petishon di Sv Dakota pa herzien e decision cu ta claramente contra di derechonan fundamental di un miembro di AVB pa por defende su mes den un caso. E ex-miembro di bestuur di Sv Nacional, cual na opinion di Sv Dakota no por wordo concidera inparcial, a tuma parti na e decision aki tambe di Comishon di Apelashon.

Sv Dakota ta lamenta tambe cu atrobe Comishon di Apelashon ta tuma un decision Sin cu e ta motiva esaki debidamente. No ta bisa nada pero nada den su decision riba e puntonan aki riba menciona cu Sv Dakota a trece dilanti como puntonan pa herzien e decision.

Sv Dakota ta termina Gradiciendo su Fanaticonan y su Sponsornan pa e confiansa y apoyo duna durante e Campeonato 2016-2017. Bosonan ta The Best!

Ta desea RCA y Nacional exito den final.

DAKOTA TUR DIA!

Sv Britannia ta clasifica den 12 di su 13 divicionan AVB 2016/17

Pa locual ta campeonato di AVB/ Lifida 2016/17 Sv Britannia un biaha mas ta bati record ora cu 12 di su 13 equiponan ta clasifica pa playoff 2016/17. Sv Britannia su divicionnan ta consisti di; U-5 lider; Eliana Croes, coachnan; Milton Dreishor, Alfredo Vasquez y Jeanpierre Winterdaal. U-7 Oro, lider; Louis Leañez, coach; Cedric Werleman. U-7 Plata, lider; Louis Leañez, coach; Lito Nadall. U-9 Oro, lider; Jose Maduro y Carmen Jacopucci, coachnan; Andre Kolman y Fercho Sebastian. U-9 Plata, lider;Jose Maduro, coachnan; Anthony Kwidama y Luis Morillo. U-11 Oro, lider;Jurraine Thiel, coachnan; Gregory Tromp, Rodymar Paeasch y Roderick Croes. U-11 Plata, lider;Richelline Kock-Dania, coachnan; Kendrick Dania, Luis Delgado y Neohmar Maduro. U-13 lider;Jurraine Thiel, coachnan; Jose Luis Estrada y Rowie de Mey. U-15 (Menor) lider;Lisette Werleman y Emilou Tromp, coachnan; Cedric Werleman y Luis Jose Estrada.
U-17 (Mayor) lider;Marcel Carrion, Midred George, David Castro y Reuben Mau A Sam, coachnan; Jose Chelique Duran y Sawataku Godoy. Awe diabierna Sv Britannia Hoofdklas lo hunga un wega crucial ora cu nan topa cu Dep. Nacional. Sv Britannia mester gana pa por sigi den e lucha pa clasifica pa final mientras di otro banda Nacional tambe kier gana pa sigura nan clasificacion. Pa locual ta e Damanan di Sv Britannia mayan diasabra nan lo mester enfrenta e fuerte equipo di La Fama y unda cu ambos equipo lo busca e victora y e 3 puntonan den wega. Pa locual ta e playoffnan di U-5 te cu U-17 no a cuminsa ainda door cu falta algun weganan pa hunga ainda y mesora su tras lo cuminsa cu e playoffnan. Ta hasi un invitacion na tur e muchanan, mayornan y fanaticada di Sv Britannia pa bin apoya e team di Hoofdklas Sv Britannia contra di Dep. Nacional awe diabierna anochi den stadion Guillermo P. Trinidad pa 8’or di anochi y mayan diasabra Sv Britannia Damas vs La Fama den C.D. Franklyn Bareño pa 8:30 di anochi.

