Connect with us

Futbol Aruba

Bubali 2 – RCA 2, punto di oro pa Bubali, punto perdi pa RCA!

Bubali vs RCA den siman 15 tabata un wega cu hopi expectativa. Dos ekipo bastante similar den hopi cos, y riba tabla di posicion di ‘division di honor’ cu solamente 4 punto di diferencia entre nan dos, ta logico, nos a spera un wega balansa, duro sigur y fisico, pero, tin biaha e wega cu bo a wak no ta loke realmente e resultado ta bisa, un di e misterionan di Futbol. E prome 20 minuutnan e partido tabata exactamente locual a wordo spera. Ambos ekipo tratando di ataka, un bataya “campal” den middenveld, wega fisico, cu hopi respet pa otro si, un wega den comienso di banda pa banda, RCA, casi cu un gol na minuut 10 salba pa e palo di gol, Bubali cu menos chens pero cu algun yegada toch.

E partido ideal ey a caba na minuut 22 cu e promer gol di wega di Jean Luc Bergen di RCA, cu un tiro liber di 30 meter for di porteria di Bubali defendi pa Rudolph Benita, e tiro liber ey por cierto a bin despues cu Benita a hunga e bala cu man pafor di e doel-gebied, cu hasta por tabata un carchi cora pa e portero di Bubali, referee De Leca a dune un carchi geel so! E tiro liber cobra pa Bergen, un bala biniendo un poco for di banda robes cu un curva chikito a move stranjo na man robes di Benita, cu mester a saka un man cu mokete pa purba desvia e bala pa salba e gol, pero envano, e bala a drenta dunando RCA e bentaha di 1-0. Bergen mes cu a score e gol di e tricolornan tambe a bira tambe e protagonista den mid-veld di RCA. Su manera di hunga ta deceptivo, ora cu bo ta pensa cu Bergen su wega falta di vigor cu hopi coremento y cu velocidad, toch “somehow” e ta tuma “rienda” di e wega pa su ekipo, su wega mental, cu recuperacion y distribucion di bala ta efectivo, RCA asina a controla e medio campo y tambe e wega, controla tabata mas bien ‘domina e wega’. Nada tabata pasa e medio-campo di RCA, y si algo pasa mes, e defensa tabata tey pa controla. Toch halftime a bay aden cu e resultado di Bubali 0 RCA 1, e por tabata peor pa Bubali.

E segundo tempo a sigui unda e prome a caba, nos a nota cu niun cambio a wordo hasi pa e orguyonan di Nort, cu ainda tabata sin por decifra e wega efectivo di RCA. E dominio a continua y na di 50 minuut e tricolornan a amplia nan bentaha cu 2-0 pa medio di un gol di e incansabel Frederick Gomez, cu hunto cu Jean Pierre Fingal a laga e defensa di Bubali lenga ‘fo pa un largo tempo, remarcabel ta cu RCA su atake tabata mas bien hopi simpel pero efectivo cu e dos nan ey cu Bergen un poco atras.

Despues di un atake peligroso atrobe cu casi gol di RCA na minuut 51 nos a mira Ethan Tromp di Bubali na banda di cancha pa ingresa den wega, “eureka”! Husto na entrada di Tromp den e wega na minuut 53 ya Bubali a haya un chens cla den un tiro liber, Maurice Escalona a cobra un tiro duro cu e portero di RCA Joscar de Kort no por a controla y den e rebote y confusion den e “area chika” Adfer Reyes ta hinca pia pa e gol di desbentaha di Bubali. RCA ta protesta na referee sin resultado, de Kort mes tambe a keda lesiona y mester a bandona wega. E momentum di wega di biaha awor a bira di Bubali, porfin nan a haya e bala bek y na minuut 59 ta Ethan Tromp mes cu un tiro di distancia largo a banja e portero suplente di RCA pa empata e wega 2-2. E wega awor a bira duro pero toch tenso y dinamico, Bubali cu mas posesion di bala cu nan tabatin anteriormente, RCA a cai un poco pero 10 minuut despues a bons bek cu nan wega cu a duna hopi resultado. E wega awo tabata un “toma y dame” cu RCA saliendo pa busca e victoria y tres punto importante, y Bubali cu a warda atras pa hasi contra-golpi, tratando di preserva e punto aki sin gran riesgo, asina mes a tribi algun biaha pa bay “all out” pa busca e gol tambe. Cu presion grandi di RCA den e ultimo cuarto di wega pa colmo Edmar Tromp di Bubali a haya carchi cora.

Bubali asina cu un homber menos a bataya duro te final di wega pa e ‘punto di oro’ aki pa asina keda cu 26 punto den di cuarto luga riba tabla, pendiente di kiko Britannia por hasi den nan wega contra Dakota. RCA apesar di e empate a sinti mas como un derota, punto perdi sigur, nan a perde di gana, despues di e bentaha di 2-0 y tambe e dominio pa gran parti di wega, no lubida e bentaha numerico tambe depues di e expulsion di Edmar Tromp di Bubali. Na nos padece e ausencia di Erick Santos a hunga un rol ya cu RCA por a anota hopi mas gol, pero no por a completa, nan strategia si tabata hopi aserta mes den e wega aki. RCA ta keda cu 22 punto den di seis luga riba tabla, ainda tin mas bataya pendiente pa yega den e promer cuater nan. ‘Man of the match’ tabata sin duda Ethan Tromp di Bubali cu a permiti Bubali haya e bala bek den e wega y asina empata pa e punto di oro aki pa e oncena di Nort.

Click to comment

Leave a Reply

Your email address will not be published.

More in Futbol Aruba