Connect with us

AVB

Aruba a demostra calidad di futbol contra St. Martin

“Ningun di dos ekipo no tabata conoce otro, por a nota riba tereno tambe. St. Martin a sali duro pero e wega a desaroya pa cual nos campeonnan a tuma over y gana e wega tambe”, asina Richard Dijkhoff, Presidente di Arubaanse Voetbal Bond, AVB, a conta despues di e wega diasabra anochi den Stadion Guillermo P. Trinidad na Dakota.

alp_2851-customE asociacion di futbol di Aruba a opta pa organisa e wega internacional aki, pa por duna e campeonato algo extra, laga e ekiponan campeon enfrenta otro y asina gana experencia cu islanan den region prome cu opta pa bay mas leu. “Tur hende a keda masha contento cu e oportunidad, cu e calidad y e nivel di wega y claro cu e resultado. Y ta precisamente e direccion aki AVB lo sigui bay na e momento aki”.

 

Richard Dijkhoff a sigui splica cu e intencion ta pa e ekipo campeon enfrenta mas ekipo campeon den e region, specialmente den Caribe Hulandes. St. Martin a invita Aruba caba pa un wega di revancha cerca nan pa cual lo mester evalua awor.

“Por a nota awe nochi cu S.V. RCA a bin bon prepara pa e wega internacional aki. Mirando cu campeonato ta cuminsa otro siman, por conclui despues di e wega aki, cu e perspectiva ta bunita y positivo”, di acuerdo cu e Presidente di AVB. El a subraya cu S.V. RCA a demostra un ekipo hungando uni, riba un velocidad halto y ofreciendo un calidad di hugadanan bunita y profesional. “Na final esey ta locual fanaticonan kier mira. Esaki sigur ta yuda eleva e nivel di futbol na Aruba”.

Arubaanse Voetbal Bond a corda tur hende di awor caba cu e campeonato 2016-2017 ta start diabierna awor dia 23 di september den Stadion Guillermo P. Trinidad. “Nos ta cuminsa cu e campeonato mescos cu el a caba, pues e campeon y sub-campeon lo topa otro den e prome wega”, di acuerdo cu Richard Dijkhoff. E no por a keda sin menciona cu AVB ta trahando riba proyectonan grandi cu sigur lo beneficia e ekiponan, beneficia e hungadonan y mas cu tur cos, atrae mas fanatico di futbol pa stadion.

Click to comment

Leave a Reply

Your email address will not be published. Required fields are marked *

More in AVB

Division Honor