Sv Britannia Frisian Flag ta empata cu Dakota 1-1 cu gol di Theric Ruiz

Diabierna anochi a cuminsa e playoff di futbol di Aruba cu ta restora bao di A.V.B. y e prome wega a bai entre Sv Britannia Frisian Flag contra di Sv Dakota Island Window’s & doors. E alinacion di Sv Britannia tabata como lo siquiente; Lionel Kaarsbaan, Theric Ruiz, Rodymar Paesch, Miguel Guiterrrez, Sylvester Schwengle, Renier Paraez, Luis “Coco” Estrada, Johnatan Ruiz, Alex Hassell, Luis Carlos Croes y Bruno Conceicao. Como suplente nan tabata tin; Ericson Croes, Aljee Feleciana, Kendrick Dania, Jeanpierre Fingal, Denrick “Denden” Lopez, Sebastian Montoya y Mairon Gutierrez. E wega a cuminsa unda cu e oncena di Paradera / Piedra Plat a cuminsa domina e wega y a crea 3 oportunidad di gol hopi trempan den wega. Sv Britannia Frisian Flag a keda domina e wega sigur pa 20 minut te ora cu Dakota a cuminsa trese balansa den e wega. Tabata na di 35 minut di wega cu Ezra Bosnie ta pone un paso largo pa Ricky Hodge y unda cu e keeper di Britannia Lionel y Ricky Hodge ta dal den otro y refree ta pita pinalty pa Sv Dakota. E pinalty ta wordo tuma pa Emile Linkers cu ta un hungador di seleccion di Aruba naci na Corsou y cu a hunga futobol entre otro na Hulanda y Indonesia y Emile Linkers ta manda Dakota ariba 1-0 y pa halftime drenta cu e ventaha minimo di Dakota ariba Sv Britannia Frisian Flag. Den di dos tempo Sv Britannia ta hasi un cambio y e delantero Sebastian Motoya Cano ta drenta wega na lugar di Sylverster Schwengle kende a sufri un leccion. Cu e cambio aki Sv Britannia a aumenta su dominio ariba Dakota y por bisa cu mayoria di dos tempo Sv Britannia Frisian Flag a domina e wega y cu un Dakota cu aki aya tabata for peliger pa e portero di Britannia. Na di 20 minut di dos tempo despues di un corner Theric Ruiz ta hana e bala ariba su pia robes un den un media vueltla ta deposita e bala den net pa e gol di empate. Hopi a considera e gol aki un hoja di gol. Di e forma aki tambe refree Colina ta fluit pa e final di e wega y unda cu tur dos team ta bai cas cu un punto. E proximo wega di Sv Britannia ta contra di Dep. Nacional y di otro banda Dakota mester enfrenta RCA. Diasabra anochi RCA ta gana Dep. Nacional cu score di 2-1 y mas y mas e weganan di playoff ta bira mucho mas enteresante. Pabien na Sv Britannia Frisian Flag y Dakota cu e empate y nos mester meciona cu Dakota manera custumber a jena tribuna banda pazuid mientras cu Sv Britannia a sorprende cu masha hopi fanatico tambe.

RCA “Big Wheel Lottery powered by Powerade” prome clasificado playoff lo enfrenta Bubali diasabra awo.

Diabierna ultimo na momento cu Riverplate, cu ta na di 5to posishon, a cai venci, automaticamente Tricolornan di Solito a bira e prome ekipo pa clasifica pa play-off campeonato Divishon Honor. Cu 28 punto faltando 3 wega mas di campeonato regular, diasabra awor 2 di april pa 6:30 pm e Soldatnan Tricolor lo enfrenta ekipo Hulk di Bubali den Centro Deportivo Guillermo Prospero Trinidad. Un partido sigur importante pa e orguyo berde di Noord, pero tambe pa RCA cu kier gana un ves mas e Copa Campeon Campeonato Regular. Directiva ta invita e famia grandi pa ban apoya nos hobennan y despues pasa club pa hunto nos cuminsa crea e ambiente festivo di play-off final. Ya caba a hasi pedido pa camiseta tricolor y dentro algun siman nan lo ta obtenibel na club. Ban apoya tur nos divishonnan ya cu RCA ta clasificando pa playoff den tur categoria y den mayoria di nan competiendo pa promer lugar.

