Nacional lo enfrenta Dakota den Final di Division Honor, Estrella a keda elimina pa via di un gol menos

E ultimo fecha di Play-Off Division Honor a duna nos hopi drama ora cu Dakota y Estrella a bai den nan wega cu Britannia y Nacional respectivamente, empata riba e tabla di posicion cu shete punto y tambe den ‘doel-saldo’, solamente Dakota cu un gol mas anota cu Estrella te cu awor ta e minimo diferencia entre nan dos. Mientras cu Dakota a enfrenta Britannia na CDGT na Dakota, Estrella a enfrenta Nacional na CDFF na Noord simultaneamente.

Dakota a cuminsa su wega di biaha tirando den atake ya cu nan mester a sigura un victoria “cuesta lo que cuesta”, esey ta e mesun situacion cu Estrella den nan wega na Noord.

Britannia a presenta cu un planteo tactico defensivo pa preveni un derota, dunando Dakota basta posesion di bala na comienso di wega. E “Abejanan” a logra anota nan prome gol na minuut  6 caba ora cu Albert Francis a touch e bala den gol despues cu e portero hoben di Britannia, Kevin Vermeer, a basila despues di un cruce den area penal, bala a colga dilanti gol permitiendo Francis habri marcacion.

Mientras cu na Noord, Nacional a bay ariba den marcacion na minuut  15 pa medio di Bryan Bedoya. Estrella a hunga e wega sin algun hungado clave manera Phaedrick Baromeo y David Dubero pa via di lesion y Norviannel Naar y Alex Hassel door di suspension.

Na CDGT despues di e prome gol, apesar di a mantene control di wega, Dakota su yegadanan a bira menos skerpi. Britannia tambe a “settle down” riba cancha hayando e bala mas frequente cu algun yegada di peligro. Ta te na minuut 39 e di dos gol di Dakota a yega den pia di e incansabel Ricky Hodge cu a los un tiro potente for di pafo di area penal na banda robes, un joya di un gol cu a lanta Dakota for di sonjo despues cu nan a cuminsa hunga slordig pa un rato.

Asina halftime a bay aden na “Guillermo Trinidad” cu e marcacion 2-0 pa Dakota. Na “Frans Figaroa” e wega a drenta descanso cu Nacional den bentaha di 1-0.

E di dos tempo na Dakota a sigui cu mesun tono, Dakota skerpi atrobe den e prome parti di e etapa complementario. E presion riba e defensa di Britannia tabata grandi y na minuut 50 caba ora cu un cambio di wega pa nan banda drechi a termina den un intercepcion di Albert Francis, cu a lora e bala pa Ricky Hodge cu tabata drentando den mei mei di area penal pa fusila e portero Vermeer pa hasi e wega 3-0 pa Dakota.

Na Noord, Estrella a corta bentaha den anotacion cu un gol di Joel Geerman na minuut 71 y 5 minuut despues Jean Pierre Van der Linden a hasi e wega 2-1 pa e “Naranjadanan” cu awor lo tabatin mester di dos gol so pa empata Dakota den “doel-saldo”, si Nacional no anota mas.

Dakota no a logra sigui cu nan wega skerpi cu nan a cuminsa cu ne, mientras tanto Britannia hasta cu algun yegada di peligro cu lo por a complica Dakota si nan a concretisa. E wega a bira duro tambe entre tanto cu hopi carchi, hasta tres cora, incluyendo uno insolito pa Keano Maduro di Dakota, cu a complica su participacion den e siguiente wega cu por ta play-off final.

Mientras cu na Noord, Devis Oliveros a hasi e wega 2-2 cu su gol pa Nacional na minuut 81, poniendo Estrella bek na borde di eliminacion, pero, ta Anwar Kock di Estrella a pone su ekipo bek den bentaha 3-2 na minuut 87. Estrella ainda faltando dos gol pa bay final a sigui busca y a tira dilanti pa busca e golnan cu tabatin mester. Cu e wega na stadion Guillermo completa cu e anotacion di 3-0 pa Dakota, cu awor mester a sinta spera y wak ta kiko ta evolviendo na Noord.

Na Noord tabata puro drama awo, ya cu Estrella tirando dilanti buscando dos gol mas pa bay final, a haya un penalty den extra tempo na minuut 90+5 unda Anwar Kock a anota cu e tiro di penalty pa hasi e wega 4-2 pa Estrella, faltando un gol so mas pa elimina Dakota, cu tabata sinta riba tereno na CDGT wardando e resulatdo aki, y pa nan mes bay final contra Nacional. Faltando menos cu un minuut, Estrella a tira dilanti pero no tabatin tempo pa mas, nan a keda “kort” un gol so pa bay final, lastima, pero Futbol t’asina.

E agonia di Estrella na Noord ta den comparacion cu e hubilacion di Dakota na stadion Guillermo Trinidad, nan a celebra sin fin hunto cu nan fanaticonan den tribune, hasta lagrimanan a cai, pero ta lagrimanan di alegria, Futbol ta duna esey tambe.

Asina ta cu Dakota lo bay enfrenta e campeon nan saliente Nacional den e final cu lo cuminsa e Diaranson venidero dia 27 di Juni, e prome wega di dos y si mester lo tin un di tres wega. Gran final anto, Nacional vs Dakota pa e campeonato Division Honor 2017-2018, Futbol Aruba lo t’ey sigur.

Start a Conversation

Your email address will not be published. Required fields are marked *