Entrenador di seleccion di Aruba, Rini Coolen en coneccion cu Caribbean Cup Maart 07, 2016
Pa medio di bon cooperacion y un “memorandum of understanding” firma entre Arubaanse Voetbalbond (AVB) y PEC Zwolle, un biaha mas e asociacion di futbol di Aruba a logra haya Rini Coolen como “bondscoach” pa train e seleccion di Aruba cu ta participa na e “Caribbean Cup” na luna di maart. E bondscoach a yega Aruba dialuna y e mesun anochi caba a reuni cu e seleccion di Aruba pa un prome training.
“Lo tin cuater training despues cu e hungadonan cumpli cu e weganan di e campeonato local actual”, asina Rini Coolen a bisa. E hungadonan di Hulanda lo yega den transcurso di e siguiente simannan y lo tin un training cu tur hungado hunto.
E seleccion lo hunga dos wega di Caribbean Cup. E prome ta tuma luga na Antigua riba dia 22 of dia 23 di maart, Richard Dijkhoff, Presidente di AVB a bisa. El a splica cu a ricibi dos diferente fecha y ta wardando pa e decision final di parti di organisadonan di Caribbean Cup encuanto di e esaki. E di dos wega, cual ta versus e ekipo di St. Kitts y e wega ey lo tuma luga na Aruba riba dia 26 di maart 2016. Ta bon pa bisa acerca cu e campeon di Caribbean Cup lo hunga den e “Gold Cup” otro aña na Merca.
Presidente di AVB, Richard Dijkhoff en coneccion cu Caribbean Cup Maart 07, 2016
Richard Dijkhoff a comenta cu lo tin diferente anuncio cu informacion di e hungadonan pa cu e wega na Aruba pa sigura cu stadion ta yen atrobe cu fanaticonan pa apoya Team Aruba.
Rini Coolen tabata na Aruba na september ultimo y e conoce mayoria di e hungadonan di e seleccion di Aruba caba. El a traha tambe un pre-seleccion di hungadonan cu ta biba na Hulanda y den transcurso di e proximo simannan lo anuncia kende ta e seis of shete hungadonan cu lo biaha for di Hulanda pa uni na e seleccion di Aruba. E team lo consisti di mayoria hungadonan cu ta biba na Aruba mes, Coolen a bisa.
E bondscoach a yega Aruba cu hopi entusiasmo y energia pa cuminsa cu e trainingnan di biaha. E lo ta observando e hungadonan tambe durante di diferente wega. E kier mira nan hunga den competencia, el a bisa y ta p’esey el a bin Aruba e siman aki. Rini Coolen a haci su huiswerk prome cu tur cos, mirando weganan di e teamnan di St. Kitts y Antigua pa ta bon orienta riba e puntonan di enfoke cu ta necesario pa e team di Aruba.
Richard Dijkhoff a agrega cu e hobennan na Aruba a cuminsa prepara for di januari caba y e escogencia final ta un decision di Rini Coolen, como e bondscoach. AVB ta contento cu por a yega na un acuerdo cu PEC Zwolle y logra haya Coolen como bondscoach na un tarifa hopi rasonabel.
Arubaanse Voetbal Bond a sigura cu tur e hungadonan, cu excepcion di dos for di Hulanda, ta conoci caba y a hunga den e seleccion di Aruba pa e rondnan di eliminacion pa Copa Mundial aña pasa. No ta sigur si Breinburg di NEC Nijmegen lo cura di su lesion pa por hunga e weganan pa nos seleccion y ta wardando pa resultadonan final di su testnan. Posiblemente Bonifacio lo uni na e seleccion tambe, pero ta pendiente pa documentonan cu ta confirma oficialmente su lasonan cu Aruba. Aruba tin un bondscoach profesional, pero no ta confirma ainda kende lo forma parti di e seleccion finalmente; AVB a dicidi cu lo laga e decisionnan tocante hungadonan y trainingnan pa e coach tuma.
Directiva di AVB hunto cu Rini Coolen en coneccion cu Caribbean Cup Maart 07, 2016
“Tin un compromiso grandi y e entusiasmo ta halto”, segun Richard Dijkhoff. El a conclui bisando cu e presencia di un coach profesional no solamente ta hisa e nivel di accion di e seleccion, pero tambe ta refleha den weganan di campeonatonan local y pues ta un bentaha hopi grandi.
A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina principal ta situa den Compleho Deportivo Frans Figaroa na Noord.