Sv Britannia Damas vs Barry University USA

Diaranson 8 di maart den Compleho Deportivo Franklyn Bareño na Piedra Plat lo tuma lugar un wega internacional di Damas ora cu e team campeon di Aruba esta Sv Britannia Slenda enfrenta e team campeon universitario esta Barry University. E wega lo cuminsa pa exactamente 6:30 di atardi y lo wordo dirigi pa refreenan internacional. Sv Britannia Splenda ta e campeonnan indiscutibel di Aruba y sigur e team di Piedra Plat / Paradera ta bon prepara pa enfrenta e team Mericano.
E team di Barry University ta di vacacion akinan na Aruba y ta probecha e momento pa keda den condicion y di e forma aki a busca un wega contra di Sv Britannia Splenda. Actualmente e seleccion di Aruba Damas U-17 ta den preparacion pa cuminsa hunga eliminatorio pa mundial y esaki ta un bon oportunidad pa alghun di nos hungadornan midi forsa contra di un team di nivel halt. Entrada lo ta completamente gratis y bar y cushina lo ta bon surti. Un invitacion ta bai na tur fanatico di bon futbol pa bin apoya nos mucha muhernan den nan compromiso serio awe diaranson den C.D. Franklyn Bareño na Piedra Plat.

RCA cu otro anja Super Exitoso y ta cla pa 2017

fb_img_1482597484453Directiva di sv RCA ta masha gradecido na prensa, tur sponsors y colaboradores cu den 2016 a juda e organisashon tricolor jega na mas titulo y sigi marca historia. RCA “Big Wheel Lottery powered by Powerade” a habri 2016 ganando comodamente e Copa Betico derotando Britannia den final 25 januari. Na maart ekipo Tricolor ta ricibi e premio di miho ekipo deportivo di Aruba, un premio cu pa prome ves ta ser gana pa un ekipo di futbol. Final di campeonato regular RCA ta caba #1 y titula campeon cu apenas un derota y 17 victoria den 18 wega. Despues di un play-off bon bataya RCA ta bolbe retene e titulo maximo derotando Dakota na dos ocashon 1-0 pa titulo #34 di Aruba su campeonato divishon honor organisa pa A.V.B. Den september RCA ta bolbe marka historia conquistando e prome Copa AVB “Champions of the Exchange” derotando campeon di St Maarten. RCA lo habri 2017 contra sc United diadomingo 8 di januari pa 8or di anochi. Oraginashon tricolor ta enbusca pa retene e prestigioso Copa Betico. Un danki ta bai na tur leidsters y coaches cu ta trahando foi categorianan Infantil, Hubenil te na Dames y Divishon Honor. Tambe na team di nos artistanan di Inter cu semper ta duna e sosten. Por ultimo danki na tur sponsors cu ta forma parti di e famia campeon tricolor. Directiva ta invita un y tur pa diabierna awo 6or pasa club pa hunto nos sende Pagarra riba ritmo di Dande. Felis Anja 2017 na Aruba completo.

fb_img_1481218718554

Sv Britannia Vitamalt na prome lugar despues di a gana Estrella di 1-0

Diadomingo anochi den un Compleho Deportivo Guillermo P. Trinidad bastante jen di fanaticada a tuma lugar e gran encuentro di bario ora cu e Pumanan di Paradera/Piedra Plat esta Sv Britannia Vitamalt a enfrenta e Narajadanan di ST Cruz Estrella. Semper ora cu e dos equiponan nan aki topa otro e enteres di fanatica ta grandi pasobra tanto Sv Britannia Vitamalt y Estrella ta brinda bon nivel di futbol.

Sv Britannia ta bin di 6 wega hunga di cual 5 gana y un empata, mientras cu Estrella ta bin di 7 wega hunga di cual 2 wega perdi 1 gana y 4 empate. E wega a cuminsa na un nivel halto unda cu ambos banda a cuminsa hunga un futbol ofensivo y cu intencion di busca e goal trempan den wega. Sv Britannia trempan ta haña un chens pa bai ariba den marcacion ora cu Bruno Concaicao ta lop e bala over di e keeper di Estrella pero e keeper ta logra mishi cu e bala y evita e goal trempan. Despues di e hugada aki tabata Jeanpierre Fingal cu tambe ta haña dos bon chens den di prome tempo pa manda su team Sv Britannia ariba pero ambos tiro ta wordo para pa e keeper hoben di Estrella y asina tambe halftime ta bai aden.

