Despues di bastante anticipacion y specialmente hopi preparacion, diamars mainta e seleccion di futbol di Aruba a sali pa Antigua pa e wega pa cualificacion di CFU Gold Cup. E wega ta tuma luga diaranson atardi y Aruba lo enfrenta Barbuda/Antigua.
Entretanto a forma e seleccion caba y a percura pa nan ta bon prepara. Lamentablemente algun hungado a cay afo na ultimo momento, debi na entre otro lesionnan. Algun hungado cu lo no mira den accion durante e siguiente wega ta Joshua Tchong, Ericson Danso y Marlon Pereira.
A prepara un agenda pisa asina cu nan a yega Antigua den preparacion pa e wega di diaranson.
Weganan ta conta pa “ranking” di CONCACAF
Diahuebs mes, esta dia 24 di maart e ekipo nacional ta regresa nos isla pa prepara pa e wega di diasabra contra Sint Kitts. E wega ey ta cuminsa pa 8:00pm den Stadion Guillermo Prospero Trinidad. E prome 1000 carchinan di entrada ta bay na Afl. 12,50 y despues ta subi na Afl. 15,00 obtenibel na Valero Boulevard, Valero Santa Cruz y na Technical Center Angel Botta den Stadion Frans Figaroa na Noord.
Ta bon pa enfatisa cu e weganan aki ta conta pa cualificacion pa e “CFU Gold Cup 2017” cu lo tuma luga na Merca otro aña.
