E ‘deporte rey’ tabata bon representa e aña aki den e entregamento di ‘Premio Excelencia den Deporte‘ 2024. Zyana Rogers, Zinou Winklaar y e Seleccion Nacional GU-15 a sali ganador.
–
Zyana Rogers tawata un di e nominado den categoria individual pa mihor deportista den su categoria, pero, tambe a wordo nomina conhuntamente cu su otro compañeronan di e seleccion GU-15, cu a sali campeon di e torneo di Concacaf GU-15 Liga C na 2024, pa ‘Ekipo di Aña’ den e evento di entregamento di “Premio Excelencia den Deporte” di Aruba.
Zyana, apesar di su edad jong, ta forma parti awor di seleccion nacional mayor, cu a caba di hunga un partido hopi importante di ‘Concacaf W Qualifiers’ contra Saint Kitts & Nevis, unda Aruba a gana 2-1, e mesun anochi cu e ‘entregamento di premio’. Den e partido aki e ekipo di Aruba a marca un paso grandi c’e prome wega di clasificacion p’un mundial femenino na cas (den e caso aki ‘Mundial Brasil 2027’) y alabes tambe un prome victoria contra Saint Kitts & Nevis (2-1) den nan historial.
–
–
Rogers tawatin un bon aña
Mientras c’e partido tabata andando den “full swing” na stadion Trinidad, e premionan tawata wordo entrega, no mucho leu, na Renaissance Convention Center. Algun di e compañeronan di Zyana den e ekipo campeon di e torneo GU-15 aña pasa, hungadornan man’e e capitan Niamh Tromp, Denicienne Maduro, Adannayah Breinburg, tawata hunto cu Rogers na stadion cu e seleccion, ademas tambe nan propio head-coach di GU-15, Joally Lake, cu awor ta fungi como assistant coach di e seleccion grandi.
–
Zyana Rogers di Aruba den accion den e torneo di Concacaf GU-15 League C unda el a keda como top “goal-getter” – Photo by Davyne Croes/ DAC Image
–
Zyana a gana e Premio Excelencia den Deporte pa mihor ‘Deportista Femenino den categoria di 14-17 aña’ pa su contribucion grandi n’e seleccion campeon di GU-15 unda el a sali e topscorer den e torneo di Concacaf.
–
Zinou Winklaar, hoben futbolista tambe a gana premio
Otro galardon p’e famia di futbol a wordo gana pa Zinou Winklaar di e club San Luis Deportivo di Savaneta. Zinou no ta un desconoci den e mundo di futbol, ya cu el a sali escohi recientemente como MVP den e categoria di U-9 Liga Oro den e evento di “Award Night” di AVB. Awor, den e evento di “Premio Excelencia den Deporte” a wordo escohi como ‘Deportista Masculino di aña – Categoria 6-9 aña’ (entre tur deportenan), un gran logro p’a Zinou y futbol en general.
–
Zinou Winklaar cu number 3 (man robes) hungando pa San Luis Deportivo contra Deportivo Nacional den U-9 – photo courtesy of ‘AVB Competitions’
–
Seleccion femenino GU-15 a pon’e ‘broche di oro’
Na final, e premio pa e “Ekipo di Aña” den Premio Excelencia den Deporte, a wordo gana p’e seleccion femenino di futbol UG-15 mes, no tabatin duda. Un ekipo prepara y dirigi pa head coach Joally Lake, asisti pa Lerjan Caceres y demas ‘curpa tecnico’ y staff, cu a facilita e futbolista hobennan cu tur lok’e nan tawatin mester p’e logro grandi aki.
E lista di hungadornan cu a forma parti di e seleccion di Aruba campeon di Concacaf GU-15 League C y awor ganador di e premio “Ekipo di Aña” den ‘Premio Excelencia den Deporte’:
T. Rafael, D. Veenstra, N.Tromp (C), D. Leerdam, J. Kock, C. Sempertiguez, C. Geerman, A. Franken, K. Brete, L. Angela, Z. Rogers, N. Kwidama, N. Denz, D. Maduro, S. Gois Santos, A. Breinburg, S. Rumnit, N. Moncayo
–
Seleccion di Aruba celebrando nan titulo di campeon di Concacaf GU-15 League C- Photo by Davyne Croes/ DAC Image
–
Pabien na tur e ganadornan.