Den di dos tempo e wega a cuminsa bira un tiki mas fisico y unda cu refree mester a interverni na varios ocacion. Tabata casi na final di wega cu Theric Ruiz ta logra anota e goal di victoria pa Sv Britannia Vitamalt cual a nifica 3 punto mas pa Sv Britannia Vitamalt.

Britannia

Player Goals Assists Yellow Cards Red Cards
Theric Ruiz1000
Miguel Gutierrez0010
Alex Hassell0010
Total1020

Estrella

Player Goals Assists Yellow Cards Red Cards
Donavan Henriquez0010
Total0010

Cu e resultado di e wega aki e standing ta como lo siqiente Sv Britannia Vitamalt 19 punto, Dakota 17, RCA 16, Nacional 15, Riverplate 13, Estrella 7, La Fama 7, Caravel 5, Bubali 5 y na di ultimo lugar Jong Aruba cu 1 punto. E proximo wega di Sv Britannia Vitamalt ta contra di La Fama diadomingo 11 di december pa 8’or di anochi mientras cu di otro banda Estrella su ultimo wega lo ta contra di Bubali diadomingo tambe pero pa 6’or di atardi y ambos wega lo tuma lugar den C.D. Guillermo P. Trinidad na Dakota.

2017/18 (DH)

PosClubPWDLFAGDPts
111005143
211004133
311003033
411001013
500000000

Sv Britannia Frisian Flag ta golea Riverplate 5-0

river-vs-brit-nov-2016Diasabra atardi den stadion Guillermo P. Trinidad tabata tin e encuentro tan spera entre Sv Britannia Frisian Flag cu tin 13 punto den 5 wega hunga contra di Riverplate cu 10 punto den 5 wega hunga tambe pa locual ta e campeonato 2016/17. E wega tabata di suma importancia pa ambos equipo tumando na cuenta cu Sv Britannia kier keda mantene su mes den top di e tabla di posicion y di otro banda Riverplate ta lucha pa keda den e prome 4 teamnan ariba tabla di posicion. E wega a cuminsa basta bon balansa unda cu ambos team tabata busca e goal di bai ariba den e prome mitar di wega. Tabata na di 29 minut di wega cu Richard van der Hoest cu ta drai rondi di su as y ta fusila Eugene Tromp keeper di Riverplate cu un potente tiro di un distancia basta bon. Di e forma aki e wega ta casi jega na final di prome tempo ora cu Sv Britannia Frisian Flag ta hanja un tiro liber y aki ta unda cu banki ta duna Franklin Ortiz e tarea pa ehecuta e tiro liber, cual tarea Franklin Ortiz ta cumpli pa pone e bala den net pa hasi e wega 2-0 pa Sv Britannia Frisian Flag y asina haltime ta bai aden tambe.

derwin-donatoDen di dos tempo Riverplate a cuminsa hunga balo bruha y tabata tira hopi bala largo unda cu Derwin Donata tabata domina fasil y duna su medio campo e bala y akinan ta unda cu Sv Britannia Frisian Flag a tuma rienda di e wega y ta na 78 minut cu Jean Pierre Fingal cu ta aumente e score ora cu e ta manda un fusil den gol despues di a ricibi un paso perfecto pa hasi e wega 3-0. No ta pasa un minut cu Bruno Conceicao cu ta bolbe aumente  e score ora e ta anota gol pa hasi e wega 4-0. Na di 80 min ta Bruno un biaha mas ta drenta for di e banda robes di e cancha y ta manda un fusil cu ta dal den pia di un hungador di Riverplate pa hasi e wega 5-0 na fabor di su team Sv Britannia Frisian Flag. E homber principal di e anochi aki pa Sv Britannia sigur tabata Derwin Donato cu a comanda e defensa di e muchanan di Paradera / Piedra Plat. Cu e victoria aki Sv Britannia Frisian Flag ta acumula 16 punto den 6 wega hunga y lo mester enfrenta Estrella diadomingo awor den C.D. Guillermo P. Trinidad. E wega di diadomingo awor lo bira e clasico di bario ora Sv Britannia Frisian Flag enfrenta Estrella.brit-4-x-goal