Connect with us

Futbol Aruba

Estrella y Nacional den ‘clash di titan nan’ no a defrauda

E clash entre e campeon di Aruba di temporada pasa y e actual lider di campeonato di e anja aki semper tabata bay ta hopi interesante, por lo menos riba papel! Ta p’esey deporte ta exisiti, pa competi contra otronan den un ambiente sano, pa mehora y supera bo mes cada bes mas. Ta hopi expectativa mes tabatin p’e wega aki, y e no a defrauda. Estrella cu un victoria lo a aumenta nan liderato riba tabla di posicion di ‘division di honor’, Nacional en cambio, ganando di Estrella lo pasa pa comanda e tabla.

E wega for di pitaso inicial a cuminsa cu hopi velocidad y energia pero alaves tambe cu hopi tactica, e oncena nan tabata bon para riba cancha, ta manera un wega di ahedres pero riba un veld di futbol. Mientras cu e dos ekiponan a cuminsa ataka otro ferosmente, por a observa cu Estrella ta un cuadro hopi bon para den defensa, ancra pa Pancho Croes y David Dubero, nan atakenan ta cuminsa generalmente di atras pa e volantenan cu ta distribui pa e delanteronan, un systema di posesion y rotacion di bala, defensor y capitan Pancho Croes mes tambe sa subi den atake tin biaha, pero no por a hasie mucho den e wega aki. Nacional su wega ta un di ‘pressing’ halto, kiermeen nan mesun hungadonan mas adelanta manera Devis Oliveros (cu por cierto ta cubri hopi tereno), Valdo Leocadio y hasta Edward Clarissa, ta defende ariba p’abo, un systema cu ta rekeri un condicion fisico enorme. E bataya entre e dos oncena nan aki tabata wordo dicidi den duelonan individual duro entre hungadornan clave. Estrella tabata un toke mihor cu Nacional den e promer 25 minuutnan cu yegada nan mas precies, pero poco poco por a wak con Nacional a cuminsa pusha Estrella mas atras y a cuminsa domina e wega, asina mes toch Estrella tabata haya algun salida pero no hopi mane den cuminsamento. Cu hopi esfuerso fisico Nacional tabatin e bala mas y mas te ora cu halftime a yega, e hecho cu Kenroy Ranger, e estelar delantero di Nacional a haye hopi biaha den posicion off-side, tabata indicacion cu algo tabata pasando ey dilanti, dus, yegada y penetracion tabatin sigur pa e norteronan. Otro momento clave tambe den e promer tempo ta cu un pilar den defensa di Estrella, David Dubero, a cai lesiona apesar cu el a sigui hunga asina mes, pero mester a bandona wega na cuminsamento di e di dos tempo. Halftime a bay aden 0-0, pero un empate sin gol cu sabor dushi di un tremendo competencia y exhibicion di futbol. Un wega competitivo pero sportief cu un carchi geel so te na e punto ey, pero no pa wega bruto si no pa protesta, duna na Valdo Leocadio, capitan di Nacional.

E segundo tempo a cuminsa cu Nacional den mesun situacion cu na final di prome tempo, cu dominio pero no contundente paso Estrella tambe tin su cualidad nan, ta pa algo nan ta na top di e tabla ademas di ta campeon di Copa Betico Croes.

Despues di hopi lucha di ambos banda, un gol a cai al fin na minuut 66, pero pa via di penalty pa Nacional, despues di un foul riba Kenroy Ranger den un penetracion peligroso den area penal. Penalty cobra pa Devis Oliveros pa su di 12 gol di temporada pa duna su ekipo un minimo bentaha den e wega. Estrella a responde y casi a haya un penalty nan mes na minuut 68, pero referee no a bay di acuerdo cu e caida di Norvianel Naar den area penal tabata debi na accion di e defensor di Nacional, apesar di protesta di Naar e wega ta sigui mes cos. Na minuut 72 ta yega un momento crucial den e wega na unda e incansabel Kenroy Ranger di Nacional a los di su “man-decking”, ora Pancho Croes un par di seconde previo a sali bay busca e bala te den medio campo, lagando su posicion den defensa central, pa purba inicia un atake pa su ekipo, pero despues di un interception di Devis Oliveros di Nacional y un pase perfecto pa Ranger, cu a saca probecho di su velocidad relampago a bay straight mei mei den e buraco chikito cu a keda den e linea defensivo di Estrella, pa drenta area penal, balia e portero Jesus Fria cu a sali for di su gol, hasi e wega 2-0 pa Nacional. Ta un par di seconde so a tum’e pa scapa pa logra e gol aki pa su number 15 y top goleado di ‘division di honor’.

Estrella ainda no a baha cabes apesar di e gol impactante di Ranger, cualke otro ekipo lo a cai for di otro na un momento asina, no Estrella! Despues cu e ‘naranjadanan di Santa Cruz’ a haya un tiro liber na minuut 81, tiro duro di Dwayn Raven cu e portero di Nacional no por a controla, unda dos hungado di Estrella a “hustle” pa pusha e bala paden, pero cu e promer toke Norvianel Naar ta haya credito p’e gol di descuento di Estrella. Den e ultimo minuut nan tenso Nacional a logra wanta e anotacion pa sigura nan victoria contundente riba un adversario digno den Estrella. Ta hopi hende a yega na remarke pa ‘man of the match’ e anochi fabuloso aki, pero ta Kenroy Ranger a keda cu e distincion ey. Futbol por a celebra e anochi aki, fanaticonan cu a yega stadion a disfruta y a bay cas convenci cu na Aruba sigur nos por! Asina aki tambe Nacional a empata Estrella y Dakota cu 32 punto riba tabla, pero cu miho diferencia di gol Nacional ta comanda awor, Estrella number dos y Dakota ta den di tres puesto den ‘division di honor’ di Aruba su futbol.

 

Click to comment

Leave a Reply

Your email address will not be published. Required fields are marked *

More in Futbol Aruba

Division Honor